કોલકાતા: ભારતમાં પિન્ક બોલથી રમાનારી પ્રથમ ડે-નાઇટ ટેસ્ટ મેચનો મંચ સંપૂર્ણપણે તૈયાર થઈ ચૂક્યો છે. ખેલાડીઓ પોતાની તૈયારીઓને અંતિમ રૂપ આપી રહ્યા છે, પરંતુ અસલી પેચ ટીમ કોમ્બિનેશનને લઈને ફસાઈ શકે છે, જ્યાં બંને ટીમને બોલિંગ આક્રમણમાં પેસ અને સ્પિન વચ્ચે સંતુલન જાળવવા માટે ઝઝૂમવું પડી શકે છે. જસપ્રીમ બૂમરાહની ગેરહાજરીમાં ભારતીય ફાસ્ટ બોલિંગ આક્રમણ એટલું જ ઘાતક નજરે પડી રહ્યું છે, પરંતુ 22 નવેમ્બરથી શરૂ થનારી ડે-નાઇટ ટેસ્ટ માટે ઈડન ગાર્ડન્સની સ્પિનરને અનુકૂળ પીચ પર ટીમ ઇન્ડિયા કેટલા ફાસ્ટ બોલર સાથે મેદાનમાં ઊતરશે એ જોવું દિલચસ્પ બની રહેશે.
પ્રથમ ડે-નાઇટ ટેસ્ટ મેચનો મંચ તૈયાર
અસલી પેચ ટીમ કોમ્બિનેશનને લઈને ફસાઈ શકે છે
પિન્ક બોલ કેટલો ટર્ન થશે તેના પર સસ્પેન્સ છે
ઇન્દોરમાં રમાયેલી પ્રથમ ટેસ્ટ મેચમાં ભારતીય ટીમ ત્રણ ફાસ્ટ બોલર અને બે સ્પિનરના પરંપરાગત કોમ્બિનેશન સાથે મેદાનમાં ઊતરી હતી. ઇન્દોરમાં બધી જ જવાબદારી પેસર્સે સંભાળી લીધી હતી અને સ્પિનર્સની બહુ જરૂર પડી નહોતી. પિન્ક બોલ કેટલો ટર્ન થાય છે કે પછી ફ્લડ લાઇટમાં કેટલો ટર્ન થશે તેના પર સસ્પેન્સ છે. ઘરેલુ ક્રિકેટમાં પિન્ક બોલથી ઘણી મેચ રમી ચૂકેલા ઝારખંડના સ્પિનર શહબાઝ નદીમની વાત માનવામાં આવે તો પિન્ક બોલથી બોલિંગ કરતી વખતે સ્પિનરને ટર્ન કરતાં વધુ લાઇન અને લેન્થ પર નિર્ભર રહેવું પડશે.
નદીમના જણાવ્યા અનુસાર પિન્ક બોલ ટપ્પો પડ્યા બાદ વધુ ટર્ન થતો નથી. આ સ્થિતિમાં એક લાઇન પકડીને બોલિંગ કરવાથી જ સ્પિનર્સને ફાયદો થઈ શકે છે. જ્યારે જમ્મુ-કાશ્મીરના અનુભવી સ્પિનર પરવેઝ રસૂલની વાત માનવામાં આવે તો નવા બોલથી સ્પિનર્સ થોડો ટર્ન હાંસલ કરી શકે છે, પરંતુ 15-20 ઓવર બાદ જ સ્પિનર્સ કોઈ ફાયદો ઉઠાવી નહીં શકે. રસૂલે જણાવ્યું, ''રેડ બોલ સાથે પિન્ક બોલની સરખામણી કરી શકાય નહીં. પછી પીચમાંથી ગમે તેટલી મદદ કેમ ના મળતી હોય. ગ્રીપનો ફરક છે અને એ જ ફરક મોટું અંતર પેદા કરે છે.''
ભારતીય ટીમમાં હાલ જાડેજા અને અશ્વિનના રૂપમાં બે સ્પિનર છે અને બંને ઇન્દોર ટેસ્ટમાં રમ્યા હતા, પરંતુ કોલકાતામાં ટીમ ઇન્ડિયા ફક્ત એક સ્પિનર સાથે મેદાનમાં ઊતરશે તો કોઈને પણ આશ્ચર્ય નહીં થાય. જાડેજા બેટિંગ કરી શકે છે, તેમ છતાં ટીમની પ્રથમ પસંદ અશ્વિન જ બની રહેશે. અશ્વિન પાસે જાડેજા જેવો ટર્ન તો નથી, પરંતુ તે પોતાના વેરિએશન અને લાઇન-લેન્થથી બેટ્સમેનને પરેશાન કરી શકે છે.
ટીમમાં મોહંમદ શમી, ઉમેશ યાદવ અને ઈશાંત શર્માના રૂપમાં હાલ ત્રણ શાનદાર ફાસ્ટર છે. આ સ્થિતિમાં ટીમ મેનેજમેન્ટ બેટિંગમાં એક સ્પેશિયાલિસ્ટ બેટ્સમેનને જોડી શકે છે. આમ પિન્ક ટેસ્ટમાં ટીમ પસંદ કરવી એ ટીમ મેનેજમેન્ટ અને કેપ્ટન માટે માથાનો દુખાવો સાબિત થઈ શકે છે.