એલર્ટ / મહારાષ્ટ્રમાં હથિયારો મળતા ગુજરાતનાં દરિયામાં પણ ઍલર્ટ, વલસાડમાં વધારાયું પેટ્રોલિંગ-માછીમારોને પણ કડક સૂચના

• મહારાષ્ટ્રના દરિયા કિનારા વિસ્તારમાં ઝડપાયા હતા હથિયારો
• વલસાડના દરિયા કિનારે પોલીસ વધાર્યું પેટ્રોલિંગ
• વલસાડના 70 કિલોમીટરના દરિયા કિનારા વિસ્તારમાં પેટ્રોલિંગ

મહારાષ્ટ્રના રાયગઢ નજીકથી હરિહરેશ્વરના દરિયા કિનારે શંકાસ્પદ બે બોટ મળી આવી હતી. જેમાંથી એક બોટમાં હથિયાર મળી આવ્યા હતા.  આ ઘટના બાદ ગુજરાતમાં પણ દરિયાકાંઠાના વિસ્તારો એલર્ટ કરી દેવાયા છે. દરિયાકાંઠાના વિસ્તારોમાં પોલીસ પેટ્રોલિંગ વધારી દેવામાં આવ્યું છે.

મરીન પોલીસ એલર્ટ, કોસ્ટલ પેટ્રોલિંગ વધારાયું

ત્યારે વાત કરીએ વલસાડની તો, વલસાડના દરિયા કિનારે પોલીસ પેટ્રોલિંગ વધારવામાં આવ્યું છે.વલસાડના 70 કિલોમીટરના દરિયા કિનારા વિસ્તારમાં પેટ્રોલિંગ કરવામાં આવી રહ્યુ છે. મરીન પોલીસને એલર્ટ કરવામાં આવી છે. આ ઉપરાંત પોલીસ દ્વારા માછીમાર ભાઇઓ સાથે મિટીંગ કરવામાં આવી. કોસ્ટલ પેટ્રોલિંગ સિવાય પણ માછીમારોને કહેવામાં આવ્યું છે કે જો કોઇ શંકાસ્પદ ગતિવિધિ જણાય કે પછી કોઇ અજાણ્યા લોકો જોવા મળે તો તાત્કાલિક પોલીસને જાણ કરવામાં આવે. 

શંકાસ્પદ ગતિવિધિ જણાય તો જાણ કરવી- માછીમાર

આ અંગે વીટીવી ન્યૂઝ સાથે માછીમારોએ વાત કરતા જણાવ્યું કે કોઇ શંકાસ્પદ બોટ દેખાય તો તાત્કાલિક મરીન પોલીસ સ્ટેશનમાં જાણ કરવા સૂચન આપેલા છે.  તેમને ગુજરાત અને મહારાષ્ટ્રના કલરકોડ વિશેનો પણ તફાવત સમજાવીને તમામ રીતે સતર્ક રહેવા માટે માહિતગાર કરવામાં આવ્યા હતા. 

મહારાષ્ટ્રના રાયગઢમાં દરિયાકાંઠેથી મળી આવી હતી બોટ

ઉલ્લેખનીય છે કે 18 ઑગષ્ટના રોજ મહારાષ્ટ્રના રાયગઢના હરિહરેશ્વરના દરિયા કિનારેથી એક સંદિગ્ધ બોટ ઝડપાઈ હતી. બોટમાં ઘાતક ગણાતી  3 AK 47 રાઈફલ, બીજી રાઈફલ અને કારતૂસનો મોટો જથ્થો મળી આવતા હાઈ એલર્ટ જાહેર કરાયું હતું.. એટલું જ નહીં પરંતુ રાયગઢના  ભારડખોલમાંથી એક લાઈફબોટ પણ મળી આવી હતી. આખી બોટ હથિયારોથી ભરેલી હતી તેમાં કોઈ વ્યક્તિ નહોતો. બોટમાં 3 એકે-47, બીજી રાઈફલો અને મોટી માત્રામાં કારતૂસનો જથ્થો રખાયો હતો. સાથે કેટલાક દસ્તાવેજો પણ જોવા મળ્યાં હતા.