આજે World Health Dayની ઉજવણી કરવામાં આવી રહી છે. હાલમાં હેલ્થની સાથે કોરોના સિવાય કંઈ યાદ આવે એ શક્ય જ નથી. WHOએ આ દિવસને કોરોનાની વિપરિત સ્થિતિમાં પોતાની ફરજ બજાવી રહેલા ડોક્ટર્સને સમર્પિત કર્યો છે. એટલે તે તમામ મેડિકલ કમાન્ડોઝ કે જે દિન- રાત કોરોના દર્દીઓની સેવા કરી રહ્યા છે. આવી જ એક વાત મૂળ છોટાઉદેપુરના ગુજરાતી ડોક્ટર શ્રેયા શાહની છે. VTVGujarati.com સાથે વાત કરતા તેઓ કહે છે કે હું વર્ષોથી અમેરિકાના જ્યોર્જિયા સ્ટેટમાં રહું છું અને હાલમાં નોર્થ ઈસ્ટ જ્યોર્જિયા હેલ્થ સિસ્ટમમાં લેબ ટેકનિશ્યનની ફરજ બજાવી બજાવું છે. ત્યારે તેમણે અમેરિકાની સ્થિતિ, લોકોની ટ્રીટમેન્ટ, લોકોમાં કોરોનાને લઈને ડર વગેરે વિશે અને સાથે જ તમામ ડોક્ટર્સ અને સ્ટાફની કઈ રીતે ખાસ ટ્રીટમેન્ટ અપાય છે તે વિશે શું કહે છે.
આજે World Health Day
WHOએ મેડિકલ કમાન્ડોને સમર્પિત કર્યો આજનો દિવસ
અમેરિકામાં આ રીતે થાય છે કોવિડ 19 પેશન્ટ્સનું સેમ્પલ ટેસ્ટિંગ
અમેરિકામાં આવી છે સ્થિતિ
શ્રેયા શાહ કહે છે કે હું એક લેબ ટેક્નિશ્યનની ફરજ બજાવું છું. હું આા કામ છેલ્લા 8 વર્ષથી કરું છું, પણ જ્યારથી કોરોનાનો ફેલાવો થઈ રહ્યો છે ત્યારથી અમેરિકાની સ્થિતિ વધારે જ ખરાબ છે. અહીં લોકોને ટ્રીટમેન્ટ તો મળી રહે છે પણ ક્યારેક લોકો જ ટ્રીટમેન્ટ માટે આવતા ગભરાય છે. લગભગ 50 ટકા લોકોમાં કોવિડ 19ને લઈને ડર અનુભવાય છે. અમેરિકામાં કોરોનાના કેસ સતત વધી રહ્યા હોવાથી હવે હોસ્પિટલમાં સ્ટાફ પણ પોતે પોતાની કૅર કરવા લાગ્યો છે અને સતર્ક બન્યો છે. તેઓ કહે છે કે હું દિવસના લગભગ 15-20 લોકોના સેમ્પલ લઉં છું. આ સમયે મારે કેટલીક ખાસ વાતોનું ધ્યાન રાખવું પડે છે. ખાસ કરીને PPE સૂટ વિના અમે આ કામ પણ કરી શકતા નથી. દરેક પેશન્ટે નવી PPE કીટ યૂઝ કરવાની રહે છે. હોસ્પિટલ સ્ટાફનું સંપૂર્ણ રીતે ધ્યાન રાખે છે. હોસ્પિટલમાં ડોક્ટરથી લઈને સફાઈ કર્મચારી સુધી દરેક માટે આ પીપીઈ સૂટ ફરજિયાત છે. ડોક્ટર્સ અને લેબ ટેકનિશ્યિન કે નર્સે વારેઘડી આ સૂટ બદલવા પડે છે જેથી અન્ય પેશન્ટને ઈન્ફેક્શન ન લાગે.
કામની સાથે સેલ્ફ પ્રોટેક્શન ખૂબ જ જરૂરી
PPE સૂટ માટે વધુમાં શ્રેયા જણાવે છે કે આ સૂટને કાઢવા અને પહેરવાની ખાસ રીત હોય છે. જો તમે તેને ફોલો ન કરો તો તમે પણ ઈન્ફેક્ટેડ થઈ શકો છો. મારી સાથે કામ કરનારા મારા અન્ય એક સહકર્મી પણ પોઝિટિવ આવ્યા છે. તેમને ક્વૉરન્ટાઈન કરાયા હતા અને હવે તેમનો રિપોર્ટ નેગેટિવ આવતાં તેઓ ડ્યુટી પર પરત આવ્યા છે. પણ મને આ સેવાનો અવસર મળ્યો છે અને હું તેને માટે સતત કામ કરું છું તેનો ગર્વ છે. જ્યારથી કોવિડ 19 ફેલાયો છે ત્યારથી હાલ સુધી મેં એક પણ રજા લીધી નથી. હું સતત કામમાં રહું છું. પણ સાથે મારી સેફ્ટીનું પણ ધ્યાન રાખું છું.
આ રીતે કરે છે સેલ્ફ પ્રોટેક્ટ
દિવસ દરમિયાન ગરમ પાણી પીવું, ગરમ પાણીના કોગળા કરવા, દિવસમાં 2 ગરમ પાણીની સ્ટીમ લેવી અને કાઢો પીવો. જો કે તમામ ડોક્ટર્સે પોતાને સેફ રાખવા આ કામ કરવું પડે છે. આની સાઈડ ઈફેક્ટ એ છે કે સતત વધારે પડતા ગરમ પાણીના ઉપયોગને કારણે સ્કીન ડ્રાય થઈ જાય છે. આ સિવાય ઘરમાં આવતા તરત જ ગરમ પાણીથી નહાવું, ગરમ પાણીની લોન્ડ્રીમાં તમામ કપડાં ધોવા નાંખવા અને શૂઝ અલગ રાખવા તેમજ મારી કાર પણ અલગ રહે છે તેને મારા સિવાય કોઈ અડતું પણ નથી. જેથી અન્ય કોઈને ઈન્ફેક્શનનો ખતરો ન રહે.
પરિવાર સાથે પડે છે આવી નાની મોટી મુશ્કેલીઓ
શ્રેયા કહે છે કે મારા પરિવારને બહારના લોકો કરતાં મારાથી જ વધારે ખતરો રહે છે. મારા બાળકો છે અને મારી સાથે મારા 92 વર્ષના સાસુ રહે છે. ઘરમાં બધા મારાથી 4થી 5 ફૂટ દૂર જ રહે છે. અમે સોશ્યલ ડિસ્ટન્સિંગને પ્રાયોરિટી આપીએ છીએ. મારા સાસુ, પતિ અને બાળકોનો મને ખૂબ જ સપોર્ટ રહે છે. હોસ્પિટલનો ઓર્ડર છે કે તમે પોતે માંદા ન પડો ત્યાં સુધી સતત ડ્યુટી પર હાજર રહેવાનું છે. કોઈએ રજા લેવાની નથી. હાલમાં સ્થિતિ થોડી નાજુક છે તો દરેક પોતાની ફરજ પૂરી કરે અને સેવા કરે.
એક સોશ્યલ મેસેજ
શ્રેયા કહે છે કે હું દરેક લોકોને વિનંતી કરીશ કે સૌ પહેલાં પોતે જ કોવિડ 19થી બચવાનો પ્રયાસ કરે, સોશ્યલ ડિસ્ટન્સિંગ જાળવે અને શક્ય તેટલો વધુ માસ્કનો ઉપયોગ કરે. પણ તેમ છતાં જો તમને થોડી પણ શંકા હોય તો તરત જ ટેસ્ટ કરાવો અને ક્વૉરન્ટાઈન થાઓ. જેથી આ રોગ વધારે ફેલાય નહીં અને અન્ય લોકો ઝડપથી સુરક્ષિત થઈ શકે. જો તમે તેને પહેલાંથી જ ટ્રીટ કરશો તો તમે સાજા થઈ શકશો. દરેક હોસ્પિટલમાં સ્ટાફ તમારી સેવા માટે હાજર છે. તો સરકારને પણ મદદ રૂપ થાઓ અને તમારા પરિવારને પણ સેફ રાખો. શક્ય તેટલું ઘરે રહો, સેફ રહો. જલ્દી જ ભાગી જશે કોરોના.