ધોધમારની તૈયારી / BIG NEWS: ગુજરાતના 6 જિલ્લામાં રેડ અલર્ટ જાહેર, વરસાદની સ્થિતિ મામલે મંત્રી રાજેન્દ્ર ત્રિવેદીનું મોટું નિવેદન

• રાજ્યમાં ભારે વરસાદને લઈ અલર્ટ
• રાજેન્દ્ર ત્રિવેદીએ આપી માહિતી
• 6 જિલ્લામાં ભારે વરસાદ પડી શકે

રાજ્યમાં વરસાદી સિસ્ટમ સક્રિય થતા હવામાન વિભાગે વરસાદની આગાહી કરી છે. હવામાન વિભાગની આગાહી અનુસાર, રાજ્યમાં આગામી પાંચ દિવસ વરસાદી માહોલ રહેશે. ત્યારે ગુજરાતમાં વરસાદની સ્થિતિ મામલે મંત્રી રાજેન્દ્ર ત્રિવેદીએ નિવેદન આપતા કહ્યું છે કે સાબરકાંઠા, કચ્છ, બનાસકાંઠામાં આજે વરસાદ થયો છે, દક્ષિણ ગુજરાતના 6 જિલ્લામાં ભારે વરસાદની આગાહી છે. તો અતિભારે વરસાદ વાળા જિલ્લાઓમાં 23-24-25 તારીખના રોજ રેડ એલર્ટ અપાયું છે. કચ્છ, મહેસાણા, સાબરકાંઠા, અરવલ્લી, જામનગર, દ્વારકામાં સાંબેલાધાર વરસાદની આગાહી છે. રેડ અલર્ટ પરના વિસ્તારો પર સરકારની ચાંપતી નજર રાખી રહી હોવાની વાત પણ કરી હતી. 

આપત્તિ વ્યવસ્થાપન મંત્રી રાજેન્દ્ર ત્રિવેદીએ SEOC, ગાંધીનગર ખાતે મીડિયાને સંબોધતા કહ્યું હતું કે, રાજ્યમાં અનેક વિસ્તારોમાં હાલ ધીમી ધારે વરસાદ થઇ રહ્યો છે. હવામાન વિભાગની આગાહી મુજબ આગામી સમયમાં ભારે વરસાદ પડવાની સંભાવના ધરાવતા જિલ્લા પર મુખ્યમંત્રી ભૂપેન્દ્ર પટેલની સૂચના અનુસાર ચાંપતી નજર રાખવામાં આવી રહી છે. આ માટે મુખ્યમંત્રી દ્વારા સંબંધિત કલેક્ટરઓ અને વહીવટી તંત્રને સજ્જ રહેવા જણાવાયું છે.

મંત્રીએ કહ્યું હતું કે, આગામી તા.૨૨ અને ૨૩ જુલાઈ દરમિયાન સુરત, નવસારી, ડાંગ, વલસાડ અને તાપીમાં ભારે વરસાદની આગાહી છે. જ્યારે તા. ૨૩ અને ૨૪ જુલાઈ દરમિયાન કચ્છ, મહેસાણા, સાબરકાંઠા અને અરવલ્લીમાં તથા તા.૨૪-૨૫ જુલાઈના રોજ કચ્છ, જામનગર અને દેવભૂમિ દ્વારકા જિલ્લામાં ભારે વરસાદ થવાની સંભાવનાને કારણે રેડ એલર્ટ જાહેર કરાયું છે. આ સંભવિત પરિસ્થિતિમાં નાગરિકોને કોઈપણ પ્રકારની તકલીફ ન પડે તેમજ ઉદભવનારી તમામ પરિસ્થિતિને પહોંચી વળવા વહીવટી તંત્ર સંપૂર્ણ સજ્જ છે તેમ તેમણે ઉમેર્યું હતું.

'ઉકાઇ ડેમમાંથી વધુ પાણી નહીં છોડી શકાય'
મંત્રી ત્રિવેદીએ ઉકાઈ ડેમની વિગતો આપતા કહ્યું હતું કે, ઉપરવાસમાં પડેલા વધુ વરસાદના કારણે ઉકાઈ ડેમમાં પાણીની આવક વધતા ડેમમાંથી તબક્કાવાર બે લાખ કયુસેક જેટલું પાણી છોડાઈ રહ્યું છે પરંતુ આ પરિસ્થિતિમાં સુરતવાસીઓએ કોઈ ચિંતા કરવાની જરૂર નથી. ગુજરાતની જીવાદોરી સરદાર સરોવર ડેમમાં હાલ કુલ ૫૬ ટકા જળરાશીનો સંગ્રહ થયો છે જે સૌ ગુજરાતીઓ માટે આનંદની વાત છે. સૌરાષ્ટ્રમાં ખોડિયાર, હિરણ અને આંબાજળ ડેમ હાઈ એલર્ટ પર મુકવામાં આવ્યા છે તેમ તેમણે ઉમેર્યું હતું.

મંત્રીએ કહ્યું હતું કે, રાજ્યના વિવિધ વિસ્તારોમાં વધુ વરસાદના કારણે આશ્રય સ્થાનોમાં આશરો લઇ રહેલા તમામ નાગરીકો હાલની સ્થિતિએ સલામત રીતે પોતાના સ્વગૃહે પરત ફર્યા છે. રાજ્યમાં ૭૪,૨૩૨ નાગરિકોને કેશડોલ્સ ચુકવવામાં આવી છે, જ્યારે સર્વેની કામગીરી પૂર્ણતાને આરે છે. અત્યાર સુધીમાં NDRF, SDRF અને વહીવટી તંત્રના સહયોગથી ૧૫૬૬ નાગરિકોના રેસ્ક્યુ કરવામાં આવ્યા છે. તત્કાલીન મુખ્યમંત્રી અને વડાપ્રધાન નરેન્દ્ર મોદીએ ગુજરાતમાં સ્થાપેલી ઉત્તમ વીજળી વ્યવસ્થાના પરિણામે વરસાદની સ્થિતિમાં પણ તમામ ગામોમાં વીજ પુરવઠો ચાલુ છે. વરસાદમાં પાણી ભરાવાને કારણે અત્યાર સુધી કુલ 10ના મૃત્યુ થયા છે.

'4 નેશનલ હાઈવે બંધ'
હજુ પણ રાજ્યમાં કુલ 55 જેટલા બસોના રૂટ બંધ છે. તેમણે કહ્યું હતું કે, હાલ કચ્છ, ડાંગ, વલસાડ અને પંચમહાલમાં ૧-૧ નેશનલ હાઈવે પર અગવડના કારણે વાહન વ્યવહારની વૈકલ્પિક વ્યવસ્થા કરવામાં આવી છે. રાજ્યમાં કુલ ૧૪,૬૪૧ પૈકી માત્ર ૫૫ નાના રૂટ પર બસ વ્યવહાર બંધ છે તેમ મંત્રીશ્રીએ વિગતો આપતા ઉમેર્યું હતું.

ક્યાં અપાયું રેડ અલર્ટ?

• દક્ષિણ ગુજરાતનાં 6 જિલ્લામાં ભારે વરસાદની આગાહી 
• 23-24 તારીખે કેટલાક જિલ્લાઓમાં રેડ અલર્ટ 
• કચ્છ, મહેસાણા, સાબરકાંઠા અને અરવલ્લી રેડ અલર્ટ 
• 24-25 તારીખે કચ્છ, જામનગર, દ્વારકામાં રેડ અલર્ટ

કૃષિમંત્રી રાઘવજી પટેલે પાક નુકસાનીનો તાગ મેળવ્યો
ખેતીમાં વ્યાપક નુકસાનનો અહેવાલ મેળવવા કૃષિમંત્રી રાઘવજી પટેલે નર્મદા અને પંચમહાલ જિલ્લાની મુલાકાત કરી હતી અને ખેડૂતો સાથે સંવાદ કરી અને ખેતરોનું પણ નિરીક્ષણ કર્યું બાદમાં જિલ્લા વહીવટી તંત્ર સાથે બેઠક કરી જરૂરી નુક્સાનીનો અહેવાલ મેળવ્યો હતો. જોકે તેમણે  સર્વે મુજબ જે તે હક્કદાર ખેડૂતોને ડિજિટલ ઇન્ડિયાના માધ્યમથી તેમના ખાતામાં સહાય જમા થશે, જેમાં પ્રધાનમંત્રી કિશાન સહાય, રાજ્ય સરકાર દ્વારા વિવિધ યોજના હેઠળ સહાય આપવાની કૃષિ મંત્રી એ વાત કરી હતી પરંતુ કેટલા મળશે જેની જાહેરાત સર્વ બાદ કરવામાં આવશે તેવુ જણાવ્યું હતું.

રાજ્યમાં 24 કલાકમાં 183 તાલુકામાં વરસાદ
હવામાન વિભાગની આગાહીને પગલે છેલ્લા 24 કલાકમાં રાજ્યના 183 તાલુકામાં વરસાદ થયો છે. જેમાં સૌથી વધુ ખેડાના માતર તાલુકામાં 3.25 ઈંચ વરસાદ થયો છે. સાથે નડિયાદ અને વસોમાં 3-3 ઈંચ વરસાદ, જ્યારે પોસિના અને કપરાડામાં 2.75 ઈંચ વરસાદ થયો છે. ઉપરાંત મહેમદાવાદ અને ખેડામાં 2.25 ઈંચ, જ્યારે હાલોલ, વિજયનગર, કડાણા, મહુધા, ઈડર, ગોધરા, ખેડબ્રહ્મામાં અને ધરમપુરમાં 2-2 ઈંચ વરસાદ થયો છે.