ભરૂચ જિલ્લાના ઝઘડીયા તાલુકાના સારસા ગામના નાળા પાસે જીપ અને બાઇક વચ્ચે થયેલા અકસ્માતમાં વૃદ્ધાનું મોત થયું હતું. રાજપારડી પોલીસની તપાસમાં બાઇક સવારની હત્યા કરવા માટે જાણી જોઇને અકસ્માત કરવામાં આવ્યો હોવાની વિગતો બહાર આવતાં આરોપી જીપચાલકની ધરપકડ કરવામાં આવી છે.
જીપ અને બાઇક વચ્ચે અકસ્માત નહીં પરંતુ કાવતરૂં
આરોપી જીપ ચાલકની ધરપકડ
દિનેશ વસાવા અને જીપ ચાલકની પત્ની વચ્ચે પ્રેમ સંબધ હતો
સરસા ગામના દિનેશ વસાવા તેમની પુત્રી દેવીકા અને માતા વનિતાબેન સાથે 4 જુલાઇના રોજ સરસાથી રાજપારડી બાઇક લઇને આવ્યાં હતાં. તેઓ રાજપારડીથી કામ પતાવી પર સરસા આવી રહ્યાં હતાં. આ દરમિયાન અશોક ઉર્ફે વિષ્ણુ વસાવાએ તેની જીપ પુરઝડપે હંકારી તેઓની બાઇકને ટકકર મારી હતી. આ અકસ્માતમાં બાઇકની પાછળ બેઠેલા વનિતાબેનનું માથુ ધડથી અલગ થઇ જતાં તેમનું મૃત્યુ થયું હતું. જ્યારે દિનેશ અને તેની પુત્રીને ઇજા પહોંચી હતી.
આ બનાવની વધુ તપાસ રાજપારડી પોલીસે શરૂ કરતા ચોંકાવનારા ખુલાસા સામે આવ્યા હતા. જેમાં દિનેશ વસાવા અને અકસ્માત સર્જનાર વિષ્ણુ વસાવાની પત્ની વચ્ચે પ્રેમ સંબધ હતો. જેના કારણે વિષ્ણુ દિનેશની હત્યા કરવા માંગતો હતો. તેણે દિનેશને બાઇક લઇને જતાં જોઇ લેતાં જીપ લઇ તેમનો પીછો કર્યો હતો.
રાજપારડીમાં તેઓ ન મળી આવતાં તે સારસા ગામના નાળા પાસે રાહ જોઇને ઉભો રહ્યો હતો અને દિનેશ વસાવા બાઇક લઇને આવ્યો. ત્યારે જીપથી બાઇકને ટક્કર મારી હતી. જેમાં વનિતાબેનનું મૃત્યું થયું હતું. તો દિનેશ અને તેની પુત્રીને ઓછીવત્તી ઇજાઓ થયેલ હતી. પોલીસે આરોપી અશોક ઉર્ફે વિષ્ણુ જિતુભાઈ વસાવાની યુક્તિ પ્રયુક્તિથી પુછપરછ કરતા તે ભાંગી પડેલો અને ગુનાની કબુલાત કરી લીધી હતી. પોલીસે આરોપીની ધરપકડ કરી કાયદેસરની કાર્યવાહી હાથ ધરી છે.