કોઈ મિત્ર દેશમાં જઈએ છીએ અથવા તેમને ફોન કરીએ છીએ ત્યારે તેઓ વિચારે છે કે અમે તેમની પાસે પૈસા માંગવા આવ્યા છીએ: પાકિસ્તાની PM
પાકિસ્તાની PMનું વકીલોની કોન્ફરન્સને સંબોધિત કરતાં આપ્યું મોટું નિવેદન
હવે તો મિત્ર દેશો પણ આપણને ભિખારી સમજે છે: પાકિસ્તાની PM
છેલ્લા 75 વર્ષથી કટોરો લઈને ભટકી રહ્યા છીએ: પાકિસ્તાની PM
પાકિસ્તાની PMએ વકીલોની કોન્ફરન્સને સંબોધિત કરતી વખતે એક એવું નિવેદન આપ્યું છે. શાહબાઝ શરીફનું આ નિવેદન હાલ દુનિયાભરના મીડિયામાં સ્થાન પામ્યું છે. વાત જાણે એમ છે કે પાકિસ્તાનના વડા પ્રધાન શાહબાઝ શરીફે ગુરુવારે કહ્યું કે, સાથી દેશો પણ હવે પાકિસ્તાનને એક એવા દેશ તરીકે જોઈ રહ્યા છે જે પૈસાની ભીખ માંગે છે. સ્થાનિક અખબારે શરીફને ટાંકીને જણાવ્યું હતું કે, વડાપ્રધાને બુધવારે વકીલોની એક કોન્ફરન્સને સંબોધિત કરતાં કહ્યું હતું કે, આજે જ્યારે આપણે કોઈ મિત્ર દેશમાં જઈએ છીએ અથવા તેમને ફોન કરીએ છીએ ત્યારે તેઓ વિચારે છે કે અમે તેમની પાસે પૈસા માંગવા આવ્યા છીએ.
પાકિસ્તાનના વડાપ્રધાન શરીફે કહ્યું કે, નાની અર્થવ્યવસ્થાઓએ પણ પાકિસ્તાનને પાછળ છોડી દીધું છે અને અમે છેલ્લા 75 વર્ષથી કટોરો લઈને ભટકી રહ્યા છીએ. શરીફના કહેવા પ્રમાણે, દેશની અર્થવ્યવસ્થા પહેલાથી જ 'પડકારભરી પરિસ્થિતિ'નો સામનો કરી રહી હતી... હવે પૂરે પણ તેને વધુ મુશ્કેલીમાં મુકી દીધી છે. રોકડની અછતગ્રસ્ત દેશ પણ છેલ્લા 30 વર્ષમાં સૌથી ભયાનક પૂરનો સામનો કરી રહ્યો છે.
આ વર્ષે જૂનની શરૂઆતથી અત્યાર સુધીમાં પૂરને કારણે 1400થી વધુ લોકોના મોત થયા છે અને 33 મિલિયન લોકો આ આફતથી પ્રભાવિત થયા છે. આ સાથે દેશનો એક તૃતીયાંશ ભાગ પાણીમાં ડૂબી ગયો હતો. અહીં દર સાતમાંથી એક વ્યક્તિ પૂરથી ખરાબ રીતે પ્રભાવિત છે. પૂરના કારણે લગભગ 78,000 ચોરસ કિલોમીટર (21 મિલિયન એકર) પાક ડૂબી ગયો છે અને લગભગ $12 બિલિયનનું નુકસાન થવાનો અંદાજ છે.
મહત્વનું છે કે, એક નવા અહેવાલમાં એવી ચેતવણી પણ આપવામાં આવી છે કે, જો દેશભરમાં પૂરની સ્થિતિ વચ્ચે બહારના સ્ત્રોતોમાંથી ખોરાકની સપ્લાયની વ્યવસ્થા નહીં કરવામાં આવે તો અડધા પાકિસ્તાનને દુષ્કાળનો સામનો કરવો પડી શકે છે. પાકિસ્તાની મીડિયાના અહેવાલો અનુસાર, રાષ્ટ્રીય ખાદ્ય સુરક્ષા અને સંશોધન મંત્રાલયની એજન્સીઓ દ્વારા સંકલિત અહેવાલમાં જણાવાયું છે કે પૂરના કારણે પાકિસ્તાનના ઓછામાં ઓછા 70 ટકા ખાદ્ય પુરવઠાનો નાશ થયો છે, જેનો અર્થ છે કે, વસ્તીને દુષ્કાળથી બચાવવાની જરૂર છે. ટૂંક સમયમાં આયાત કરવામાં આવશે.