રોકાણ / આ શખ્સે ટાટા મોટર્સના 4 કરોડ શેર ખરીદ્યા, એક શૅરનો ભાવ છે 126 રૂપિયા

નાણાંકીય વર્ષ 2020-21ના જુલાઈથી સપ્ટેમ્બરના બીજા ક્વાર્ટરની વચ્ચે રાકેશ ઝુનઝુનવાલાએ ટાટા મોટર્સમાં મોટું રોકાણ કર્યું છે. 15 ઓક્ટોબરે બોમ્બે સ્ટોક એક્સચેંજ (BSE) પર ફાઇલિંગમાં ટાટા મોટર્સે જણાવ્યું હતું કે 30 સપ્ટેમ્બરના રોજ પૂરા થયેલા બીજા ક્વાર્ટરમાં રાકેશ ઝુનઝુનવાલાએ કંપનીના 4 કરોડ શેર ખરીદ્યા છે.

આ સમાચાર પછી ટાટા મોટર્સના શેરમાં ગુરુવારે બપોરે 12:30 વાગ્યે 1.49 ટકાનો ઉછાળો જોવા મળ્યો હતો. પરંતુ કારોબારના અંતે, ટાટા મોટર્સના શેર 3 ટકાથી વધુ ઘટીને 126.55 રૂપિયાની સપાટીએ બંધ રહ્યા હતા.

ટાટા મોટર્સ દ્વારા બીજા ક્વાર્ટરમાં વધુ સારા પરિણામો લાવવાની ધારણા છે. ટાટા મોટર્સના નાણાકીય વર્ષ 2020-21ના ​​બીજા ક્વાર્ટરના પરિણામો 27 ઓક્ટોબરના રોજ જાહેર થઈ શકે છે. આ દિવસે કંપનીની બોર્ડ મીટિંગ યોજાનાર છે.

તમને જણાવી દઈએ કે બીજા ક્વાર્ટરમાં ટાટા વાહનોના વેચાણમાં 5 ટકાનો વધારો થયો છે. ટાટા મોટર્સે બીજા ક્વાર્ટરમાં 1.14 લાખ વાહનોનું વેચાણ કર્યું છે. કોરોના સંકટની વચ્ચે ટાટાના વાહનોએ વેચાણમાં જોર પકડ્યું છે. ઇલેક્ટ્રિક સેગમેન્ટમાં નેક્સોનની સારી એવી માંગ છે.

આ ઉપરાંત રાકેશ ઝુનઝુનવાલાએ લ્યુપિન ફાર્મામાં પોતાનું રોકાણ વધાર્યું છે. તેમણે લ્યુપિનમાં તેમની હોલ્ડિંગમાં 0.6 ટકાનો વધારો કર્યો છે અને તેમની કુલ હોલ્ડિંગ 1.53 ટકા થઈ ગઈ છે. તેની પાસે 721.6 કરોડ રૂપિયાની કિંમતના કંપનીના કુલ 69,45,605 શેર છે.