કાર્યવાહી / આ 3 મોટી બેંકો સામે RBIએ લીધા મોટા પગલા, ફટકાર્યો લાખો રુપિયાનો દંડ, તમારી તો બેંક નથીને આમા?

• RBIએ 3 સહકારી બેંકોને ફટકાર્યો દંડ
• સુચિત નિર્દેશોનું પાલન ન કરવા બદલ દંડ
• કુલ 5 લાખનો ફટકાર્યો દંડ 

ભારતીય રિઝર્વ બેંક (આરબીઆઈ) એ ત્રણ સહકારી બેંકોને દંડ ફટકાર્યો છે. બે તમિલનાડુમાં અને એક જમ્મુ અને કાશ્મીરમાં એમ કરીને 3 બેંકને આરબીઆઈએ  કુલ 5 લાખ રૂપિયાનો દંડ ફટકાર્યો છે. આ દંડ નિયમનકારી પાલનના અભાવે લાદવામાં આવ્યો છે. કેન્દ્રીય બેંકે એક નિવેદનમાં જણાવ્યું હતું કે જમ્મુ અને કાશ્મીરની બારામુલા સેન્ટ્રલ કો-ઓપરેટિવ બેંક લિમિટેડને નવી થાપણો સ્વીકારવા પર પ્રતિબંધ મૂકવાના આરબીઆઈના નિર્દેશોનું ઉલ્લંઘન કરવા બદલ રૂ. 2 લાખનો દંડ ફટકારવામાં આવ્યો છે. આરબીઆઈએ કહ્યું કે તેણે ધ બિગ કાંચીપુરમ કો-ઓપરેટિવ ટાઉન બેંક લિમિટેડ (નં. 3) પર લોન નિયમો અને વૈધાનિક/અન્ય નિયંત્રણો હેઠળ જારી કરાયેલા નિર્દેશોનું પાલન ન કરવા બદલ રૂ. 2 લાખનો દંડ ફટકાર્યો છે.

નિયમોનું ઉલ્લંઘન કરવા બદલ દંડ 

અન્ય એક રિલીઝમાં, સેન્ટ્રલ બેંકે જણાવ્યું હતું કે તેણે આવકની ઓળખ, સંપત્તિ વર્ગીકરણ, જોગવાઈ અને અન્ય સંબંધિત બાબતોના સંદર્ભમાં અમુક નિર્દેશોનું પાલન ન કરવા બદલ ચેન્નાઈ સેન્ટ્રલ કો-ઓપરેટિવ બેંક પર રૂ. 1 લાખનો દંડ ફટકાર્યો છે.

આ સહકારી બેંકનું લાઇસન્સ રદ 

આ મહિનાની શરૂઆતમાં, આરબીઆઈએ મહારાષ્ટ્રની ઈન્ડિપેન્ડન્સ કો-ઓપરેટિવ બેંક લિમિટેડનું લાઇસન્સ રદ કર્યું હતું. સેન્ટ્રલ બેંકે કહ્યું કે, 3 ફેબ્રુઆરી 2022 પછી બેંક કોઈ પણ કામકાજ કરી શકશે નહીં. બેંકની આર્થિક સ્થિતિને જોતા રિઝર્વ બેંકે ગયા વર્ષે પણ નિયંત્રણો લાદ્યા હતા. તે નિર્ણયને કારણે ગ્રાહકો 6 મહિના સુધી પૈસા ઉપાડી શક્યા ન હતા. બેંકની ધંધાકીય પરિસ્થિતિમાં સુધારો ન થતાં હવે રિઝર્વ બેંકે લાયસન્સ રદ કરવાનો નિર્ણય લીધો છે.

પ્રતિબંધ 3 મહિના માટે લંબાયો

આ સિવાય આરબીઆઈએ આ મહિને અન્ય એક સહકારી બેંક પર મોટી કાર્યવાહી કરી અને પ્રતિબંધને 3 મહિના માટે લંબાવ્યો. સેન્ટ્રલ બેંકે કર્ણાટકના દેવાંગરે સ્થિત મિલાથ કો-ઓપરેટિવ બેંક પરના નિયંત્રણોને વધુ ત્રણ મહિના માટે 7 મે 2022 સુધી લંબાવ્યા છે. આરબીઆઈએ મે 2019માં પ્રથમ વખત આ સહકારી બેંક પર પ્રતિબંધ લગાવ્યો હતો.