- ભારતના વડાપ્રધાન નરેન્દ્ર મોદી અને શિન્ઝો આબેની મિત્રતા જાણીતી
- મારા પ્રિય મિત્ર આબે શિન્ઝો પર થયેલા હુમલાથી ખૂબ જ દુઃખી: મોદી
- અમારી સંવેદના અને પ્રાર્થના તેમની સાથે: વડાપ્રધાન મોદી
જાપાનના ભૂતપૂર્વ વડા પ્રધાન શિન્ઝો આબેને નારા શહેરમાં જાહેર સભાને સંબોધિત કરતી વખતે ગોળી મારી દેવામાં આવી હતી. પાછળ ઉભેલા એક વ્યક્તિએ અચાનક તેના પર હુમલો કર્યો. જે બાદ શિન્ઝો આબે નીચે પડી ગયા હતા. હાલમાં સારવાર હેઠળ રહેલા પૂર્વ વડાપ્રધાનને લઈ ભારતના વડાપ્રધાન નરેન્દ્ર મોદીએ પણ ટ્વિટ કરી સંવેદના પ્રગટ કરી હતી. આ સાથે અમેરિકા વતી રાજદૂત રામ ઈમેન્યુઅલે પણ સમગ્ર ઘટનાને લઈ ટ્વિટ કર્યું છે.
પીએમ મોદીએ ટ્વિટ કર્યું
ભારતના વડાપ્રધાન નરેન્દ્ર મોદી અને શિન્ઝો આબેની મિત્રતા જાણીતી છે. આબે પર હુમલા બાદ પીએમ મોદીએ ટ્વિટ કરીને લખ્યું કે, મારા પ્રિય મિત્ર આબે શિન્ઝો પર થયેલા હુમલાથી ખૂબ જ દુઃખી છું. અમારી સંવેદના અને પ્રાર્થના તેમની સાથે, તેમના પરિવાર અને જાપાનના લોકો સાથે છે.
ઓસ્ટ્રેલિયાના પીએમએ પણ સંવેદના વ્યક્ત કરી
ઓસ્ટ્રેલિયાના પીએમ એન્થોની આલ્બાનીસે શિન્ઝો આબે પર થયેલા હુમલા અંગે કહ્યું કે, પૂર્વ પીએમ શિન્ઝો આબેને ગોળી મારી દેવામાં આવી હતી... આ એકદમ ચોંકાવનારા સમાચાર છે. આ સમયે તેમના પરિવાર અને જાપાનના લોકો પ્રત્યે અમારી સંવેદના છે.
બ્રિટનના પીએમ બોરિસ જોન્સને પણ શોક વ્યક્ત કર્યો
શિન્ઝો આબે પર થયેલા આ હુમલાને લઈને બ્રિટનના પીએમ બોરિસ જોન્સન તરફથી પણ શોક વ્યક્ત કરવામાં આવ્યો છે. તેમણે કહ્યું કે, શિન્ઝો આબે પર થયેલા કાયરતાપૂર્ણ હુમલાથી ઊંડો આઘાત લાગ્યો છે. તેમના શુભચિંતકો અને પરિવાર પ્રત્યે મારી સંવેદના.
અમેરિકા દ્વારા બહાર પાડવામાં આવેલ નિવેદન
અમેરિકા વતી રાજદૂત રામ ઈમેન્યુઅલે શિન્ઝો આબે વિશે કહ્યું કે, આબે જાપાનના મહાન નેતા છે અને અમેરિકાના સારા મિત્ર પણ છે. અમેરિકાની સરકાર અને લોકો તેમના ઝડપી સ્વસ્થ થવાની પ્રાર્થના કરી રહ્યા છે. અમે જાપાનના લોકો અને તેમના પરિવાર સાથે ઉભા છીએ.
તે જ સમયે, વ્હાઇટ હાઉસ દ્વારા જારી કરવામાં આવેલા એક નિવેદનમાં કહેવામાં આવ્યું છે કે, જાપાનના ભૂતપૂર્વ વડા પ્રધાન શિંઝો આબે વિરુદ્ધ હિંસક હુમલા વિશે સાંભળીને અમે આઘાત અને દુઃખી છીએ. અમે રિપોર્ટ પર નજીકથી નજર રાખી રહ્યા છીએ. તેમના પરિવાર અને જાપાનના લોકો પ્રત્યે અમારી સંવેદના.
જાપાનના વડા પ્રધાન ફ્યુમિયો કિશિદાએ શુ કહ્યું ?
જાપાનના વડા પ્રધાન ફ્યુમિયો કિશિદાએ આ હુમલા વિશે કહ્યું કે, આ બર્બર અને દુર્ભાવનાપૂર્ણ છે અને તેને સહન કરી શકાય નહીં. અમે અમારાથી બનતું બધું કરીશું... આ સમયે, ડૉક્ટર શિન્ઝો અબેને બચાવવા માટે શક્ય તેટલું બધું કરી રહ્યા છે.
