પ્રોડક્ટ / મેકડોનાલ્ડ્સ આઉટલેટમાં હવે નહીં મળે મેક આલુ ટીકી બર્ગર, જાણો કેમ

નવી દિલ્હીઃ અમેરિકાની ફાસ્ટ ફૂડ ચેનલ મેકડોનાલ્ડ્સે દિલ્હી-એનસીઆરમાં પોતાના ફરી વાર ખોલવામાં આવેલ ૧૩ સ્ટોરમાં તેની કેટલીક જાણીતી પ્રોડક્ટ પાછી ખેંચી લીધી છે. હવે મેકડોનાલ્ડ્સના આ સ્ટોરમાં મેક આલુ ટીકી બર્ગર અને ગ્રીલ્ડ ચિકન રેપ મળશે નહીં. પોતાના ભાગીદાર વિક્રમ બક્સી સાથે કનોટ પ્લાઝા રેસ્ટોરન્ટ પ્રા.લિ.ના ટેકઓવર કરાર બાદ મેક ડોનાલ્ડ્સે આ સ્ટોર ફરી શરૂ કર્યા છે.

આ ઉપરાંત કંપનીએ પોતાના મેનુમાંથી માઝા બેવરેજને પણ હટાવી દીધી છે. મેકડોનાલ્ડ્સ એશિયાનાં ડાયરેક્ટર બેરી સેમે જણાવ્યું છે કે વિવિધ ક્ષેત્રોમાં મેકડોનાલ્ડ્સ ઇન્ડિયાનાં અનુભવને વધુ બહેતર બનાવવા અમે કાયમી રીતે કેટલીક આઇટમ મેનુમાંથી પાછી ખેંચી લીધી છે તેમાં મેક આલુ રેપ, ચિકન મેકગ્રીલ, એગ રેપ, ગ્રીલ્ડ ચિકન રેપ, માઝા બેવરીઝ વગેરેનો સમાવેશ થાય છે. આ સિવાય મેનુમાં કોઇ ફેરફાર કરાયા નથી. તેમણે જણાવ્યું હતું કે આ ઉપરાંત મેનુ બોર્ડ, ટ્રે મેટ્સ અને પેકેજિંગ ડિઝાઇનને નવું સ્વરૂપ આપવામાં આવ્યું છે.