રાજ્યમાં છેલ્લા કેટલાક દિવસથી મેધરાજા મનમુકીને વરસી રહ્યા છે. જ્યારે છોટાઉદેપુરમાં ભારે વરસાદને કારણે હેરણ નદી બે કાંઠે વહેતી થઈ છે. ભારે વરસાદને કારે નદીમાં પુર આવતા આસપાસીના ગામો પાણીમાં ગરકાવ થયા છે. તો હવામાન વિભાગ દ્વારા ભારે વરસાદવી આગાહી કરવામાં આવી છે.
છોટાઉદેપુરમાં સતત એક સપ્તાહથી વરસાદની હેલી યથાવત છે. અનેક ગામોમાં પાણી ઘુસી જતા જન જીવન ખોરવાયું છે. કવાંટ તાલુકામાં અને ઉપરવાસમાં ભારે વરસાદને કારણે પાણીની આવકમાં વધારો થઈ રહ્યો છે. તો ભારે વરસાદને કારણે નીચાણવાળા વિસ્તારોમાં પાણી ભરાતા લોકોને ભારે હાલાકીનો સામનો કરવાનો વારો આવ્યો છે.
જ્યારે બંગાળની ખાડીમાં લો પ્રેશર સર્જાતા વરસાદ પડવાની શક્યતાઓ સેવાઈ રહી છે. હવામાન વિભાગ અનુસાર સૌરાષ્ટ્રના કેટલાક જિલ્લાઓમાં વરસાદ પડી શકે છે. તો નર્મદા, બનાસકાંઠા, પાટણ અને અમદાવાદમાં પણ વરસાદ પડી શકે છે. જ્યારે ગાંધીનગર, મહેસાણા, આણંદ અને વડોદરામાં પણ વરસાદ પડવાની શક્યતા છે. હવામાન વિભાગે દક્ષિણ ગુજરાતમાં પણ વરસાદ પડશે તેવી આગાહી કરી છે. તો આગામી 5 દિવસ માછીમારોને દરિયો ન ખેડવા સૂચન કરાયુ છે.
આપને જણાવી દઇએ કે, રાજ્યમાં છેલ્લા કેટલાક દિવસોમાં ધોધમાર વરસાદ વરસ્યો છે. વિશ્વામિત્રી નદીએ પણ રોદ્ર ધારણ કરી વડોદરા શહેરને ઘમરોળ્યું હતું. જ્યારે રાજકોટ, સુરત, ભરૂચ, નવસારી અને વલસાડ સહિત લગભગ તમામ દક્ષિણ ગુજરાતમાં ભારે વરસાદ થયો છે. જોકે છેલ્લા બે દિવસથી વરસાદનું જોર ઘટ્યું હતું. પરંતુ તાજેતરમાં હવામાન વિભાગે રાજ્યમાં ભારે વરસાદની આગાહી કરી છે. (ઘટનાને દર્શાવવા માટે File Photo લેવામાં આવ્યો છે.)