લીંબુ બાદ કેરીનો ચોરીનો સતાવ્યો ડર, વાડી માલિકે ચોરી અટકાવવા ખાસ ઉપાય અજમાવ્યો, વાડી માલિક થઇ ગયા નિશ્ચિંત
વલસાડમાં કેરીની ચોરી અટકાવવા નવતર પ્રયોગ
CCTV કેમેરા લગાવી આંબાવાડીની રખેવાળી
4 એકરની વાડીમાં 8 CCTV કેમેરા લગાવ્યા
મોંઘવારીનું પ્રમાણ વધી રહ્યું છે. જીવન જરુરી દરેક વસ્તુના ભાવ આસમાને પહોંચ્યા છે. તેવામાં હવે આપણે કદી વિચાર્યુ પણ ન હોય તેવી વસ્તુઓની ચોરીઓ થઇ રહી છે. અત્યારે લીંબુના ભાવ આસમાને છે તો ચોર ટોળકીએ લીંબુની ચોરી તરફ વળ્યા છે. તો બીજી તરફ કેરી પણ આ વખતે મોંઘી છે. એટલે કેરીની પણ ચોરી થાય તેમાં કોઇ નવાઇ નહી. જો કે મોંઘવારીને જોતા વલસાડમાં કેરીની ચોરી અટકાવવા વાડી માલિકે એક નવતર પ્રયોગ હાથ ધર્યો.
કેરીની રખેવાળી સીસીટીવીથી
સીસીટીવી કેમેરા આપણે કોર્પોરેટ ઑફિસમાં કે રહેણાંક વિસ્તારો, મોલ મલ્ટીપ્લેક્સના પાર્કિંગમાં જોયા હશે પરંતુ હવે તો ખેતરો અને વાડીઓમાં પણ સીસીટીવી કેમેરા લગાવવાનો વારો આવ્યો છે. કારણ કે મોંઘવારી અને ગ્લોબલ વોર્મિંગ. વાત છે વલસાડની, અહીં એક વાડી માલિકે કેરીનો પાક બચાવવા માટે વાડીમાં સીસીટીવી લગાવ્યા. 4 એકરની વાડીંમાં 8 સીસીટીવી લગાવ્યા છે જેને કારણે ઘરે બેઠા તેઓ પોતાની વાડીની રખેવાળી કરી શકે.
વાડીમાં કેરીનો માત્ર 15ટકા પાક
આ વર્ષે કેરીનો પાક ઓછો ઉતર્યો છે. કમોસમી વરસાદ અને બિનઅનુકૂળ વાતાવરણને કારણે કેરી જોઇએ તેટલા પ્રમાણમાં થઇ નથી. માત્ર 15 ટકા જ પાક બચ્યો છે. આથી આ કેરી પણ કોઇ ચોરી ન જાય તેવી ચિંતા તેમને સતાવતી હતી. આથી તેઓએ વાડીમાં સીસીટીવી લગાવવાનું નક્કી કર્યું. આ કારણે વાડીમાં કેરીની ચોરી અટકી હોવાનો પણ દાવો થઇ રહ્યો છે...
લીંબુની થઇ ચોરી
હાલ લીંબુના ભાવની બોલ બાલા છે. લીંબુના ભાવ પર સૌની નજર રહે છે. ઉનાળાની શરૂઆત થતાની સાથે જ લીંબુના ભાવ આસમાને પહોંચતાં સામાન્યમાં સામાન્ય માણસને પણ જેની અસર થઈ છે. તેની સાથે સાથે તેમણે લીંબુની સુરક્ષા પણ વધારવી પડી છે. કામરેજના કઠોર ગામે 6.5 વીઘામાં કરેલ લીંબુની વાડીમાંથી 140 કિલો જેટલા લીબુની ચોરી થઈ હતી.બે - ત્રણ દિવસ અગાઉ ખેડૂતે ખેતરમાં તૈયાર થયેલા લીંબુને ઉતારી તેને અલગ અલગ કરી ખેતરમાં મુક્યા હતાં. રાત્રીના સમયે તસ્કરો 140 કિલો લીંબુની ચોરી કરી ગયા હતાં. જે અંગે બીજા દિવસે સવારે જથ્થો વિખેરાયેલો જોવા મળતાં ચોરી થયાનો અંદાજ આવ્યો હતો. આ મામલે લીંબુના માલિકે અજાણ્યા શખ્સો સામે લીંબુ ચોરાયાની ફરિયાદ નોંધાવી હતી.