ભારત-ઓસ્ટ્રેલિયા મેચ / T20 સેમિફાઈનલ પહેલા ભારતીય મહિલા ટીમને ઝટકો, ઓલરાઉન્ડર થઈ આઉટ, કેપ્ટન પણ બીમાર

• આજે ભારત અને ઓસ્ટ્રેલિયા મહિલા ટીમ વચ્ચે ટી20 સેમિફાઈનલ મુકાબલો
• ટીમ ઈન્ડીયાની સ્ટાર બેટર પૂજા વસ્ત્રાકર મેચ પહેલા થઈ બહાર
• શ્વાસની તકલીફને કારણે પૂજાને ટીમ ઈન્ડીયામાંથી આરામ અપાયો 
• પૂજાને બદલે સ્નેહ રાણા સેમિફાઈનલમાં રમશે 

મહિલા ટી-20 વર્લ્ડ કપ 2023ની સેમીફાઈનલ પહેલા ભારતીય ટીમ માટે એક ખરાબ સમાચાર સામે આવ્યા છે. ટુર્નામેન્ટમાંથી બહાર થઈ ગયેલી ઓલરાઉન્ડર પૂજા વસ્ત્રાકરના રૂપમાં ટીમ ઈન્ડિયાને મોટો ઝટકો લાગ્યો છે. પૂજા વસ્ત્રાકર સાઉથ આફ્રિકામાં ચાલી રહેલા ટી-20 વર્લ્ડ કપ 2023માં અપર રેસ્પિરેટરી ટ્રેક્ટ ઈન્ફેક્શનના કારણે બહાર થઈ ગઈ છે. 

પૂજા વસ્ત્રાકરને બદલે સ્નેહ રાણાને ટીમમાં લેવાઈ 
ટી-20 આંતરરાષ્ટ્રીય મેચ સહિત કુલ 47 આંતરરાષ્ટ્રીય મેચ રમી ચૂકેલા સ્નેહ રાણાને ભારતીય ટીમમાં સામેલ કરાઈ છે. ભારતીય ટીમ મેનેજમેન્ટે રિપ્લેસમેન્ટની માગ કરી છે, જેની પુષ્ટિ ખુદ આંતરરાષ્ટ્રીય ક્રિકેટ કાઉન્સીલે (આઇસીસી) કરી છે.

કેપ્ટન હરમનપ્રીત કૌર પણ બીમાર 
ભારતીય મહિલા ક્રિકેટ ટીમની કેપ્ટન હરમનપ્રીત કૌર પણ બીમાર હોવાનું કહેવાય છે. બુધવારે સાંજે હરમનપ્રીત કૌર અને પૂજા વસ્ત્રાકરને હોસ્પિટલમાંથી રજા આપવામાં આવી હતી. જો કેપ્ટન હરમનપ્રીત કૌર મેચ અગાઉ અનફિટ રહશે તો સ્મૃતિ મંધાના કેપ્ટનશીપ કરતી જોવા મળશે. 

ભારતીય ટીમ ઓસ્ટ્રેલિયા સામે ટકરાશે

આઈસીસી મહિલા વિશ્વ કપ 2023ની પ્રથમ સેમીફાઈનલ મેચ આજે રમાશે, જેમાં ભારતીય ટીમ ઓસ્ટ્રેલિયા સામે ટકરાશે. આ સેમીફાઈનલ મેચ દક્ષિણ આફ્રિકાના કેપટાઉનમાં રમાશે. આ મેચમાં ભારતીય ટીમની શાખ દાવ પર લાગી છે. જો મેચમાં ભારત જીતશે તો વર્લ્ડ કપની ફાઈનલમાં આવશે અને હારશે તો વર્લ્ડ કપમાંથી બહાર થઈ જશે. 

ભારત જીતશે તો ચમત્કાર જ ગણાશે 
ભારતીય ટીમ માટે ઓસ્ટ્રેલિયા સામેનો આ સેમીફાઈનલ મુકાબલો આસાન નથી રહેવાનો, કારણ કે ભારતીય મહિલા ટીમનો ઓસ્ટ્રેલિયન ટીમ સામે ટી-20નો રેકોર્ડ અત્યંત કંગાળ છે અને જો ભારત જીતશે તો મોટો ચમત્કાર જ ગણાશે.