રાજકોટ શહેરના બજરંગ વાડી પોલીસ ચોકીથી થોડે દૂર એક અજાણ્યા શખ્સની હત્યા થયાની શંકા દર્શાવતી લાશ મળી આવી હતી. જે હત્યા બીજા કોઈએ નહીં પરંતુ મૃતકના મિત્ર અને તેની પત્નીના પ્રેમીએ કરી હોવાનું સામે આવ્યું છે.
રાજકોટમાં ખેલાયો ખૂની ખેલ
પત્નીના પ્રેમીએ પતિનું ઢાળી દીધું ઢીમ
પતિ અને પત્ની વચ્ચે હતો 20 વર્ષનો તફાવત
રાજકોટમાં આડા સબંધોનો કિસ્સો સામે આવ્યો છે. જર જમીન અને જોરૃ ત્રણેય કજિયાનાં છોરુ એ કહેવત દાયકાઓથી આપણે ત્યાં કહેવાતી આવી છે. જે કહેવત હજારો વખત સાચી પણ પડી છે. રાજકોટ શહેરમાં જામનગર રોડ ઉપર આવેલા બજરંગ વાડી પોલીસ ચોકીથી થોડે દૂર રેલવે પાટાની આસપાસના અવાવરું જગ્યામાં ૪ મેના રોજ એક અજાણી વ્યક્તિની લાશ પડી હોવાની બાતમી ગાંધીગ્રામ પોલીસને મળી હતી. જે બાબતની જાણ થતા ગાંધીગ્રામ પોલીસ તેમજ ક્રાઇમ બ્રાન્ચની ટીમ ઘટના સ્થળે પહોંચી હતી.
પતિ પત્નીની ઉમરમાં 20 વર્ષનો તફાવત સામે આવતા તે દિશામાં તપાસ શરૂ કરી હતી.
ઘટના સ્થળ પર પહોંચીને પોલીસે કાર્યવાહી કરી લાશને ફોરેન્સિક પોસ્ટમોર્ટમ અર્થે ખસેડી હતી. પીએમ રિપોર્ટમાં મૃતકના માથાના ભાગે બોથડ પદાર્થ વડે ઘા ઝીંકવામાં આવતા ફ્રેક્ચર થયા હોવાનું સામે આવ્યું હતું. જેથી પોલીસની હત્યાની શંકા સાચી સાબિત થતાં પોલીસે તપાસ શરૂ કરી હતી. બીજી તરફ મૃતકની પત્નીએ પણ ફિલ્મની ક્રાઇમ સ્ટોરીની જેમ પોતાના પ્લાન મુજબ ફિલમી સ્ટોરી ઊભી કરીને પોલીસને ગેર માર્ગે દોરવાનું શરૂ કર્યું હતું જેમાં મૃતકના પત્ની સંગીતાબહેને પોલીસને જણાવ્યું હતું કે, સાગર દરજી નામના વ્યક્તિ સાથે તેના લગ્ન દસ વર્ષ પહેલા થયા હતા. લગ્ન જીવન દરમિયાન તેમને સંતાનમાં એક કાવ્યા નામની પુત્રી અને જય નામનો પુત્ર છે. હાલ તેની ઉંમર 35 છે. જ્યારે તેના પતિની ઉંમર 55 વર્ષ છે. આમ પતિ પત્ની વચ્ચે ઉંમરમાં 20 વર્ષનો તફાવત હોવાનું સામે આવ્યુ હતુ.
પોલીસને ગેરમાર્ગે દોરવા સંગીતા અને પ્રેમી સંજયે પ્લાન બનાવ્યો હતો.
સંગીતાએ પોલીસને જણાવ્યું હતું કે ગત ત્રીજી મેના રોજ ઘરમાં રાંધણ ગેસનો બાટલો ખૂટી ગયો હોવાથી હું મારા પતિ બે સંતાનો અમે ચારેય રિક્ષામાં બેસીને રામાપીર ચોકડી સુધી પહોંચ્યા હતા. રામાપીર ચોકડીથી ગારીયાધારમાં રહેતી મારી બહેન દીપિકાના ઘરે હું મારા બે સંતાનોને લઈ પહોંચી હતી. બીજી તરફ પતિને પોતાના મોબાઈલમાં રીચાર્જ કરાવવાનું હોવાથી તે અમારાથી અલગ પડયા હતા. રિચાર્જ કરાવ્યા બાદ તેઓ પણ મારા બહેનની ઘરે આવવાના હતા પરંતુ મોડે સુધી તેઓ આવતા મારા પતિ ઘરે જતા રહ્યા હશે તેમ સમજીને હું મારા બંને બાળકો સાથે બહેનના ઘરે જ રોકાઈ ગઈ હતી. બહેનના ઘરે બે દિવસ રોકાયા બાદ ત્રીજે દિવસે હું મારા ઘરે ગઈ હતી. ઘરે પહોંચતાં મકાન બંધ હોય અને પતિ પણ જોવા ન મળતાં મેં ગાંધીગ્રામ પોલીસમાં ગુમ થયાની જાણ કરી હતી. જે દરમિયાન ૪ મેના રોજ IOC ના ડેપો પાસે પ્રૌઢની લાશ મળી આવી હતી. જે મારા જ પતિની હોવાની જાણ થઈ હતી.
પોલીસને પહેલેથી જ મૃતકની પત્ની સંગીતાની ભૂમિકા શંકાસ્પદ લાગી હતી.
પોલીસને પહેલેથી જ પત્ની સંગીતાની ભૂમિકા શંકાસ્પદ લાગી રહી હતી. પોલીસે પતિ પત્ની ઉંમરનો તફાવત જોયા બાદ મૃતક અને તેની પત્નીના સંબંધો પર તપાસ કેન્દ્રિત કરી હતી. આ સમયે પોલીસને સચોટ બાતમી મળી હતી કે, સંગીતા અને તેના પતિના મિત્ર સંજય ઉર્ફે છોટીઓ ઉર્ફે બિહારી પાસ્વાન સાથે પાંચ વર્ષથી પ્રેમસંબંધ છે. ક્રાઈમ બ્રાન્ચને મળેલ બાતમીના આધારે પોલીસ ઇન્સ્પેક્ટર ગઢવી અને પી.એસ.આઇ યુ.બી.જોગરાણાની ટીમ દ્વારા સંજય બિહારીને ઉઠાવી લેવામાં આવ્યો હતો. સંજય બિહારીની આગવી ઢબે સરભરા કરવામાં આવતા વટાણા વેરી નાખ્યા હતા. સંજય પોલીસને જણાવ્યું હતું કે તે સંગીતા સાથે પાંચ વર્ષથી પ્રેમ સંબંધમાં હોય જેથી પ્રેમ સંબંધમાં પોતાનો મિત્ર સાગર આડખીલીરૂપ બનતો હોવાથી તેને પતાવી દેવાનો કારસો ધડવામાં આવ્યો હતો અને પ્લાન મુજબ બંને સાથે દારૂ પીવા બેઠા હતા. ત્યાર બાદ સંજય દારૂ પીવડાવી મિત્ર સાગરને નસાની હાલતમાં બજરંગ વાળી પોલીસ ચોંકી પાસે આવેલી આવાવરું જગ્યામાં લઈ જેઈને માથાના ભાગે તેમજ ગુપ્ત ભાગે બોથડ પદાર્થઓ વડે માર મારી મોતને ઘાટ ઉતારી દીધો હતો.