ભારતીય રિઝર્વ બેંક (RBI) એ સોવરિન ગોલ્ડ બોન્ડ સ્કીમની બીજી શ્રેણીની જાહેરાત કરી છે. જાણો તમને સસ્તું સોનું ખરીદવાની તક ક્યારથી મળશે.
સસ્તામાં સોનું ખરીદવાની સૌથી સારી તક
RBIએ સોવરિન ગોલ્ડ બોન્ડ સ્કીમની કરી જાહેરાત
જાણો કઈ તારીખથી ખરીદી શકાશે સોનું
જો તમે બજાર કિંમત કરતા સસ્તું સોનું ખરીદવા ઈચ્છતા હોવ તો તમારા માટે સારા સમાચાર છે. ભારતીય રિઝર્વ બેંક (RBI) એ સોવરિન ગોલ્ડ બોન્ડ યોજનાની બીજી શ્રેણીની જાહેરાત કરી છે. આ સ્કીમ 22 ઓગસ્ટ 2022 થી 26 ઓગસ્ટ 2022 સુધી ખુલશે.
આરબીઆઈએ તેને સોવરિન ગોલ્ડ બોન્ડ સ્કીમ 2022-23ની શ્રેણી 2 હેઠળ લાવવાની જાહેરાત કરી છે. તેની પ્રથમ શ્રેણી 20 જૂનથી 23 જૂન, 2022 સુધી ખુલી હતી, જેમાં રોકાણકારોને સસ્તું સોનું લેવાની તક મળી હતી.
હજુ સ્કીમ માટે કિંમતનું નથી થયું એલાન
22 ઓગસ્ટ એટલે કે આવતા સોમવારથી શરૂ થતી આ સોવરિન ગોલ્ડ બોન્ડ સ્કીમની બીજી શ્રેણીની કિંમતો હજુ સુધી જાહેર કરવામાં આવી નથી. પ્રથમ શ્રેણીમાં ભારતીય રિઝર્વ બેંકે ઇશ્યૂની કિંમત 5091 રૂપિયા પ્રતિ ગ્રામ નક્કી કરી હતી. ઓનલાઈન ખરીદી પર, તમને પ્રતિ ગ્રામ 50 રૂપિયાનું વધારાનું ડિસ્કાઉન્ટ મળે છે. તેથી તેની કિંમત 5041 રૂપિયા પ્રતિ ગ્રામ થઈ ગઈ છે.
કેટલું અને કોણ કરી શકે છે રોકાણ
આ બોન્ડ માત્ર નિવાસી વ્યક્તિઓ, હિંદુ અવિભાજિત પરિવારો (HUF), ટ્રસ્ટો, યુનિવર્સિટીઓ અને ચેરિટેબલ સંસ્થાઓ દ્વારા જ ખરીદી શકાય છે. ઈન્ડીવિઝુઅલ રોકાણકારો એક વર્ષમાં વધુમાં વધુ 4 કિલો ગોલ્ડ બોન્ડ ખરીદી શકે છે. આ સિવાય ટ્રસ્ટ અથવા સંસ્થાઓ વર્ષમાં વધુમાં વધુ 20 કિલો બોન્ડ ખરીદી શકે છે.
ઓનલાઈન ખરીદી પર પ્રતિ ગ્રામ રૂ.50ની છૂટ
ડિજિટલ માધ્યમથી ગોલ્ડ બોન્ડ માટે અરજી કરતા અને ચૂકવણી કરતા રોકાણકારો માટે સબસ્ક્રિપ્શનની કિંમત પ્રતિ ગ્રામ રૂ. 50 ઓછી હશે. રોકાણકારોને નિશ્ચિત કિંમત પર વાર્ષિક 2.5 ટકા વ્યાજ આપવામાં આવશે.
સોવરિન ગોલ્ડ બોન્ડનો સમયગાળો આઠ વર્ષનો હશે અને ગ્રાહકોને પાંચમા વર્ષ પછી તેમાંથી બહાર નીકળવાનો વિકલ્પ મળશે. આ બોન્ડ્સનો મેચ્યોરિટી પીરિયડ 8 વર્ષ છે અને લોક-ઇન પીરિયડ 5 વર્ષનો છે, તેથી તેનું પ્રીમેચ્યોર રિડેમ્પશન 5 વર્ષ પછી અને સંપૂર્ણ રિડેમ્પશન 8 વર્ષ પછી થઈ શકે છે.
ક્યાંથી ખરીદી શકાય છે ગોલ્ડ બોન્ડ?
રોકાણકારો તેને સ્ટોક હોલ્ડિંગ કોર્પોરેશન ઓફ ઈન્ડિયા લિમિટેડ (SHCIL), પોસ્ટ ઓફિસ અને માન્ય સ્ટોક એક્સચેન્જ, NSE અને BSE દ્વારા ખરીદી શકે છે. જો કે, તમે આને સ્મોલ ફાઇનાન્સ બેંક અને પેમેન્ટ બેંકમાંથી ખરીદી શકતા નથી. ગોલ્ડ બોન્ડનું એક યુનિટ ખરીદો અને તેના મૂલ્ય જેટલી રકમ તમારા ડીમેટ ખાતા સાથે જોડાયેલા ખાતામાંથી કાપવામાં આવે છે.