અનોખી પહેલ / હવેથી ગુજરાતની આ કલેક્ટર કચેરીમાં હેલ્મેટ વિના કર્મચારીઓને 'No Entry', પોલીસકર્મીઓની અપીલ બાદ નિર્ણય

• સરકારી કર્મચારીઓ માટે નવો નિર્ણય
• કલેક્ટર કચેરીમાં હેલ્મેટ વગર નહીં મળે એન્ટ્રી
• પોલીસકર્મીઓએ ગુલાબ આપીને કરી અપીલ

બનાસકાંઠા જિલ્લામાં હાલ મોટા ભાગે હેલ્મેટ પહેર્યા વગર જ બાઇક ચાલક નીકળતા જોવા મળે છે. જિલ્લામાં છાસવારે અકસ્માતો સર્જાય છે. વધુ પડતા અકસ્માતોમાં વ્યક્તિને માથામાં ગંભીર ઈંજાઓ પહોંચે છે અને અકસ્માત દરમિયાન થતી હેડ ઈંજરીના કારણે અનેક લોકો મોતને ભેંટ્યા છે અને અનેક લોકો અકસ્માતના કારણે ગંભીર ઈજાનો ભોગ બન્યા છે. ત્યારે બનાસકાંઠા કલેક્ટર કચેરીના કર્મચારીઓ માટે મોટો નિર્ણય લેવામાં આવ્યો છે. 

આવતીકાલથી લાગુ કરાશે નિયમ
બનાસકાંઠા કલેક્ટર કચેરીમાં કામ કરતા કર્મચારીઓ માટે હેલ્મેટ ફરજિયાત કરાયું છે. હેલ્મેટ પહેરીને આવનારા કર્મચારીઓને જ કલેક્ટર કચેરી ખાતે એન્ટ્રી આપવામાં આવશે. જે કર્મચારી હેલ્મેટ પહેર્યા વગર આવશે તેમને કલેક્ટર કચેરીમાં એન્ટ્રી મળશે નહીં. આ નિયમ આવતીકાલથી લાગુ કરાશે. આજે કલેક્ટર કચેરીના કર્મચારીઓને ટ્રાફિક પોલીસે સમજણ આપી હેલ્મેટ પહેરવા અપીલ કરી હતી. પોલીસકર્મીઓએ અધિકારીઓને ગુલાબ આપીને હેલ્મેટ પહેરવાની અપીલ કરી હતી.