ઈલેક્ટ્રોનિક્સ અને ઈન્ફોર્મેશન ટેકનોલોજી મંત્રાલયે આજે ઑનલાઇન ગેમિંગ કંપનીઓ માટે નવો પ્રસ્તાવ તૈયાર કરેલ છે. આ કંપનીઓને ઇન્ફોર્મેશન ટેક્નોલોજીના નવા નિયમો અંતર્ગત લાવવામાં આવશે.
IT મંત્રાલયે ઑનલાઇન ગેમિંગ કંપનીઓ સંબંધિત ભર્યું પગલું
સેલ્ફ રેગ્યુલેટરી સિસ્ટમ બનાવવાને લઇને પ્રસ્તાવ
ફરિયાદોથી લઇને પેમેન્ટ સુધીની તમામ બાબતો અંગે નિયમો
કેન્દ્ર સરકારે ઑનલાઇન ગેમિંગ કંપનીઓ માટે સેલ્ફ રેગ્યુલેટરી સિસ્ટમ બનાવવાને લઇને પ્રસ્તાવ તૈયાર કરેલ છે. સાથે જ ભારતમાં સ્થિત તેમનાં સરનામાંની સત્યતાની ચકાસણી કરવી અનિવાર્ય કરવા જેવા ઘણાં નિયમોને ઊમેરવામાં આવ્યાં છે. નવા નિયમાનુસાર ઑનલાઇન ગેમિંગ કંપનીને નવા ઇન્ફોર્મેશન ટેક્નોલોજીના નવા નિયમો અંતર્ગત લાવવામાં આવશે.
ગેમ્સમાં જીતેલી રકમ જણાવવું આવશ્યક
નિયમાનુસાર ડ્રાફ્ટમાં ગેમિંગ કંપનીઓ માટે તપાસ સંબંધિત વધારાની જોગવાઈઓ કરવામાં આવી છે. તેમાં સેલ્ફ રેગ્યુલેટરી સિસ્ટમમાં રજિસ્ટર થયેલ ઓનલાઇન ગેમ્સમાં સમાવિષ્ટ લોકોએ જમા થયેલી રકમમાંથી રિફંડ તેમજ જીતેલી રકમનાં વિતરણ અને ફીઝની સાથે અન્ય ખર્ચાઓ વિષયક માહિતી પણ આપવી પડશે.
IT કાયદા વિશે જાણો
ઇલેક્ટ્રોનિક્સ અને ઈન્ફોર્મેશન ટેકનોલોજી મંત્રાલયનાં નિયમો અનુસાર ઑનલાઈન ગેમિંગ કંપનીઓ માટે ભારતમાં જાહેર કરવામાં આવેલ કાયદાઓનું પાલન કરવું જરૂરી છે. MEITYએ કહ્યું કે જુગાર અને સટ્ટા સંબંધિત કાયદાઓ આ કંપનીઓ પર લાગૂ પડશે. મંત્રાલયે જાણકારી આપી છે કે ડ્રાફ્ટ સુધારાનો ઉદ્દેશ્ય ઓનલાઈન ગેમિંગ ગતિવિધિઓની વૃદ્ધિને સુનિશ્ચિત કરવાનો છે સાથે જ તેને જવાબદાર રીતે સંચાલિત કરવું જોઇએ.
ફરિયાદોનો આવશે નિવેડો
સેલ્ફ રેગ્યુલેટરી બોડીનું IT મંત્રાલયમાં રજિસ્ટ્રેશન કરવું પડશે. આ બોડી એક ફરિયાદ થકી આવનારી અનેક ફરિયાદોનો નિવેડો પણ લાવશે. મંત્રાલયે ઓનલાઇન ગેમિંગનાં નિયમન સંબંધિત આ નિયમોનાં ડ્રાફ્ટ પર 17 જાન્યુઆરી 2023 સુધી સાર્વજનિક ટિપ્પણીઓને આમંત્રિત કરેલ છે.