ખુલાસો / કોવિડ ટેસ્ટિંગ ડોમના ભાડાને લઇ અમદાવાદ મનપા પર ઉઠ્યા સવાલો, પ્રતિ ટેન્ટ દીઠ 6 ગણું વધારે ભાડુ વસૂલાયું

• કોવિડ ટેસ્ટિંગ ડોમના ભાડાને લઇ સવાલો
• મનપાએ ટેસ્ટિંગ માટે 287 ડોમ ઉભા કર્યા હતા
• મનપાએ ભાડાની અલગ અલગ રકમ ચૂકવી

પ્રથમ દિવસે પ્રતિ ટેન્ટ દીઠ 6 ગણું વધારે ભાડું ચુકવાયું હતું

કોરોનાકાળ દરમિયાન કોવિડના ટેસ્ટ માટે મનપાએ શહેરના વિવિધ વિસ્તારોમાં 287 ટેસ્ટિંગ ડોમ ઊભા કર્યા હતા. એક RTIમાં મળેલી માહિતી મુજબ પ્રત્યેક ડોમ માટે પ્રથમ દિવસે રૂ.6033નું ભાડું ચૂકવાયું હતું. એ પછી બીજા અને ત્રીજા દિવસે ભાડા પેટે રૂ.1278 ચૂકવાયા હતા. પરંતુ ચોથા દિવસથી પ્રતિ ટેન્ટના ભાડા પેટે રૂ.1022ની રકમ ચૂકવવામાં આવી હતી.એટલે કે, પ્રથમ દિવસે પ્રતિ ટેન્ટ દીઠ જે ભાડું ચૂકવાયું હતું તે લગભગ 6 ગણું વધારે હતું. કોરોનાકાળ દરમિયાન ટેસ્ટ ડોમ અંગેની તમામ કામગીરી અધિકારીઓને સોંપી દેવામાં આવી હતી.

પોણા 2 વર્ષમાં 287 જેટલા ડોમ ટેસ્ટિંગ માટે ઉભા કરાયા હતા

ડોમ માટે ચૂકવેલા ભાડાની વાત કરીએ તો એમ કહેવાય કે, પ્રથમ દિવસે 287 ટેસ્ટિંગ ડોમના ભાડા પેટે 17.31 લાખ ચૂકવાયા હતા. પરંતુ ચોથા દિવસથી ભાડા પેટે માંડ 2.93 લાખ ચૂકવાયા હતા. આમ માત્ર 4 દિવસના ગાળામાં ટેન્ટના ભાડાની રકમ 14.38 લાખ ઘટી ગઈ હતી. RTI એક્ટિવિસ્ટ માંગેલી માહિતીમાં મનપાએ આપેલી વિગતોમાં આ ચોંકાવનારી હકીકતો બહાર આવી છે. ટેન્ટ માટે મ્યુનિ.એ ગાંધી કોર્પોરેશનને જ કોન્ટ્રાક્ટ આપ્યો હતો. જે માટે કુલ 287 જેટલા ડોમ કોવિડ-19ના ટેસ્ટિંગ માટે મુકવામાં આવ્યા હતા.