મોતની 'પોટલી' / બોટાદના લઠ્ઠાકાંડ મામલે રોજીદ ગામના સરપંચનો ગંભીર આક્ષેપ, 'પોલીસે એક્શન ન લેતા લોકો મોતને ભેટ્યાં'

• રોજીદ ગામના સરપંચનો પોલીસ પર ગંભીર આક્ષેપ
• ગામમાં અત્યાર સુધીમાં 9 લોકોના મૃત્યુ થયા : સરપંચ
• પોલીસે એક્શન ન લેતા લોકો મોતને ભેટ્યાં : સરપંચ

બોટાદના કથિત લઠ્ઠાકાંડ મામલે રોજીદ ગામના સરપંચનું સૌથી મોટું નિવેદન સામે આવ્યું છે. રોજીદ ગામના સરપંચે નિવેદન આપતા જણાવ્યું કે, 'ગામમાં અત્યાર સુધીમાં 9 લોકોના મૃત્યુ નિપજ્યાં છે. દારૂના અડ્ડાઓના કારણે અનેક પરિવારોને નુકસાન થયું તેમજ પોલીસ કર્મચારીઓએ એક્શન ન લેતાં લોકોના મોત નિપજ્યાં છે.'

બરવાળા તાલુકામાં હાલ 10થી 11 જગ્યાએ દારૂ વેચાય છે: સરપંચ

સરપંચે વધુમાં જણાવ્યું કે, 'અગાઉ મામલતદારે એક્શન લીધાં હતા પરંતુ ત્યાર બાદ પોલીસે કોઇ કામગીરી ન કરી. પોલીસે બરવાળા તાલુકામાં દારૂ ન વેચાતો હોવાનો રિપોર્ટ સોંપ્યો છે. હાલમાં લઠ્ઠાકાંડ બાદ હકીકતો સામે આવી છે. હાલમાં 10થી 11 જગ્યાએ બરવાળા તાલુકામાં દારૂ વેચાય છે. રોજીદના 16થી વધુ લોકો હોસ્પિટલમાં હાલ સારવાર હેઠળ છે.'

બરવાળા પોલીસ સ્ટેશને ખડકી દેવાયો પોલીસનો કાફલો

વધુમાં તમને જણાવી દઇએ કે, બોટાદના કથિત લઠ્ઠાકાંડ મામલે બરવાળા પોલીસ સ્ટેશને પોલીસનો કાફલો ખડકી દેવાયો છે. ATS, SP, રેન્જ IG અને FSLની ટીમો બરવાળા પોલીસ સ્ટેશને ખડકી દેવાઇ છે. એ સિવાય LCB અને SOGની ટીમો પણ બરવાળા પોલીસ સ્ટેશનમાં સ્ટેન્ડબાય કરી દેવાઇ છે. 15 લોકોને બરવાળા પોલીસ સ્ટેશનમાં પૂછપરછ માટે લવાયા છે. જ્યાં દેશી દારૂના વ્યવસાય સાથે સંકળાયેલા 15 લોકોની પૂછપરછ હાથ ધરવામાં આવી છે.