નવી દિલ્હી / આતંકવાદ જેવા ખતરાનો સામનો કરવા માટે વિશ્વએ એક સાથે આવવું જોઈએ, ઈન્ટરપોલ મહાસભામાં PM મોદીનું નિવેદન

• ઈન્ટરપોલની જનરલ એસેમ્બલીની બેઠકનું ભારતમાં આયોજન
• 25 વર્ષ પહેલા ભારતમાં યોજાઈ હતી આ મહાસભા
• આતંકવાદ જેવા ખતરાનો સામનો કરવા માટે વિશ્વએ એક સાથે આવવું જોઈએ: PM

ભારતમાં 25 વર્ષ બાદ ઈન્ટરપોલની જનરલ એસેમ્બલીની બેઠક યોજાઈ રહી છે. વડાપ્રધાન નરેન્દ્ર મોદીએ મંગળવારે દિલ્હીના પ્રગતિ મેદાન ખાતે આયોજિત 90મી ઈન્ટરપોલ જનરલ એસેમ્બલીને સંબોધિત કરી અને કહ્યું કે ભારત સંયુક્ત રાષ્ટ્ર શાંતિ મિશનમાં મહત્વપૂર્ણ ભૂમિકા ભજવતો દેશ છે અને આઝાદી પહેલા પણ આપણે વિશ્વને વધુ સારું બનાવવા માટે બલિદાન આપ્યા (made sacrifices to make the world better) છે. તેમણે આતંકવાદ જેવા ખતરાનો સામનો કરવા માટે વિશ્વને એકસાથે આવવાની અપીલ કરી. તેમણે કહ્યું કે, હું આખી દુનિયાને કહેવા માંગુ છું કે આતંકવાદ, ડ્રગ્સ અને ભ્રષ્ટાચાર એક મોટો ખતરો છે. આ માટે સૌએ સાથે મળીને લડવું પડશે. તમને જણાવી દઈએ કે, આ મહાસભામાં 195 દેશોના પ્રતિનિધિઓ ભાગ લઈ રહ્યા છે. કહેવામાં આવી રહ્યું છે કે આ પ્રતિનિધિઓમાં સભ્ય દેશોના મંત્રીઓ, પોલીસ વડાઓ, સેન્ટ્રલ બ્યુરોના વડાઓ અને વરિષ્ઠ પોલીસ અધિકારીઓનો સમાવેશ થાય છે.

આ સમય ભારત અને ઈન્ટરપોલ બંને માટે મહત્વપૂર્ણઃ PM
વડાપ્રધાને પોતાના સંબોધનની શરૂઆતમાં કહ્યું કે, આ સમય ભારત અને ઈન્ટરપોલ બંને માટે મહત્વપૂર્ણ છે. ભારત આઝાદીના 75 વર્ષની ઉજવણી કરી રહ્યું છે અને તે આપણા લોકો, સંસ્કૃતિ અને સિદ્ધિઓની ઉજવણી છે. ઇન્ટરપોલ એક ઐતિહાસિક સીમાચિહ્નની નજીક પહોંચી રહ્યું છે. 2023માં ઇન્ટરપોલ તેના 100 વર્ષ પૂર્ણ કરશે. 

વડાપ્રધાને કહ્યું- નિષ્ફળતાઓમાંથી શીખો, જીતની ઉજવણી કરો 
પીએમ મોદીએ કહ્યું કે, આનંદિત થવાનો અને ચિંતન કરવાનો આ સારો સમય છે. નિષ્ફળતાઓમાંથી શીખો, જીતની ઉજવણી કરો અને પછી ભવિષ્યને આશા સાથે જુઓ. આઝાદી પહેલા પણ આપણે વિશ્વને વધુ સારી જગ્યા બનાવવા માટે બલિદાન આપ્યા છે. ભારતીય પોલીસ દળ 900થી વધુ રાષ્ટ્રીય અને 10,000 રાજ્ય કાયદાઓને લાગુ કરે છે. ઈન્ટરપોલ જનરલ એસેમ્બલીને સંબોધતા પીએમ મોદીએ વધુમાં કહ્યું કે, વિવિધતા અને લોકતંત્રને કાયમ રાખવામાં ભારત વિશ્વ માટે એક કેસ સ્ટડી છે. કાનૂની માળખામાં તફાવત હોવા છતાં છેલ્લા 99 વર્ષોમાં ઇન્ટરપોલે 195 દેશોમાં વૈશ્વિક સ્તર પર પોલીસ સંગઠનોને જોડ્યા છે. વડાપ્રધાન નરેન્દ્ર મોદીએ વધુમાં જણાવ્યું કે વધુ સારા વિશ્વ માટે (for a better world) આંતરરાષ્ટ્રીય સહયોગ જરૂરી છે.

Addressing the INTERPOL General Assembly in New Delhi. https://t.co/JrbpZ9hLq6

— Narendra Modi (@narendramodi) October 18, 2022

વિશ્વએ સાથે આવવાનો ઉચિત સમયઃ પીએમ 
પીએમ મોદીએ કહ્યું કે, જ્યારે જોખમ ગ્લોબલ હોય તો પ્રતિક્રિયા લોકલ હોઈ શકે નહીં. આતંકવાદ, ડ્રગ કાર્ટેલ, શિકારી ગેંગ અથવા સંગઠિત અપરાધ માટે કોઈ સુરક્ષિત આશ્રયસ્થાન ન હોવા જોઈએ. આ ખતરાઓને હરાવવા માટે વિશ્વએ સાથે આવવાનો ઉચિત સમય છે. એક સેફ અને સિક્યોર દુનિયા એ આપણી સહિયારી જવાબદારી છે. જ્યારે સારી શક્તિઓ સહકાર આપે છે, ત્યારે ગુનાહિત શક્તિઓ કામ કરી શકતી નથી.

સ્થાનિક હિતો માટે અમે વૈશ્વિક સહયોગની હાકલ કરીએ છીએઃ વડાપ્રધાન
ઈન્ટરપોલ જનરલ એસેમ્બલીમાં વડાપ્રધાન મોદીએ કહ્યું કે, આબોહવાથી સંબંધિત લક્ષ્યોથી લઈને કોવિડ રસી સુધી, ભારતે કોઈપણ સંકટમાં નેતૃત્વ કરવાની ઈચ્છા દર્શાવી છે. એવા સમયે જ્યારે રાષ્ટ્ર અને સમાજ માત્ર તેમના પોતાના હિતોનું ધ્યાન રાખનારા બની રહ્યા છે, ત્યારે ભારત વધુ વ્યાપક આંતરરાષ્ટ્રીય સહયોગની વાત કરી રહ્યું છે. અમે સ્થાનિક હિતો માટે વૈશ્વિક સહયોગની હાકલ કરીએ છીએ.

25 વર્ષ બાદ ભારતમાં યોજાઈ રહી છે ઈન્ટરપોલ જનરલ એસેમ્બલીની બેઠક
ભારતમાં ઈન્ટરપોલ જનરલ એસેમ્બલીની બેઠક 25 વર્ષના લાંબા ગાળા બાદ યોજાઈ રહી છે. છેલ્લી વખત ભારતમાં આ મહાસભા 1997માં યોજાઈ હતી. ભારતની આઝાદીની 75મી વર્ષગાંઠના અવસર પર આ વખતે આ મહાસભાનું આયોજન નવી દિલ્હીમાં કરવાની વિશેષ તક આપવામાં આવી છે.