હાથમાં તૂટેલા ફોન સાથે આફ્રિકાખંડના ગરીબ દેશ સેનેગલની વ્યક્તિ ઈંગ્લેન્ડની ફૂટબોલ ક્લબ લીવરપુલના સ્ટ્રાઇકર અને ફૂટબોલની દુનિયામાં જાણીતો ફૂટબોલર સાદિયો માને છે. આજે ઝાકઝમાળ દુનિયામાં દરેક સેલિબ્રિટીના હાથમાં લાખો રૂપિયાનો મોબાઇલ, કરોડો રૂપિયાની ઘડિયાળ અને પોતાનું પ્રાઇવેટ જેટ હોય છે ત્યારે લગભગ 6.8 મિલિયન ડોલર (લગભગ 43 કરોડ રૂપિયા)ની વાર્ષિક કમાણી કરતા આ 28 વર્ષીય સ્ટાર ફૂટબોલરની સાદગી આશ્ચર્ય પમાડે તેવી છે.
કરોડો કમાય છે આ ફૂટબોલર
સોશિયલ મીડિયા પર થઈ રહી છે તેની ચર્ચા
તેની સાદગી બધાંને નવાઈ પમાડે તેવી
આ ખેલાડી ઘણી જગ્યાએ પોતાના આ તૂટેલા-ફૂટેલા ફોન સાથે જોવા મળ્યો છે. એક ઇન્ટરવ્યૂ દરમિયાન જ્યારે આ અંગે તેને પૂછવામાં આવ્યું ત્યારે સાદિયો માનેએ જણાવ્યું, ''હું આને રિપેર કરાવી લઈશ.'' સાદિયોને વધુ એક સવાલ કરવામાં આવ્યો કે, 'તું શા માટે નવો ફોન નથી લેતો?' એ સવાલના જવાબમાં સાદિયોએ જણાવ્યું, ''હું આવા હજાર ફોન ખરીદી શકું છું. મારે 10 ફરારી, બે જેટ પ્લેન, 20 ડાયમંડ ઘડિયાળની શી જરૂર છે? મારે આ બધું શા માટે જોઈએ? મેં ગરીબી જોઈ છે.
વધુમાં તેણે કહ્યું, હું ભણી શક્યો નથી. આ જ કારણથી મેં સ્કૂલો બનાવી છે, જેથી ગરીબ બાળકો ભણી શકે. ફૂટબોલ સ્ટેડિયમ બનાવ્યાં છે. મારી પાસે જૂતાં નહોતાં, હું જૂતાં વિના રમતો. સારાં કપડાં નહોતાં, ખાવાનું નહોતું. આજે જ્યારે મને આટલું બધું મળ્યું ત્યારે તેનો દેખાડો કરવાના બદલે હું લોકોની સાથે વહેંચવા ઇચ્છું છું.''