અગાહી / દેશમાં હજુ આ ચાર રાજ્યોમાં પડશે ભારે વરસાદ, હવામાન વિભાગે અલર્ટ જાહેર કર્યું

• કેરળ સહિત 4 રાજ્યો માટે આગાહી 
• હળવાથી ભારે વરસાદની આગાહી
• કાશ્મીરમાં કોલ્ડવેવની સ્થિતિ

ભારતીય હવામાન વિભાગે કેરળ સહિત 4 રાજ્યો અને એક કેન્દ્રશાસિત પ્રદેશમાં હળવાથી ભારે વરસાદની આગાહી કરી છે. હવામાન વિભાગે આ અંગે એલર્ટ જાહેર કર્યું છે. છેલ્લા કેટલાક દિવસોમાં તમિલનાડુ, કેરળ અને આંધ્રપ્રદેશમાં ભારે વરસાદ બાદ ઘણા વિસ્તારોમાં પૂર જેવી સ્થિતિ સર્જાઈ છે.

આ રાજ્યોમાં ભારે વરસાદ થશે
હવામાન વિભાગ (IMD) ની આગાહી અથવા ચેતવણી અનુસાર, કેન્દ્રશાસિત પ્રદેશ પુડુચેરી ઉપરાંત કર્ણાટક, આંધ્રપ્રદેશ, કેરળ અને તમિલનાડુના દક્ષિણી આંતરિક ભાગોમાં આગામી 5 દિવસમાં હળવાથી ભારે વરસાદની અપેક્ષા છે. આ દરમિયાન તામિલનાડુ અને પુડુચેરીમાં 25-27 નવેમ્બર વચ્ચે ભારે વરસાદની સંભાવના છે. આ ઉપરાંત 27 નવેમ્બરે આંધ્રપ્રદેશના યાનમ અને રાયલસીમા સિવાય દક્ષિણ તટીય વિસ્તારમાં ભારે વરસાદની સંભાવના છે. આ સાથે હવામાન વિભાગે તામિલનાડુ માટે 25-26 નવેમ્બર માટે ઓરેન્જ એલર્ટ જાહેર કર્યું છે.

26 અને 27 નવેમ્બરના દિવસે તમિલનાડુ અને દક્ષિણ આંધ્રપ્રદેશના દરિયાકાંઠે અને મન્નરના અખાત તેમજ દક્ષિણપશ્ચિમ અને અડીને આવેલા પશ્ચિમ-મધ્ય બંગાળની ખાડીમાં ભારે પવનની સંભાવના છે. આ દરમિયાન 40-60 કિમી પ્રતિ કલાકની ઝડપે પવન ફૂંકાઈ શકે છે.

ભારે વરસાદ અને તેજ પવન માછીમારો માટે મુશ્કેલ 
આ સમય દરમિયાન માછીમારોને દરિયાથી દૂર રહેવાની સલાહ આપવામાં આવી છે
હવામાન વિભાગ (IMD) એ ચેતવણી આપી છે કે ભારે વરસાદ અને તેજ પવનને કારણે માછીમારો માટે મુશ્કેલ બની શકે છે, તેથી આ સમય દરમિયાન તેઓએ દરિયામાં માછીમારી ન કરવી જોઈએ અને તેમને દરિયાથી દૂર રહેવાની સલાહ આપવામાં આવી છે. IMDએ કહ્યું હતું કે, ભારે વરસાદથી સમુદ્રમાં ખૂબ મોટાંય મોટાં મોજા ઉછળી શકે છે.

કાશ્મીરમાં કોલ્ડવેવની સ્થિતિ, પારો ગગડ્યો
ઉત્તર ભારતમાં તાપમાનનો પારો નીચે જવા લાગ્યો છે અને ઠંડી સતત વધી રહી છે. કાશ્મીરમાં કોલ્ડવેવની સ્થિતિ પ્રવર્તી રહી છે અને તાપમાનનો પારો ઘણો નીચે આવી ગયો છે. શ્રીનગરમાં સોમવારે રાત્રે માઈનસ 2.3 ડિગ્રી સેલ્સિયસ તાપમાન નોંધાયું હતું, જે અત્યાર સુધીની સિઝનની સૌથી ઠંડી રાત બની છે. 
હવામાન વિભાગના અધિકારીઓએ જણાવ્યું હતું કે કાશ્મીરમાં છેલ્લી કેટલીક રાતોથી તાપમાન શૂન્યથી નીચે નોંધાઈ રહ્યું છે અને મોટા ભાગના સ્થળોએ આ સિઝનના સામાન્ય તાપમાન કરતાં બેથી ત્રણ ડિગ્રી સેલ્સિયસ ઓછો પારો નોંધાઈ રહ્યો છે. પહેલગામમાં તાપમાન માઈનસ 4.4 ડિગ્રી સેલ્સિયસ હતું, જે કાશ્મીરનું સૌથી ઠંડું સ્થળ હતું.