ચોમાસું / વડોદરા-સુરતમાં વરસાદી માહોલ યથાવત, ઓગસ્ટમાં 10 વર્ષનો રેકોર્ડ તૂટ્યો

વડોદરામાં વિરામ બાદ ફરી વરસાદ શરુ:

વડોદરામાં વિરામ બાદ ફરી એકવાર મેઘરાજા મનમુકીને વરસી રહ્યાં છે. છેલ્લા 24 કલાકમાં 2.5 ઈંચ વરસાદ નોધાયો છે. વડોદરા જીલ્લમાં અને હાલોલના જંગલમાં પડેલા ભારે વરસાદના કારણે આજવા સરોવર ફરીવાર ઓવર ફ્લો થયુ છે જેના કારણે વિશ્વામિત્રી નદીના લેવલમાં ત્રણ કલાકમાં 1 ફુટનો વધારો થયો છે. આજવા ડેમની સપાટી 212.40 ફૂટે પહોચીં છે. વિશ્વામિત્રી નદીની સપાટીમાં પણ વધારો થતા 14.75 ફૂટ પહોંચી છે. વડોદરા પાલિકા તંત્રએ લોકોને જાણકારી આપી છે. જો વિશ્વામિત્રી નદીની સપાટી 24 ફુટ થાય તો નીચાણવાળા વિસ્તાર ખાલી કરવામાં આવશે. 

સુરતમાં ધીમીધારે વરસાદ શરૂ:

સુરત શહેરમાં મોડી રાત્રે વરસાદ શરૂ થઇ ગયો છે. મોડીરાત્રે ધોધમાર વરસાદ બાદ વહેલી સવારથી ઝરમર વરસાદ શરૂ થઇ ગયો છે. સુરતના નાનપુરા, અઠવા લાઈન, ચોક બજાર વિસ્તારમાં વરસાદ પડ્યો છે. ઉપરાંત અડાજણ, રાંદેર, વરાછા, લિંબાયત, પર્વતપાટિયા વિસ્તારમાં વરસાદ પડ્યો છે. ઉધના, ઘોડાદરા, પૂણા વિસ્તારમાં વરસાદ શરૂ થઇ ગયો છે. તો સિવિલ હોસ્પિટલ, રિંગરોડ, સલાબતપુરા વિસ્તારમાં પણ વરસાદ ચાલું છે.

આગામી 24 કલાક ભારે વરસાદની આગાહી:

રાજ્યમાં હજુ પણ આગામી 24 કલાકમાં ક્યાંક ભારે તો ક્યાંક હળવો વરસાદ પડી શકે છે. ગુજરાતના કચ્છ, ઉત્તર અને મધ્ય ગુજરાતમાં વરસાદની આગાહી કરવામાં આવી છે. તો આ તરફ દક્ષિણ ગુજરાત અને સૌરાષ્ટ્રમાં પણ વરસાદી માહોલ યથાવત્ છે. આ તરફ મહેસાણા, અમદાવાદ અને ગાંધીનગરમાં ભારે વરસાદની આગાહી છે. જ્યારે દુકાળગ્રસ્ત કચ્છના સમગ્ર વિસ્તારમાં વરસાદની આગાહી છે. તો આ તરફ સુરત, નવસારી, વલસાડ તેમજ સૌરાષ્ટ્રના જિલ્લાઓમાં સામાન્યથી ભારે વરસાદ થાય તેવી શક્યતા છે. આ તરફ દેવભૂમિ દ્વારકામાં વરસાદી માહોલ છવાયો છે.

અત્યાર સુધીમાં સિઝનનો 90.02 ટકા વરસાદ નોંધાયો:

ગુજરાતમાં અત્યાર સુધીમાં સિઝનનો 90.02 ટકા વરસાદ નોંધાયો છે. રાજ્યમાં સરેરાશ વરસાદ 29.20 ઇંચ પડ્યો છે. જ્યારે દક્ષિણ ગુજરાત, કચ્છમાં 100% થી વધુ વરસાદ વરસ્યો છે. તો ડાંગ જિલ્લામાં સૌથી વધું 91.41 ઈંચ વરસાદ ખાબક્યો છે. રાજ્યના 51 તાલુકામાં 39.37 ઈંચ વરસાદ નોંધાયો છે. ત્યારે સારો વરસાદ પડતા ખેડૂતોને હવે સિંચાઇના પાણીની મુશ્કેલી નહીં નડે તેવી આશા છે.