પ્રહાર / રાહુલ ગાંધીનો વીડિયો દ્વારા કટાક્ષ : PM 8400 કરોડના પ્લેનમાં અને સેનાના જવાનો નોન બુલેટપૂફ ટ્રકમાં !

• રાહુલ ગાંધીએ પીએમ મોદી પર ફરી કર્યો પ્રહાર, શેર કર્યો વીડિયો  
• રાહુલે કહ્યું પ્રધાનમંત્રી માટે 8400 કરોડનું વિમાન અને જવાનો નોન બુલેટ પ્રુફ ટ્રકમાં
• પીએમને ઈમેજની ચિંતા, જવાનોની નહીં : રાહુલ ગાંધી 

રાહુલ ગાંધીએ વીડિયો ટ્વીટ કરીને પ્રધાનમંત્રી પર કર્યા પ્રહાર

પીએમ અને રાષ્ટ્રપતિ હાલમાં આવેલ એક નવા હવાઈ જહાજને લઈને કોંગ્રેસ અને રાહુલ ગાંધી સતત આક્રમક મોડમાં છે અને પીએમ મોદી પર હુમલા કરી રહ્યા છે. એવામાં આજે રાહુલ ગાંધીએ એક વીડિયો પોસ્ટ કર્યો જેમાં ભારતના સેનાના જવાનો દેખાઈ રહ્યા છે. જોકે વીડિયો ક્યાનો છે કયા સમયનો છે તેવી કોઈ સ્પષ્ટતા રાહુલ ગાંધીએ કરી નથી. 

हमारे जवानों को नॉन-बुलेट प्रूफ़ ट्रकों में शहीद होने भेजा जा रहा है और PM के लिए 8400 करोड़ के हवाई जहाज़!

क्या यह न्याय है? pic.twitter.com/iu5iYWVBfE

— Rahul Gandhi (@RahulGandhi) October 10, 2020

રાહુલનો સવાલ : શું આ જ ન્યાય છે?

રાહુલ ગાંધીએ એક વીડિયો શેર કરીને પીએમ મોદી પર નિશાન સાધ્યું છે. આ વીડિયો એક ટ્રકનો છે જેમાં કેટલાક જવાનો બેઠા છે અને અંદરોઅંદર વાતચીત કરી રહ્યા છે. જેમાંથી એક જવાન કહે છે કે નોન બુલેટપ્રૂફ ગાડીમાં મોકલીને અમારા જીવ સાથે રમત રમાઈ રહી છે. રાહુલ ગાંધીએ આ વીડિયો શેર કરીને લખ્યું છે કે આપણા જવાનોને નોન બુલેટપ્રૂફ ટ્રકમાં શહીદ થવા માટે મોકલવામાં આવી રહ્યા છે અને વડાપ્રધાન માટે 8400 કરોડ રૂપિયાનું હવાઈ જહાજ ! શું આ જ ન્યાય છે ? 

વીડિયો કયા સમયનો છે, કયાંનો છે તે અંગે રાહુલ ગાંધીના ટ્વીટમાં પણ નથી સ્પષ્ટતા

જોકે આ વીડિયોમાં એવી કોઈ સ્પષ્ટતા નથી કે આ વીડિયો ક્યારનો છે, કયા સમયનો છે. જે મુદ્દે રાહુલ ગાંધીથી પણ લોકો સવાલ કરી રહ્યા છે કે વીડિયોની પુષ્ટિ થઇ શકે તેવી માહિતી રાહુલ ગાંધી કેમ નથી આપી રહ્યા ? 

નોંધનીય છે કે સતત ચીન સાથે સરહદ વિવાદ મુદ્દે રાહુલ ગાંધી મુદ્દો ઉઠાવી રહ્યા છે અને એવામાં પીએમ માટે આવેલ નવું વિમાન હાલ રાજકારણનો વિષય બન્યું છે. બે દિવસ પહેલા આ જ વિમાન મુદ્દે રાહુલ ગાંધીએ કહ્યું હતું કે પીએમએ પોતાના માટે 8400 કરોડ રૂપિયાનું જહાજ ખરીદ્યું. આટલામાં સિયાચીન-લદાખ સરહદ પર તૈનાત આપણા જવાનો માટે કેટલું બધું ખરીદી શકાતું હતું. 30,00,000 ગરમ કપડા,  60,00,000 જેકેટ, ગ્લવ્ઝ, 67,20,000 બૂટ અને 16,80,000 ઓક્સીઝ્ન સીલીન્ડર. પીએમ મોદીને માત્ર પોતાની ઈમેજની જ ચિંતા છે સૈનિકોની નહીં.