લોકસભા / ઇસ્લામમાં લગ્ન કોન્ટ્રાક્ટ છે, જેને જનમ જનમનું બંધન ન બનાવોઃ ઓવૈસી

અસદુદ્દીન ઓવૈસીએ પોતાના ભાષણની શરૂઆત કડક વલણમાં કરી. તેમણે કહ્યું કે હું ત્રીજી વખત આ બિલ વિરૂદ્ધ ઉભો છું અને જ્યાં સુધી જીવીશ ત્યાં સુધી આ બિલનો વિરોધ કરતો રહીશ. ઓવૈસીએ કહ્યું કે, ત્રિપલ તલાકને આ સરકારે ગુનામાં નાખ્યું છે. તેવામાં ફરી મહિલાઓનું પાલન-પોષણ કોણ કરશે.

હૈદરાબાદ સાંસદે કહ્યું કે, ઇસ્લામમાં નિકાહનામુ છે, તમે પણ એક કંડિશન લગાવી દો કે જો કોઇ ત્રિપલ તલાક આપે તો તેને મહિલાની મેહરની રકમના 500 ગુના દંડ આપવો પડશે. ત્યારે ઓવૈસીએ કહ્યું કે, ઇસ્લામમાં લગ્ન એક કોન્ટ્રેક્ટ છે અને તમે કહી રહ્યા છો કે જનમ જનમનો સાથ છે. એવું ન કરો અને અમારી વાત સમજો.

AIMIM સાંસદે કહ્યું કે જો કોઇ મુસલમાન વ્યક્તિ ભૂલથી પણ ત્રિપલ તલાક બોલે છે તો લગ્ન તૂટતા નથી. તેમણે દાવો કર્યો કે ઇસ્લામમાં 9 પ્રકારના તલાક હોય છે અને ત્રિપલ તલાક માત્ર તેમનું એક છે. 

ત્રિપલ તલાક બિલના વિરોધમાં ઓવૈસીએ કહ્યું કે આ મહિલા પર બોજ વધશે, કારણ કે જો પતિ જેલ ચાલ્યો જશે તો પછી મહિલાઓને પૈસા કોણ આપશે.

વધુમાં તેમણે કહ્યું કે, માની લો કોઇ કોર્ટે ત્રિપલ તલાક આપનાર પુરૂષને ત્રણ વર્ષની સજા ફટકારી દે, તો પછી મહિલા ત્રણ વર્ષ સુધી તેની રાહમાં શા માટે બેઠી રહે? તેની સાથે જ ઓવૈસીએ કહ્યું કે શું મહિલા ત્રણ વર્ષ બાદ કહેશે... બહારો ફૂલ બરસાઓ મેરા મહેબૂબ આયા હે.

અસદુદ્દીન ઓવૈસીની આ વાતની સાથે સદનમાં હસવાનું શરૂ થઇ ગયું. આ સિવાય અસદુદ્દીન ઓવૈસીએ સરકારને મૉબ લિંચિંગ પર કાયદો બનાવવાની પણ અપીલ કરી.