પ.બંગાળ / ચૂંટણી પહેલા મમતા બેનર્જીને એક બાદ એક આંચકા, હવે પૂર્વ ક્રિકેટર લક્ષ્મી રતન શુક્લાએ મંત્રી પદથી આપ્યું રાજીનામું

• મમતા સરકારના મંત્રી લક્ષ્મી રતન શુક્લાનું રાજીનામું 
• હાવડાથી ધારાસભ્યની સાથે સાથે ખેલ મંત્રી હતા શુક્લા 
• આ પહેલા ટીમ ઈન્ડિયા તરફથી વનડે મેચ તથા આઇપીએલમાં પણ રમ્યા હતા 

મમતાબે ઝટકો 

પશ્ચિમ બંગાળમાં ચૂંટણી પહેલા મમતા બેનરજીને એક બાદ એક ઝટકા લાગી રહ્યા છે. પહેલા શુભેંદુ અધિકારીએ રાજીનામું આપ્યું અને હવે મમતા સરકારના મંત્રી લક્ષ્મી રતન શુક્લાએ રાજીનામું આપી દીધું છે. તેઓ મમતા સરકારમાં ખેલ મંત્રી હતા અને મંત્રીપદની સાથે સાથે તેમણે હાવડા જિલ્લાધ્યક્ષ પદ પણ છોડી દીધું છે. રાજીનામું આપ્યા બાદ હજુ તેઓ તૃણમૂલ કોંગ્રેસના ધારાસભ્ય છે. 

ખેલ મંત્રાલય પદ અને જિલ્લાધ્યક્ષ પદ પરથી રાજીનામું 

નોંધનીય છે કે લક્ષ્મી રતન શુક્લા ટીમ ઈન્ડિયા તરફથી ત્રણ વનડે રમી ચૂક્યા છે અને આઇપીએલમાં પણ તેઓ ત્રણ ત્રણ ટીમનો હિસ્સો રહ્યા. ખેલમાંથી રાજકારણમાં આવ્યા બાદ તેમણે મમતા બેનર્જીની પાર્ટીમાંથી ચૂંટણી લડી હતી અને હાવડાથી ધારાસભ્ય બની ગયા બાદ તેમને ખેલ મંત્રાલય આપવામાં આવ્યું હતું. 

રાજકારણ છોડવા માંગતા હોવાની અટકળો 

તેમના રાજીનામાંથી ફરીવાર બંગાળમાં રાજકારણ ગરમાયું છે અને રાજ્યમાં મમતા સરકાર પર ફરી સવાલો ઊભા કરવામાં આવી રહ્યા છે. જોકે સ્થાનિક અહેવાલો અનુસાર લક્ષ્મી રતન શુક્લા રાજીનામું આપીને રાજકારણ જ છોડવા માંગે છે, જોકે તેમણે આ મુદ્દા પર હજુ સુધી કોઇ જ જાણકારી આપી નથી અને તેમના રાજીનામાં પાછળનું કારણ અકબંધ છે. 

આ વખતે ભાજપ દીદીને આપી રહ્યું છે ટક્કર 

નોંધનીય છે કે એપ્રિલ કે મે મહિનામાં બંગાળમાં ચૂંટણી થવાની છે અને આ ચૂંટણી પહેલા શુકલાના રાજીનામાંને મોટો ઝટકો માનવામાં આવી રહ્યો છે. મમતા સરકારનું ટેન્શન પહેલાથી જ વધેલું છે ત્યાં પહેલા અધિકારી અને હવે શુક્લાએ જોરદાર ઝટકો આપ્યો છે. આ પહેલા જ ઘણા બધા ધારાસભ્ય અને સમર્થકોએ પાર્ટી છોડી દીધી છે. નોંધનીય છે કે પ. બંગાળમાં આ વખતે ભારતીય જનતા પાર્ટી ખૂબ આક્રમક રીતે પ્રચાર કરી રહી છે અને વિધાનસભામાં સરકાર બનાવવા માટે મોટા મોટા નેતાઓ વારંવાર બંગાળનો પ્રવાસ કરી રહ્યા છે ત્યારે શુકલાના રાજીનામાંથી મમતા બેનર્જીની ચિંતામાં વધારો થયો છે.