- પ્રયાગરાજમાં પીએમ મોદી વિરુદ્ધ હોર્ડિંગ લાગ્યા
- હોર્ડિંગ્સ લગાવનારા 5 લોકોની પોલીસે ધરપકડ કરી
- તેલંગણામાંથી ઓર્ડર મળ્યો હોવાનો દાવો
ઉત્તર પ્રદેશના પ્રયાગરાજમાં પ્રધાનમંત્રી નરેન્દ્ર મોદી વિરુદ્ધ હોર્ડિંગ લગાવવાના કેસમાં પોલીસે 5 લોકોની ધરપકડ કરી લીધી છે. પોલીસે દાવો કર્યો છે કે, આ ષડયંત્ર તેલંગણામાં રચવામાં આવ્યું અને તેના પોસ્ટર તેલંગણા રાષ્ટ્ર સમિતિના એક નેતાએ ફોન દ્વારા એક ઈવેન્ટ મેનેજમેંટ કંપનીના સંચાલક પાસે છપાવ્યા હતા. આ કેસમાં પોલીસે જણાવ્યું છે કે, આ કામ માટે કંપની સંચાલકને તેલંગણામાંથી ફોન આવ્યો અને તેને 10 હજાર રૂપિયાનો કોન્ટ્રાક્ટ આપવામાં આવ્યો હતો.
હકીકતમાં જોઈએ તો, શુક્રવારે અડધી રાતે અમુક અરાજક તત્વોએ પ્રધાનમંત્રી મોદી વિરુદ્ધ શહેરમાં પોલીસ લાઈન આરડી પેલેસ નજીક એક હોર્ડિંગ લગાવી દીધું હતું. જેથી સૂચના મળ્યા બાદ પોલીસે આ હોર્ડિંગ પ્રયાગરાજ નગર નિગમની મદદથી હટાવી દીધું હતું. ભારતીય જનતા પાર્ટીના યુવા મોર્ચાના એક નેતા સહિત ત્યાં આવતા જતા લોકોની નજર આ હોર્ડિંગ પર પડી તો તેમણે પોલીસને સૂચના આપી અને ત્યાર બાદ શનિવારે આ હોર્ડિંગ હટાવી દેવામાં આવ્યું હતું. મામલામાં અજાણ્યા શખ્સો વિરુદ્ધ ફરિયાદ દાખલ કરવામાં આવી છે. હોર્ડિંગ લગાવ્યા બાદ મજૂરો પાસે પૂછપરછ કરતા સીસીટીવી ફુટેજના આધાર પર પોલીસ આરોપી સુધી પહોંચી ગઈ હતી.
10 હજારમાં આપ્યો હતો હોર્ડિંગ લગાવાનો કોન્ટ્રાક્ટ
આ મામલામાં પોલીસે ઈવેન્ટ કંપનીના સંચાલક, પ્રિન્ટિંગ પ્રેસના માલિક અને મજૂરો સહિત 5 લોકોની ધરપકડ કરી છે. ધરપકડ થયેલા કંપની સંચાલક અનિકેત કેશરવાનીએ પોલીસને જાણકારી આપી છે કે, તેની પાસે સાઈ નામના વ્યક્તિનો કોલ આવ્યો હતો. જે તેલંગણાનો હોવાનો કહેવાય છે. આ પોસ્ટર છપાવવા અને લગાવવા માટે 10 હજારનો કોન્ટ્રાક્ટ આપવામા આવ્યો હતો.
શું હતું હોર્ડિંગમાં ?
પ્રધાનમંત્રી મોદીના વિવાદીત હોર્ડિંગમાં હૈશટૈગ #ByeByeModi લખ્યું હતું અને તેમાં હટાવાયેલા કૃષિ કાયદા, નોકરીઓ, રસોઈ ગેસના વધતા ભાવ જેવા વગેરે મુદ્દાઓનો ઉલ્લેખ હતો. હોર્ડિંગ્સ પર લખ્યું હતું. આપે કૃષિ કાયદાનો વિરોધ દરમિયાન કેટલાય ખેડૂતોનો જીવ લઈ લીધો અને યુવાનોના સપના કોન્ટ્રાક્ટ પદ્ધતિની નોકરીઓમાં માર્યા ગયા. તેમાં પીએમ મોદીના એક કેરીકેચરને પણ દર્શાવામાં આવ્યું હતું. જેની નજીક રૂપિયા 1105 ની કિંમતવાળો ગેસ સિલેન્ડર પણ રાખેલો હતો.
