ટેરર ફંડિંગ / વૈશ્વિક આતંકવાદી હાફિઝ સઈદને વધુ 15 વર્ષની સજા, હવે તેને 5 કેસમાં કાપવી પડશે 36 વર્ષની સજા

• આંતકવાદી હાફિઝ સઈદને વધુ 15 વર્ષની સજા 
• ટેરર ફંડિંગ મામલે 5 કેસમાં સજા સંભળાવાઇ
• કુલ 36 વર્ષની સામૂહિક સજા કાપવી પડશે

પાકિસ્તાનની એક આતંકવાદ વિરોધી કોર્ટે મુંબઇ પર થયેલા આતંકવાદી હુમલાના માસ્ટરમાઇન્ડ અને જમાત-ઉદ-દાવા પ્રમુખ હાફિઝ સઈદને ટેરર ફંડિંગ મામલે 15 વર્ષની સજા સંભળાવી છે. કોર્ટે તેના પર 2 લાખ રૂપિયાનો દંડ પણ લગાવ્યો છે. સઈદને ટેરર ફંડિંગ કરવાના ચાર કેસમાં પહેલા જ દોષી જાહેર કરાઇ ચૂક્યો છે અને હવે તેને 21 વર્ષની સજા થઇ છે.

સઈદને ટેરર ફંડિંગના પાંચ કેસમાં કોટ લખપત જેલ લાહોરમાં 36 વર્ષની સજા કાપવી પડશે, પરંતુ આ કેસોમાં તેમની સજાઓ સાથે સાથે ચાલશે. મહત્વનું છે કે, પાકિસ્તાનની આતંકવાદ વિરોધી કોર્ટે જમાત-ઉ-દાવા વિરૂદ્ધ 41 કેસ દાખલ કર્યા છે, જેમાંથી હાલ 25 કેસમાં જ ચુકાદા આવ્યા છે.

કાર્યવાહીના નામે પાકિસ્તાનનો પેંતરો?

એવા અહેવાલો છે કે જેલમાં હાફિઝ સઇદને "વીઆઇપી ટ્રીટમેન્ટ" આપવામાં આવી રહી છે. હકીકતમાં વૈશ્વિક સંસ્થા, ફાઇનાન્સિયલ એક્શન ટાસ્ક ફોર્સ (FATF) એ પાકિસ્તાનને ફેબ્રુઆરી 2021 સુધીમાં 'ગ્રે' યાદીમાં મૂકવાનો નિર્ણય લીધો છે. જેમાંથી બહાર નીકળવા માટે પાકિસ્તાન આતંકવાદીઓ સામે કાર્યવાહી કરવાનો પેંતરો અપનાવી રહ્યું છે.

અમેરિકાનું સઈદ પર 10 કરોડ ડોલરનું ઈનામ

અમેરિકાએ સઈદ પર 10 કરોડ ડોલરનું ઇનામ મૂક્યું છે. ગત વર્ષે 17 જુલાઈના રોજ ટેરર ​​ફંડિંગના કેસમાં તેની ધરપકડ કરવામાં આવી હતી. આ વર્ષે ફેબ્રુઆરીમાં, આતંકવાદ વિરોધી અદાલતે તેને બે કેસમાં 11 વર્ષની જેલની સજા સંભળાવી હતી. આ પછી, નવેમ્બરમાં, સઈદને બે કેસમાં 10 વર્ષની સજા ફટકારી હતી.

હવે તેને 15 વર્ષની સજા

હવે તેને 15 વર્ષની સજા થઈ છે. એક અધિકારીએ જણાવ્યું હતું કે સઈદ સહિત JuD (જમાત ઉલ દાવા) નેતાઓને ઉચ્ચ સુરક્ષા વચ્ચે કોર્ટમાં લાવવામાં આવ્યા હતા અને મીડિયાને કાર્યવાહી કવર કરવાની અનુમતિ અપાઈ ન હતી.