ખુશખબર / કોરોના કાળમાં RTOના દસ્તાવેજો રિન્યૂ કરાવાને લઇને આવ્યાં મોટા સમાચાર

કોરોના મહામારીને લીધે પેદા થયેલી ગંભીર પરિસ્થિતિને લઈને  કેન્દ્ર સરકારે ફિટનેસ, આરસી બુક, પરમિટ, ડ્રાઇવિંગ લાઈસન્સ જેવા મહત્વના દસ્તાવેજોને રિન્યૂ કરવાની છૂટ ૩૧ ડિસેમ્બર ૨૦૨૦ સુધી લંબાવી દીધી છે. જે ગુજરાતમાં પણ અમલી થશે. આ પહેલાં આ સમય મર્યાદા સપ્ટેમ્બર સુધી લંબાવવામાં આવી હતી. જેમાં ફરી વધારો કરવામાં આવ્યો છે.

કેન્દ્ર સરકાર દ્વારા કોરોના મહામારી અને તેના ફેલાવાનાં વધતાં પ્રમાણને કારણે  કચેરીમાં  પ્રમાણમાં ઓછી ભીડ થાય તેના માટે અગાઉ આ નિર્ણય જાહેર કર્યો હતો પરંતુ કેટલાંક રાજ્યોમાં  હજુ લોકડાઉન અને કરફ્યુને લાગુ કરાયાે છે, એવામાં આવા મહત્વના દસ્તાવેજોને રિન્યૂ કરવાનું કામ પણ અટવાઈ પડે તેવી સ્થિતિ છે. 

ઉલ્લેખનીય છે કે, કોરોના મહામારીને લીધે લોકડાઉન દરમિયાન કેન્દ્રીય રોડ પરિવહન મંત્રાલયે આદેશ કર્યો હતો કે એક્સપાયર્ડ લાઇસન્સ,આરસી બુક, તમામ પ્રકારની પરમિટ, ફિટનેસ સર્ટીફિકેટ વગેરે દસ્તાવેજોની વેલિડિટી ૩૦ જૂન ૨૦૨૦ સુધી લંબાવવામાં આવી હતી, ત્યારબાદ આ સમય મર્યાદા લંબાવીને સપ્ટેમ્બર સુધી કરાઈ હતી. જોકે વર્તમાન સ્થિતિને ધ્યાનમાં રાખતા સરકારે રિન્યૂ સમય મર્યાદાને ૩૧ ડિસેમ્બર સુધી લંબાવી દીધી છે.

હાલમાં મોટી સંખ્યામાં લોકો ગુજરાતની બહાર  છે કારણ કે શાળા કોલેજો બંધ છે તો ક્યાંક વર્ક ફ્રોમ હોમ હોઈને હજુ કેટલાક કર્મીઓ તેમનાં વતનથી પાછા આવ્યા નથી. આ સંજોગોમાં તેમનાં વાહનની પરમિટ ફિટનેસ સર્ટીફિકેટ કે લાઇસન્સ રિન્યૂઅલ હાલમાં શક્ય ન હોઈ ને આવા વાહન માલિકોને ડિસેમ્બર સુધી મોટી રાહત મળશે.