રાજકોટમાં 100 કરોડની સરકારી જમીન પર દબાણ મુદ્દે નોટિસ
7 દિવસમાં જમીનનો કબ્જો સોંપવા મામલતદારની નોટિસ
રાજકોટના રામપરાની સરકારી જમીન પર વર્ષોથી ખાનગી કબ્જો છે. જેને લઇને સરકારી તંત્ર સફાળું જાગ્યું છે. રાજકોટના મામલતદારે જમીનના કબ્જાને લઇને નોટિસ જાહેર કરી છે. જેમાં 7 દિવસમાં જમીનનો કબ્જો સોંપવા આદેશ આપવામાં આવ્યો છે. ઉલ્લેખનીય છે કે, રાજકોટમાં 100 કરોડની જમીનમાં ખાનગી વ્યક્તિ દ્વારા દબાણ કરવામાં આવ્યું છે. જેમાં મોટામવામાં 5 એકર અને નાકરાવાડીમાં 4 એકર જમીન સામેલ છે. 7 દિવસમાં જમીનનો કબ્જો નહીં સોંપનારા પર કાયદેસરની કાર્યવાહીનો પણ નોટિસમાં ઉલ્લેખ કરવામાં આવ્યો છે.
અગાઉ જિલ્લા કલેક્ટર દ્વારા સર્વે કરાવવામાં આવ્યો હતો
ઉલ્લેખનીય છે કે, રાજકોટ શહેર જિલ્લામાં સરકારી અને ગૌચરની જમીનો ઉપર થયેલા દબાણોનો અગાઉ જિલ્લા કલેક્ટર અરુણ મહેશ બાબુ દ્વારા સર્વે કરાવવામાં આવ્યો હતો. જ્યાર બાદ રાજકોટ તાલુકામાં મોટામવા, નાકરાવાડી અને રામપર સૂર્યામાં 50-100 વાર નહીં પણ પાંચ-પાંચ એકર સરકારી જમીન ઉપર દબાણો થયાનું ખુલતા વહીવટી તંત્ર ચોંકી ઉઠ્યું છે. સરકારી જમીનો પરના આ દબાણોને હટાવવા માટે તંત્ર દ્વારા તખ્તો ઘડી કાઢવામાં આવ્યો છે.
રાજકોટ તાલુકાના મોટામવા ગામની સર્વે નં. 180 પૈકીની રોડ ટચ પાંચ એકર 20 ગુંઠા સરકારી જમીન ઉપર કંકુબેન હરજીભાઈ પરમાર નામના આસામીએ કબજો જમાવી દબાણ કરતા આ આસામીને રાજકોટ તાલુકા મામલતદાર કથીરિયાએ 202ની નોટીસ ફટકારી સાત દિવસમાં આ દબાણ હટાવવા માટે તાકીદ કરી છે. મોટામવાની આ જમીનની કિંમત 50 કરોડ જેટલી થતી હોવાનું જાણવા મળી રહ્યું છે.
આસામીઓને મામલતદાર દ્વારા સાત દિવસની નોટીસ ફટકારાઇ
એ જ રીતે નાકરાવાડીમાં પણ સરકારી એકર જમીન ઉપર ગોમીબેન નામના આસામીએ ખેતી વિષયક દબાણ કરી પોતાનો કબજો જમાવી દીધો છે. નાકરાવાડીમાં જીવાભાઈ ગોવિંદ નામના અન્ય એક આસામીએ પણ સરકારી જમીન ઉપર ખેતી વિષયક દબાણ કરીને આ જમીનને હડપ કરી લીધી છે. જ્યારે રામપરા સૂર્યા ગામમાં પણ સર્વે નં. 84 પૈકીની 2 એકર સરકારી જમીન પર પ્રકાશચંદ્ર પરમાર નામના આસામીએ દબાણ કરીને કબજો જમાવી દીધો હોવાનું જાણવા મળી રહ્યું છે. આથી આ આસામીઓને તાલુકા મામલતદાર દ્વારા સાત દિવસની નોટીસ ફટકારવામાં આવી છે. પરંતુ જો આસામીઓ સાત દિવસમાં આ સરકારી જમીનનું દબાણ દૂર કરીને તેનો કબજો વહીવટી તંત્રને નહીં સોંપે તો દબાણો દૂર કરવા માટેની કાર્યવાહી હાથ ધરવામાં આવશે.
