સલાહ / વેક્સિનના બંને ડોઝ લેનાર લોકો જ સામૂહિક કાર્યક્રમોમાં ભાગ લેઃ કેન્દ્ર

• કોરોનાની ત્રીજી લહેરના એંધાણ?
• જાહેર સમારોહ અને મેળાવડામાં જવાનું ટાળો
• ભારતમાં હજુ બીજી લહેર સમાપ્ત થઈ નથી

સરકારે જાહેર જનતાને આપી ચેતવણી

સરકારે ફરી એક વાર જાહેર જનતાને સલાહ આપતાં જણાવ્યું છે કે, કોરોનાના વધતા જતા કેસોને ધ્યાનમાં રાખીને લોકોએ સામૂહિક અને જાહેર સમારોહ અને મેળાવડામાં જવાનું બને ત્યાં સુધી ટાળવું જોઈએ અને જો અત્યંત જરૂરી હોય તો આ પ્રકારના સામૂહિક સમારોહમાં એવા જ લોકોએ ભાગ લેવો જોઈએ કે જેમણે કોરોના વેક્સિનના બંને ડોઝ લઈ લીધા હોય. સરકારે જણાવ્યું છે કે, તહેવારોને ધ્યાનમાં રાખતાં કોરોના ગાઈડલાઈનનું પાલન થવું અત્યંત આવશ્યક અને અનિવાર્ય છે. એક પત્રકાર પરિષદમાં સરકાર તરફથી એવી ચેતવણી આપવામાં આવી છે કે દેશમાં ભલે કોરોના સંક્રમણના કેસ થોડા ઓછા થતા દેખાઈ રહ્યાં હોય, પરંતુ ભારતમાં હજુ બીજી લહેર સમાપ્ત થઈ નથી.

વીકલી પોઝિટિવિટી રેટમાં એકંદરે ઘટાડો નોંધાયો

સરકાર દ્વારા એવું જણાવવામાં આવ્યું છે કે, વીકલી પોઝિટિવિટી રેટમાં એકંદરે ઘટાડો નોંધાઈ રહ્યો છે, પરંતુ સ્થિતિ હજુ સંપૂર્ણપણે સારી હોવાની નજરે પડતી નથી. કેન્દ્રીય આરોગ્ય સચિવ રાજેશ ભૂષણે જણાવ્યું કે, દેશના 39 જિલ્લામાં 3 ઓગસ્ટે સમાપ્ત થયેલા સપ્તાહમાં કોરોનાનો વીકલી પોઝિટિવિટી રેટ ૧૦ ટકાથી વધુ રહ્યો છે, જ્યારે 38 જિલ્લામાં આ રેટ 5 થી 10 ટકા વચ્ચે જોવા મળ્યો છે. 

દેશમાં 16 ટકા પુખ્ત વસ્તીને વેક્સિનના બંને ડોઝ અપાયા

તેમણે જણાવ્યું કે, દેશમાં 16 ટકા પુખ્ત વસ્તીને કોવિડ વેક્સિનના બંને ડોઝ આપવામાં આવી ચૂક્યા છે, જ્યારે 54 ટકા લોકોને વેક્સિનનો ઓછામાં ઓછો એક ડોઝ આપવામાં આવ્યો છે. રાજેશ ભૂષણે વધુમાં જણાવ્યું કે, સિક્કિમ, દાદરા અને નગરહવેલી તથા હિમાચલપ્રદેશમાં ૧૦૦ ટકા પુખ્ત વસ્તીને કોવિડ વેક્સિનનો ઓછામાં ઓછો એક ડોઝ આપવામાં આવી ચૂક્યો છે.