વાતાવરણ / માવઠાએ તો ભારે કરી! હજુય ગુજરાત પરથી ટળ્યું નથી સંકટ, 24 કલાકમાં 40 તાલુકામાં વરસાદ, જુઓ શું કહે છે હવામાન વિભાગની આગાહી

 

• રાજ્યમાં કમોસમી વરસાદનો માર
• 4 દિવસ રાજ્યમાં કમોસમી વરસાદની આગાહી
• છેલ્લા 24 કલાકમાં 40 તાલુકામાં વરસાદ
• સૌથી વધુ ખાંભામાં સવા ઈંચ વરસાદ નોંધાયો

રાજ્યમાં એક પછી એક માવઠાની આગાહીની ઉપાધિ જોવા મળી રહી છે. ઉનાળાના પ્રારંભની સાથે જ માવઠાએ મોકાણ સર્જતા ઠેર ઠેર અનેક શહેરોના વાતાવરણમાં બદલાવ જોવા મળી રહ્યો છે. તેવામાં રાજ્યમાં ફરી કમોસમી વરસાદની આગાહી કરવામાં અવાતા ખેડૂતોના જીવ પડીકે બંધાયા છે. છેલ્લા 24 કલાકમાં રાજ્યના 40 તાલુકાઓમાં કમોસમી વરસાદ ખાબક્યો છે. જેમાં સૌથી વધુ વરસાદ ખાભામાં નોંધાયો છે. અહીં 24 કલાકમાં મેઘરાજાએ ધળબળાટી બોલાવી છે. ખાંભામાં સવા ઈંચ જેટલો વરસાદ નોંધાયો છે. 

ખાંભામાં નોંધાયો સૌથી વધારે વરસાદ
હવામાન વિભાગની આગાહીને પગલે ગત ઘણા સમયથી રાજ્યમાં કમોસમી વરસાદ વરસી રહ્યો છે, ત્યારે છેલ્લા 24 કલાકમાં રાજ્યના 40 તાલુકામાં વરસાદ થયો છે. જેમાં સૌથી વધુ ખાંભામાં સવા ઈંચ વરસાદ થયો છે, જ્યારે વિસાવદર, મહેસાણા, માણાવદર અને ઉપલેટામાં 1- 1 ઈંચ વરસાદ નોંધાયો છે. સાથે ભુજ, વિસનગર, મોડાસા અને ખેડબ્રહ્મામાં પોણો ઈંચ વરસાદ થયો છે, તો વિજાપુર, સાયલા, અંજાર, લખતર, સરસ્વતી અને પાલનપુરમાં અડધો ઈંચ વરસાદ થયો છે.

5 દિવસ સુધી કમોસમી વરસાદની આગાહી
રાજ્યમાં ગત ઘણા સમયથી કમોસમી વરસાદ વરસી રહ્યો છે, ત્યારે રાજ્યમાં ફરી 4 દિવસ સુધી કમોસમી વરસાદની આગાહી કરવામાં આવી છે. વધુ એક વેસ્ટર્ન ડિસ્ટર્બન્સ સક્રિય થતાં કમોસમી વરસાદની આગાહી કરવામાં આવી છે. ગાજવીજ અને ભારે પવન સાથે વરસાદની આગાહી કરવામાં આવી છે. કલાઈમેટ ચેન્જના કારણે વાતાવરણમાં પલટો આવી રહ્યો છે. હવામાન વિભાગે રાજ્યના બનાસકાંઠા, સાબરકાંઠા, મહેસાણા અને પાટણમાં વરસાદની આગાહી કરી છે. સાથે આવતીકાલે દાહોદ, પંચમહાલ, ડાંગ, કચ્છ અને સૌરાષ્ટ્રના કેટલાક જિલ્લામાં કમોસમી વરસાદની આગાહી કરી છે.

જાણો ક્યાં ખાબકી શકે છે વરસાદ?
આજે પોરબંદર, જૂનાગઢ, ગીર સોમાનથ જિલ્લામાં વરસાદની આગાહી છે, તો આવતીકાલે એટલે કે 4 મેના રોજ ડાંગ, નવસારી, વલસાડ, અમરેલી, ભાવનગરમાં વરસાદ ખાબકી શકે છે. 5 મેના રોજ ડાંગ, નવસારી, વલસાડ, જામનગર, પોરબંદર, જૂનાગઢ, દ્વારકામાં વરસાદની શક્યતા છે. 6 મે ના વડોદરા, ભરૂચ, નવસારી, વલસાડ, અમરેલી, ભાવનગર, રાજકોટમાં વરસાદની આગાહી છે.