માણસ અને માનવતાનું મોત / રાજકોટ: ઍમ્બ્યુલન્સ દર્દીને લઈ પહોંચી તો ગઈ પરંતુ 2 કલાક સુધી સારવાર ન મળતાં થયું મોત

• રાજકોટમાં કોરોના સામે લાચારીની હદ
• એમ્બ્યુલન્સમાં સવાર દર્દી 2 કલાક સુધી રાહ જોતા રહ્યા
• 2 કલાક પછી પણ વારો ન આવતા દર્દીએ તોડી દીધો દમ

મેડિકલ સુવિધાને લઈને વારંવાર ફોટા પડાવતા નેતાઓ. હવે જરા રાજકોટની આ સ્થિતિને પણ જોઈ લો. બે કલાક સુધી એક દર્દી ઓક્સિજન માસ્ક સાથે પોતાના વારાની રાહ જોઈ રહ્યો હતો. આ વૃદ્ધ દર્દી 2 કલાક સુધી એમ્બ્યુલન્સમાં ભર ઉનાળે જીવન મરણના જોલા ખાતો રહ્યો હતો. પરંતુ વ્યવસ્થા તંત્રનો કોઈ વ્યક્તિ તેમના સુધી પહોંચ્યું નહીં. અને અંતે તેમણે એમ્બ્યુલન્સમાં જ જીવ ગુમાવ્યો હતો.  

રાજકોટમાં કોવિડ હોસ્પિટલ બહાર માનવતાને લજવતી એક કરૂણ ઘટના બની છે. અહીં વૃદ્ધ દર્દીને કોવિડ કેર સેન્ટરમાં બે કલાક સુધી સારવાર માટે લઇ જવામાં ન આવ્યા અને અંતમાં એમ્બ્યુલન્સમાં જ દમ તોડી દીધો. એમ્બ્યુલન્સના ડ્રાઇવરે વૃદ્ધ દર્દીને બચાવવા માટે છાતી પર પમ્પિંગ પણ કર્યું હતું. છતાં તેઓ બચી શક્યા નહોતા. આ આખી ઘટનાનો વીડિયો સોશિયલ મીડિયામાં વાયરલ થયો છે. જોકે અહીં ન માત્ર એક વ્યક્તિ પરંતુ અન્ય કેટલાક કોરોનાના દર્દીઓ બે કલાકથી એમ્બ્યુલન્સમાં બેસી પોતાના વખતની રાહ જોતા રહ્યા હતા.

બીજી તરફ સિવિલ હોસ્પિટલ બહાર પણ ડરાવતી તસવીરો જોવા મળી. કારણ કે, અહીં પણ હોસ્પિટલ બહાર એમ્બ્યુલન્સોની કતારો લાગી હતી. એક પછી એક એમ્બ્યુલન્સ દર્દીઓને લઈને સિવિલમાં આવી રહી છે. હોસ્પિટલ પણ ફૂલ થવા માંડી છે. તેવામાં અનેક દર્દીઓને એમ્બ્યુલન્સમાં જ સારવાર આપવાની જરૂર પડી રહી છે. આ પ્રકારના વારંવાર દૃશ્યો આવતા અનેક સવાલો પણ ઉઠી રહ્યા છે.

શું રાજકોટની હોસ્પિટલોમાં હવે દર્દીઓ માટે જગ્યા નથી રહી? શું રાજકોટની તમામ કોવિડ- હોસ્પિટલો ફૂલ થઈ ગઈ છે? કેમ 2-2 કલાક સુધી લોકોને બેડ નથી મળતા? એમ્બ્યુલન્સમાં પણ કેમ દર્દીઓને યોગ્ય સારવાર નથી મળતી? શું કોઈ દર્દી સારવાર વગર જ દમ તોડે તેવી છે. આપણી મેડિકલ વ્યવસ્થા? આ સવાલો લોકો પ્રત્યે સંવેદનશિલ હોવાના બણગા ફેકતી સરકાર અને આરોગ્ય વિભાગ સામે ઉઠી રહ્યા છે. ત્યારે આશા રાખીએ કે, આ વીડિયો સામે આવ્યા બાદ વ્યવસ્થાઓ સુધરશે. જેથી કરીને કોઈ લોકોને જીવ ન ગુમાવવો પડે.