- અઢી વર્ષમાં કેરીનો રસ- મેંગો મિલ્ક શેકના 86 નમૂના જ લેવાયા
- બે મેંગો મિલ્ક શેકના નમૂના અપ્રમાણિત જાહેર કરાયા
અમદાવાદ, મ્યુનિસિપલ કોર્પોરેશનના ફૂડ વિભાગ દ્વારા શહેરમાંથી ફૂડ સેફ્ટી એન્ડ સ્ટાન્ડર્ડ એક્ટ-2006 હેઠળ વિભિન્ન ખાદ્યપદાર્થના એકમો ખાતેથી ખાદ્યપદાર્થના નમૂના લેવાય છે. ત્યાર બાદ તેને ચકાસણી માટે નવરંગપુરા સ્થિત મ્યુનિ. લેબોરેટરીમાં મોકલવામાં આવે છે. દરમિયાન, તંત્ર દ્વારા છેલ્લાં અઢી વર્ષમાં કેરીનો રસ અને મેંગો મિલ્ક શેકના 86 નમૂના લેવાયા હોવાની માહિતી જાણવા મળી છે.
મસાલા છાશને પણ તંત્ર દ્વારા મિસ બ્રાન્ડેડ જાહેર કરાઈ
ફૂડ વિભાગનાં સૂત્રો કહે છે, ચાલુ મે મહિનાની તા. 6થી 12ના સમયગાળા દરમિયાન મેંગો મિલ્ક શેક અને કેરીના રસના કુલ 14 નમૂના લેવાયા હતા. આઇસ્ક્રીમ, ઘી, દહીં જેવા ડેરી પ્રોડક્ટ્સના 10, મીઠાઈના છ, નમકીનના ત્રણ, ખાદ્યતેલના પાંચ, બેસનના ત્રણ, મસાલાના 28 અને અન્ય 44 મળીને કુલ 113 નમૂના લીધા હતા. ઉપરાંત બહેરામપુરાના ગુલીવાલા કંપાઉન્ડમાં આવેલી સાગર ફરસાણ એન્ડ નમકીનની ફરસી પૂરી, બાપુનગરની હરદાસનગર શાકમાર્કેટના રવીન્દ્ર સ્ટોર્સની કોકોનટ કોફી, સરસપુરના સત્યમ્ એપાર્ટમેન્ટમાં આવેલા મનીષ સ્ટોર્સની કચ્ચા આમને તંત્રે મ્યુનિ. લેબની ચકાસણી બાદ મિસ બ્રાન્ડેડ જાહેર કરી હતી. નારણપુરાના શિવાલિક યશ ખાતે આવેલી સોલાહ એન્ટરપ્રાઇઝ પ્રા. લિ.ની 200 મિલી પેક ધરાવતી પ્લાસ્ટિક બોટલની મસાલા છાશને પણ તંત્ર દ્વારા મિસ બ્રાન્ડેડ જાહેર કરાઈ હતી.
વર્ષ 2022 મેંગો મિલ્ક શેકના 34 નમૂના લેવાયા
હવે છેલ્લાં અઢી વર્ષમાં એટલે કે વર્ષ 2021, 2022 અને ચાલુ વર્ષ 2023 માં તા. 15 મે સુધીની ફૂડ વિભાગની કેરીનો રસ અને મેંગો મિલ્ક શેકના નમૂના લેવાની કામગીરીની વિગત તપાસતાં વર્ષ 2021 માં કેરીના રસનો એક અને મેંગો મિલ્ક શેકના 21 નમૂના મળીને કુલ 22 નમૂના લેવાયા હતા. આ તમામ નમૂનાને ફૂડ વિભાગ દ્વારા પ્રમાણિત જાહેર કરાયા હતા, જ્યારે વર્ષ 2022 મેંગો મિલ્ક શેકના 34 નમૂના લેવાયા હતા અને આ તમામ નમૂનાને તંત્રએ પ્રમાણિત જાહેર કર્યા હતા.જ્યારે ચાલુ વર્ષ 2023ની તા. 15 મે સુધી ફૂડ વિભાગે કેરીના રસના પાંચ, મેંગો મિલ્ક શેકના 25 મળીને કુલ 30 નમૂના લેતાં તેમાંથી કેરીના રસના ચાર અને મેંગો શેકના 18 નમૂના પ્રમાણિત, મેંગો મિલ્ક શેકના બે નમૂના અપ્રમાણિત અને કેરીના રસનો એક અને મેંગો મિલ્ક
શેકના પાંચ મળી કુલ છ નમૂનાનો રિપોર્ટ હજુ આવ્યો નથી.
567 કિલો બિનઆરોગ્યપ્રદ ખાદ્યપદાર્થનો નાશ
મ્યુનિ. ફૂડ વિભાગ દ્વારા અપાયેલી સત્તાવાર માહિતીના આંકડા દર્શાવે છે કે છેલ્લાં અઢી વર્ષમાં કેરીના રસના અને મેંગો મિલ્ક શેકના લેવાયેલા 86 નમૂના પૈકી 78 પ્રમાણિત જાહેર કરાયા છે, જ્યારે બે નમૂના અપ્રમાણિત ઠર્યા છે. તંત્ર દ્વારા સરદારનગરના જૂના ઓક્ટ્રોય નાકા પાસેના સંકલ્પ ઈન્ડસ્ટ્રિયલ એસ્ટેટના પ્લોટ નં. 110ના જૈન ફૂડ્સમાંથી ગત તા. 17 એપ્રિલ, 2023એ મેંગો મિલ્ક શેકનો નમૂનો લેવાયો હતો, જે મ્યુનિ. લેબમાં ચકાસણી બાદ સબસ્ટાન્ડર્ડ જાહેર થયો છે. તા. 6 થી 12 મે સુધી શહેરમાંથી તંત્રે કુલ 567 કિલો બિનઆરોગ્યપ્રદ ખાદ્યપદાર્થનો નાશ કર્યો હતો. ઉપરાંત 745 લિટર એક નજરમાં હાનિકારક લાગતું પાણીપૂરીનું પાણી વગેરેનો પણ નાશ કરાયો હતો.
