Gautam Adani Networth: / ગૌતમ અદાણી માટે રાહત: અમીરોની લિસ્ટમાં ફરી ઉથલપાથલ, અંબાણીથી બસ આટલા ડગલાં પાછળ

• વિશ્વના અમીરોની યાદીમાં અબજોપતિ ગૌતમ અદાણીને ફાયદો
• હવે બિલિયોનેર્સની યાદીમાં આ સ્થાને પંહોચ્યાં ગૌતમ અદાણી
• 24 જાન્યુઆરીએ બહાર આવ્યો હતો હિંડનબર્ગનો રિપોર્ટ 

Gautam Adani Networth: છેલ્લા ઘણા દિવસોથી અદાણીને લઈને ઘણા સમાચાર સામે આવ્યા છે અને હિંડનબર્ગની એક રિપોર્ટથી એમની સંપતિમાં ઘણો ઘટાડો થયો હતો પણ આ બધા વચ્ચે વિશ્વના અમીરોની યાદીમાં અબજોપતિ ગૌતમ અદાણીને (Gautam Adani) ફાયદો થયો છે. જણાવી દઈએ કે અદાણી ગ્રૂપના (Adani Group) શેરમાં થયેલા તાજેતરના નુકસાન પછી પણ અદાણી ગ્રૂપના માલિકે ફોર્બ્સની રિયલ ટાઈમ બિલિયોનેર્સની યાદીમાં પાંચ સ્થાનની છલાંગ લગાવી છે તો બીજી બાજુ મુકેશ અંબાણી વિશ્વના અબજોપતિઓની આ યાદીમાં 12મા નંબરે છે. 

24 જાન્યુઆરીએ બહાર આવ્યો હતો હિંડનબર્ગનો રિપોર્ટ 
અમેરિકાની શોર્ટ સેલિંગ ફર્મ હિંડનબર્ગનો રિપોર્ટ બહાર આવ્યા બાદ ગૌતમ અદાણીની મુશ્કેલીઓ વધી ગઈ છે. નોંધનીય છે કે 24 જાન્યુઆરીએ આ રિપોર્ટ આવ્યા બાદ અદાણી ગ્રુપની કંપનીઓના શેરમાં મોટો ઘટાડો જોવા મળ્યો છે અને છેલ્લા 9 ટ્રેડિંગ દિવસોમાં અદાણી જૂથની તમામ કંપનીઓની માર્કેટ મૂડીમાં રૂ. 9.5 લાખ કરોડ એટલે કે 49 ટકાનો ઘટાડો થયો છે. 

હવે બિલિયોનેર્સની યાદીમાં આ સ્થાને પંહોચ્યાં ગૌતમ અદાણી
એક સમયે વિશ્વના બીજા સૌથી ધનિક વ્યક્તિ અબજોપતિ ગૌતમ અદાણીને આ વર્ષે ભારે નુકસાન થયું હતું અને ગયા અઠવાડિયા સુધીમાં તેઓ 22માં સ્થાને પહોંચી ગયા હતા. નોંધનીય છે કે રિચ લિસ્ટમાં ગૌતમ અદાણીએ મંગળવારે 5મા સ્થાનનો ઉછાળો નોંધાવ્યો છે અને હવે તે 17માં નંબર પર આવી ગયો છે. જણાવી દઈએ કે ફોર્બ્સની રિયલ ટાઈમ બિલિયોનેર્સની યાદી અનુસાર હાલ ગૌતમ અદાણીની કુલ નેટવર્થ $60.8 બિલિયન છે. 

મુકેશ અંબાણીની નેટવર્થ 
ફોર્બ્સની રિયલ ટાઈમ અબજોપતિઓની યાદી અનુસાર હાલ મુકેશ અંબાણી ગૌતમ અદાણીથી પાંચ સ્થાન ઉપર છે. એટલે કે 12માં નંબર પર રહેલા મુકેશ અંબાણીની કુલ સંપત્તિ 82.8 અબજ ડોલર છે. 

કોને થયું કેટલું નુકસાન 
ફોર્બ્સની યાદી અનુસાર અબજોપતિ ગૌતમ અદાણીને $1.2 બિલિયનનું નુકસાન થયું છે, જ્યારે મુકેશ અંબાણીની સંપત્તિમાં $264 મિલિયનનું નુકસાન થયું છે. તાજેતરના આંકડાઓની વાત કરીએ તો મુકેશ અંબાણીની સંપત્તિ ગૌતમ અદાણીની નેટવર્થ કરતાં $22 બિલિયન વધુ છે. 

ગૌતમ અદાણીને 13 દિવસમાં થયું 117 અબજ ડોલરનું નુકસાન 
જણાવી દઈએ કે ગૌતમ અદાણીએ વર્ષ 2022 દરમિયાન તમામ અમીરોને પાછળ છોડીને સારી કમાણી કરી હતી પણ 2023 દરમિયાન અને હિંડનબર્ગ રિપોર્ટ બાદ ગૌતમ અદાણીની સંપત્તિમાં ઝડપથી ઘટાડો થયો છે. માત્ર 13 દિવસમાં અદાણી ગ્રુપના માર્કેટ કેપમાં $117 બિલિયનનો ઘટાડો થયો છે.