- ઓસ્ટ્રેલિયા સામેની ત્રણ મેચોની T20 સીરિઝમાં ભારતે મેળવી લીધી જીત
- પૂર્વ કેપ્ટન વિરાટ કોહલીએ 63 રનની શાનદાર ઇનિંગ રમી હતી
- રોહિત શર્માએ આઉટ થઈને પેવેલિયન જઈ રહેલ કોહલીની પીઠ થપથપાવી હતી
હૈદરાબાદમાં રાજીવ ગાંધી ઇન્ટરનેશનલ સ્ટેડિયમમાં રમાયેલ T20 મેચમાં ભારતે ઓસ્ટ્રેલિયાને 6 વિકેટથી હરાવી દીધું હતું. ઑસ્ટ્રેલિયાએ પહેલા બેટિંગ કરતા 20 ઓવરમાં 7 વિકેટના નુકસાન પર 186 રન બનાવ્યા હતા. જેના જવાબમાં 187 રનના લક્ષ્યાંકનો પીછો કરવા ઉતરેલી ભારતીય ટીમે 19.5 ઓવરમાં 187 રન બનાવીને જીત મેળવી હતી. ઓસ્ટ્રેલિયા સામેની ત્રણ મેચોની T20 સીરિઝની પહેલી જ મેચ હારવા છતાં ટીમ ઈન્ડિયાએ સીરિઝ 2-1થી જીતી લીધી છે. પહેલો મેચ મોહાલીમાં હતો જ્યાં ભારતને હાર મળી હતી, પછી નાગપુરમાં 8 ઓવરની મેચમાં ટીમ ઇન્ડિયાને જીત મળી હતી અને હવે હૈદરાબાદમાં ટીમ ઇન્ડિયાએ જીત મેળવીને સીરીઝ જીતી લીધી છે.
ટોપ ઓર્ડર ફેલ છતાં પણ મળી જીત
ઘણી વખત એવું બન્યું છે મેચમાં ટીમ ઈન્ડિયાનો ટોપ ઓર્ડર નિષ્ફળ જાય છે ત્યારે ટીમ માટે જીતવું અઘરું પડી જાય છે પણ આ મેચમાં એવું ન થયું. કેએલ રાહુલ 1 રને અને રોહિત શર્મા 17 રને આઉટ થયો હતો પણ ત્રીજા નંબરના બેટ્સમેન વિરાટ કોહલી અને સૂર્યકુમાર યાદવે જીત સુનિશ્ચિત કરી હતી.
કોહલીનો કમાલ
આ મેચમાં ટીમ ઈન્ડિયાના પૂર્વ કેપ્ટન વિરાટ કોહલીએ 63 રનની શાનદાર ઇનિંગ રમી હતી. મેચમાં વિરાટ કોહલી આઉટ થઈને પેવેલિયન પરત ફરી રહ્યો હતો એ સમયે ટીમ ઈન્ડિયાની જીત લગભગ નિશ્ચિત થઈ ગઈ હતી અને એટલા માટે જ રોહિત શર્માએ પેવેલિયન જઈ રહેલ કોહલીની પીઠ થપથપાવી હતી અને તેની શાનદાર ઇનિંગ માટે અભિનંદન આપ્યા હતા. હાલ એ વિડીયો સોશ્યલ મીડિયા પર ખૂબ જ વાયરલ થઈ રહ્યો છે.
આ કારણે મળી જીત
ટીમ ઈન્ડિયા તરફથી ઓસ્ટ્રેલીયા સામેની ત્રીજી મેચમાં સૂર્યકુમાર યાદવે 69, વિરાટ કોહલીએ 63 રન બનાવ્યા હતા. અંતમાં હાર્દિક પંડ્યાએ 25 રનની ફિનિશિંગ ઇનિંગ રમીને ભારતને જીત અપાવી હતી. આ પછી જ્યારે મેચ છેલ્લી ઓવરમાં પહોંચી ત્યારે વિરાટ કોહલી અને રોહિત શર્મા બંને પેવેલિયનની સીડી પર બેસીને મેચ જોઈ રહ્યા હતા અને જીત મળતાની સાથે જ ખુશીથી ઉછળી પડ્યા અને એકબીજાને ગળે લગાવ્યા હતા. હાલ આ વિડીયો પણ સોશિયલ મીડિયા પર ખૂબ વાયરલ થઈ રહ્યો છે.
