રાજકોટ દક્ષિણ બેઠક પર ભાજપ તરફથી રમેશ ટીલાળા અને કોંગ્રેસ તરફથી હિતેશ વોરા મેદાનમાં છે. બંને ઉમેદવારોએ ટિકિટ મળતાની સાથે જ પ્રચાર ઝુંબેશ તેજ કરી દીધી છે.
રાજકોટ પર ચડયો રાજકારણનો રંગ
પ્રચાર ઝુંબેશ બની તેજ
ભાજપ કોંગ્રેસનો પ્રચંડ પ્રચાર
રાજકોટ દક્ષિણ બેઠક પર ભાજપ તરફથી રમેશ ટીલાળા અને કોંગ્રેસ તરફથી હિતેશ વોરા મેદાનમાં છે. આ બેઠક રાષ્ટ્રીય સ્વયં સેવક સંઘ અને ભારતીય જનતા પાર્ટીની ભાષામાં ભાજપ માટે ગુજરાતની સુરક્ષિત બેઠક તરીકે ઓળખાવામાં આવે છે. વર્ષ 1995થી આ બેઠક ભાજપના કબજામાં છે. છેલ્લી ત્રણ ટર્મથી અહીંથી ભાજપના ગોશવદ પટેલ ચૂંટાતા હતા. આ વખતે ભાજપએ ગોવિંદ પટેલ ને વિરામ આપી રમેશ ટીલાળાને ટિકિટ આપી છે. જો કે ગોવિંદ પટેલનું કહેવું છે કે રમેશ ટિલાળાની સાથે રહી તેઓ તેમને જીતાડશે.
કોંગ્રેસ-ભાજપ વચ્ચે કાંટાની ટક્કર
આ તરફ કોંગ્રેસના ઉમેદવાર હિતેશ વોરા ભાજપ ઉમેદાવાર રમેશ ટિલાળાના એક જ ગામના અને એક જ સમાજમાંથી આવતા હોવાથી હિતેશ વોરા રમેશ ટિલાળાને કાકા કહે છે. તો આમ આદમી પાર્ટીના ઉમેદવાર શિવલાલ બારસિયા હિતેશ વોરાના મામાના ગામના હોવાથી તેઓ શિવલાલને મામા કહે છે. સંબંધોની આ આટીઘુંટીને લઈને પણ આ જંગ રસપ્રદ બન્યો છે. આ વખતની ગુજરાત વિધાનસભાની ચૂંટણીમાં ભાજપ અને કોંગ્રેસ વચ્ચે ખરાખરીનો જંગ જામ્યો છે. એક-એક બેઠક જીતવી બંને માટે મહત્વની બની રહેવાની છે, તે જોતાં કોંગ્રેસ-ભાજપ વચ્ચે કાંટાની ટક્કર થશે તે નક્કી છે.
1995 થી અત્યાર સુધી ભાજપ જ વિજેતા
રાજકોટ દક્ષિણની આ બેઠક ભાજપ માટે ખૂબ જ મહત્વની બેઠક રહી છે. દેશમાં જનસંઘની સ્થાપના થઇ ત્યારબાદ ગુજરાતમાં એક માત્ર આ બેઠક પર ચીમનલાલ શુક્કલએ જીત મેળવી હતી. ભારતીય જનતા પાર્ટીનો જન્મ જનસંઘમાંથી થયો છે. જનસંઘના ખાતામાં ગયેલી આ સીટ બાદ ભારતીય જનતા પાર્ટીનો દબદબો રહ્યો છે, છેલ્લે 1990માં કોંગ્રેસ નેતા અને રાજ્યના પૂર્વ નાણામંત્રી મનોહરસિંહ જાડેજા ચુંટાયા હતા, જે બાદ 1995 થી અત્યાર સુધી આ બેઠક પર ભાજપ વિજેતા થયું આવ્યું છે.
જ્ઞાતિગત સમિકરણ પર નજર
રાજકોટના હાર્દ સમાન ગણાતા રાજકોટ દક્ષિણના આ વિસ્તારની નવી સિમારેખામાં ભૂપેદ્ર રોડ, આશાપુરા મંદિર, લક્ષ્મીવાડી હવેલી જેવા વિસ્તારોની સમાવેશ થાય છે, આ વિસ્તારની આજુબાજુના અનેક ઇમિટેશન જ્વેલરી મેન્યુંફેકચરિંગ યુનિટો આવેલા છે, જે એશિયાનું સૌથી મોટું જ્વેલરી હબ માનવામાં આવે છે. રાજકોટ દક્ષિણ વિધાનસભા બેઠક પર કુલ મતદારો 253374 છે, જેમાંથી 98494 પુરૂષો અને 80622 મહિલા મતદાતાઓ છે. રાજકોટ દક્ષિણ બેઠક પર જ્ઞાતિગત સમિકરણ પર નજર કરીએ તો, અહી લેઉવા પટેલ અને કોળી પટેલ મતદારોનો દબદબો છે. ત્યારબાદ બ્રાહ્મણ, ભરવાડ, કડિયા અને રાજપુત મતદાતાઓનો નંબર આવે છે. આ વિસ્તારમાં લગભગ 30 ટકા જેટલા લેઉઆ પટેલ મતદારોનો દબદબો રહ્યો છે.
રાજકોટ દક્ષિણ વિધાનસભા બેઠકની સમસ્યાઓ
રાજકોટ શહેરના અન્ય વિસ્તારોની જેમ આ વિસ્તારમાં પણ પાણીનો પ્રશ્ન વર્ષોથી લોકોને પરેશાન કરી રહ્યો છે. આ ઉપરાંત ભૂગર્ભ ગટરો, ટાઉન પ્લાનિંગ, ટ્રાફિકની સમસ્યા, ઉપરાંત વેપારીઓને મૂંઝવતા પ્રશ્નો જેવા મુદ્દાઓ હંમેશા ઉભરાતા આવ્યા છે. જો કે હાલમાં ભાજપ અને કોંગ્રેસ અહીં ઝંઝાવાતી પ્રચાર કરી રહ્યા છે. ત્યારે જનતા કોને જીતનો તાજ પહેરાવે છે તે જોવું રહ્યું.