- હેડ ક્લાર્ક પરીક્ષા ભરતી પરીક્ષા પેપરલીક મામલો
- ગાંધીનગર રેન્જ IGએ કરી પત્રકાર પરિષદ
- સાણંદના કિશોર આચાર્ય પ્રિન્ટિંગ પ્રેસમાંથી પેપર કર્યું લીક
પેપરલીક મામલે ગાંધીનગર રેન્જ IGએ કહ્યું સાણંદના કિશોર આચાર્ય જે પ્રિન્ટિંગ પ્રેસમાં કામ કરે છે તેણે આ પેપર ફોડ્યું તેણે આ પેપર મંગેશ સીરકેને આપ્યુ, દિપક મહેન્દ્રભાઇ પટેલ જે સિંગરવા હોસ્પિટલમાં એમ્બ્યુલન્સ ચલાવે છે તે અને દેવલ પટેલ જે પેપર કાંડમાં મુખ્ય આરોપી છે તે બંને સાથે કામ કરે છે. દિપક પટેલનું પૂછપરછ કરતાં મંગેશ સીરકેનું નામ સામે આવ્યું હતું. જેની પોલીસે સઘન પૂછપરછ કરતાં તેણે પ્રિન્ટિંગ પ્રેસના કર્મચારી કિશોર આચાર્ય પાસેથી પેપર લીધું હોવાનું કબૂલ્યું હતું. પોલીસે કિશોરની પૂછતાછ કરતાં તેણે કબૂલ્યું હતું કે 10 તારીખે ખાનગી રીતે પ્રિન્ટિંગ પ્રેસમાંથી પેપર ચોરી મંગેશ સીરકેને રૂપિયા લઈ આપી દીધું હતું. મંગેશ સીરકે પાસેથી પોલીસે 7 લાખ રૂપિયા પણ કબજે કર્યા છે. મંગેશ સીરકેએ 10 તારીખે જ પેપર પ્રેસના કર્મચારી કિશોર આચાર્ય પાસેથી લીધું હતું જે બાદ દિપક મહેન્દ્રભાઇ પટેલ, દેવલ પટેલને આ પેપર રૂપિયા લઈ આપી દીધું હતું
આ કડી મહત્વની સાબિત થઈ
પેપર લીક કેસમાં હવે અમદાવાદના એમ્બ્યુલન્સ ચાલકનું નામ સામે આવ્યું હતું. દીપક નામના એમ્બ્યુલન્સ ચાલક પાસેથી જ પેપર લીક કેસના મુખ્ય આરોપી જયેશ અને દેવલ પટેલે 30 લાખ રૂપિયામાં પેપર ખરીદ્યું હોવાની ચર્ચા છે. દીપક ઉપરાંત અમદાવાદના સિંગરવા અને વાડજના યુવકોની પણ આ જ કેસમાં અટકાયત કરવામાં આવી હતી. જે બાદ મંગેશ શિર્કે જે અમદાવાદની ઓઢવની હોસ્પિટલમાં નોકરી કરે છે તેના સુધી કડી મળી હતી. ત્યાર બાદ સૌથી મોટો ખુલાસો થયો હતો કે સાણંદની પ્રેસ કે જ્યાં પરીક્ષાના પેપર છપાય છે ત્યાંના મેનેજર કિશોર આચાર્ય પાસેથી પેપર લીધું હતું. જે બાદ તપાસનો રેલો પ્રિન્ટિગ પ્રેસ સુધી પહોંચ્યા હતો આરોપી મેનેજરની કડક પૂછપરછ કરવામાં આવતા કિશોર આચાર્યએ ચોરીથી પેપર પ્રેસમાંથી લઈ લીધું હોવાનો ઘટસ્ફોટ કર્યો હતો. જે બાદ તેણે મંગેશ શિર્કેને અને શિરકેએ તે પેપર દિપક મહેન્દ્રભાઇ પટેલ, દેવલ પટેલને આ પેપર આપી દીધું હતું. જેમણે પણ અન્યોને આ પેપર પહોંચાડી સમગ્ર કાંડ રચ્યો હતો. આ ખુલાસા બાદ હવે પેપર રદનો નિર્ણય લેવાય તો નવાઈની વાત નથી
હેડ ક્લાર્કનું પેપર પ્રિન્ટિગ પ્રેસમાંથી લીક થયું હતું, શું હતો ઘટના ક્રમ
- સાણંદના કિશોર આચાર્યએ પ્રિન્ટિગ પ્રેસ માંથી પેપર લીધું હતું
- હેડ ક્લાર્કનું પેપર અમદાવાદના સાણંદમાં જ છપાયું હતું
- કિશોર આચાર્ય પ્રિન્ટિગ પ્રેસનો મેનેજર હતો
- કિશોરે નવરંગપુરાના મંગેશ શિર્કેને આપ્યું હતું
- મંગેશ શિર્કે અમદાવાદની ઓઢવની હોસ્પિટલમાં નોકરી કરે છે
- મંગેશે દેવલ પટેલને આપ્યું હતું અને દેવલે બીજાને આપ્યું
પેપરકાંડમાં અત્યારસુધી શું થઈ કાર્યવાહી?
અમદાવાદના સિંગરવા અને વાડજના 4 યુવકોની પોલીસ દ્વારા અટકાયત કરવામાં આવી છે. નોંધનીય છે કે, સમગ્ર કૌભાંડ મામલે 11 લોકો સામે ફરિયાદ થઈ ચૂકી છે જેમાં 8 આરોપીઓને ઝડપી લેવામાં આવ્યા અને તેમના 9 દિવસના રિમાન્ડ મંજૂર થયા છે. આ આરોપીઓ 27મી ડિસેમ્બર સુધી રિમાન્ડ પર રહેશે. તમામ ઝડપાયેલા આરોપીઓના આઠેય આરોપીના રિમાન્ડ મંજૂર થયા બાદ હિંમતનગર લઈ જવાયા છે જો કે, મુખ્ય સુત્રધાર મનાતો એક આરોપી જયેશ પટેલ હજુ પોલીસ પકડથી બહાર છે.આ સિવાયના બે અન્ય આરોપીઓને પણ પોલીસ શોધી રહી છે. રિમાન્ડ પર રહેલા તમામ આરોપીઓની હવે સાબરકાંઠા પોલીસ પૂછપરછ કરશે.
ખાનગી પ્રેસમાંથી પેપર લીક થયાની સંભાવના સાચી પડી
વીટીવી ગુજરાતીએ તેના અહેવાલમાં દર્શાવ્યું હતું કે હેડ ક્લાર્કની પરીક્ષા પેપર લીક પ્રેસ માંથી જ થયું છે જે વાત આજે સાચી ઠરી છે.
