- ભારતમાં XE વેરિઅન્ટનો કેસ નોંધાયો હોવાનો સરકારી સૂત્રોનો ઈન્કાર
- સરકારી સૂત્રોએ કહ્યું, આવો કોઈ કેસ નોંધાયો નથી
- મુંબઈમાં XE વેરિઅન્ટનો કેસ મળ્યો હોવાનો બીએમસીનો દાવો
ભારતમાં કોરોનાના સૌથી ખતરનાક XE વેરિઅન્ટની એન્ટ્રી બાદ દેશમાં હડકંપ મચ્યો હતો. આ વેરિયન્ટ ખતરનાક હોવાનું વર્લ્ડમાં સાબિત થતા ભારતમાં ચિંતાના વાદળ ઘેરાયા હતા પરંતુ મીડિયા રિપોર્ટના દાવાના થોડા કલાક આખરે કેન્દ્ર સરકારે જાહેર કરી દીધું કે દેશમાં એક્સઈ વેરિયન્ટનો કોઈ કેસ નોંધાયો નથી.
મુંબઈમાં XE વેરિઅન્ટનો કેસ નોંધાયો હોવાની બીએમસીની જાહેરાત બાદ આરોગ્ય મંત્રાલયના સૂત્રોની સ્પસ્ટતા
મુંબઈમાં કોરોનાના ચેપી XE વેરિઅન્ટનો કેસ નોંધાયો હોવાની બીએમસીની જાહેરાત બાદ કેન્દ્ર સરકારની સ્પસ્ટતા સામે આવી છે. કેન્દ્રીય આરોગ્ય મંત્રાલયના સૂત્રોએ કહ્યું કે ભારતમાં XE વેરિયન્ટનો કોઈ કેસ નોંધાયો નથી. મીડિયા રિપોર્ટમાં દાવો કરાયો હતો કે મુંબઈમાં એક્સઈ વેરિયન્ટનો પહેલો કેસ નોંધાયો છે અને સાઉથ આફ્રિકાથી પાછી આવેલી 50 વર્ષીય મહિલામાં એક્સઈ વેરિયન્ટના લક્ષણો જોવા મળ્યાં હતા.
મુંબઈમાં આવો કોઈ કેસ નોંધાયો નથી- આરોગ્ય મંત્રાલયના સૂત્રો
આરોગ્ય મંત્રાલયના સૂત્રોએ જણાવ્યું કે મુંબઈમાં એક્સઈ વેરિયન્ટનો કોઈ કેસ નોંધાયો નથી જોકે બીએમસીએ આ કેસ નોંધાયો હોવાનો સ્વીકાર કર્યો છે. બીએમસીએ જણાવ્યું કે જે દર્દીમાં કોરોનાના નવા વેરિયન્ટ XE જોવા મળ્યો છે તેના અત્યાર સુધી હળવા લક્ષણો છે. દર્દી પર સતત દેખરેખ રાખવામાં આવી રહી છે. બીએમસીએ કુલ 376 સેમ્પલનું ટેસ્ટિંગ કર્યું હતું, જેમાંથી 230 મુંબઈના નાગરિકો હતો, 230માંથી 228 સેમ્પલો ઓમિક્રોનના નીકળ્યાં હતા જ્યારે એક કપ્પા અને એક એક્સઈનો હતો.
શું આવ્યું હતું મીડિયા રિપોર્ટમાં
XE સ્ટ્રેનથી સંક્રમિત મહિલા વ્યવસાયે કોસ્ચ્યુમ ડિઝાઈનર હોવાની સાથે સાથે શૂટિંગ ક્રૂની ટીમ મેમ્બર પણ છે. જાણકારી મુજબ તે 10 ફેબ્રુઆરી 2022ના રોજ સાઉથ આફ્રિકાથી આવી હતી. તે પહેલાં તેની પાસે ટ્રાવેલ હિસ્ટ્રી પણ નહોતી.
પહેલા નેગેટિવ આવ્યા પછી પોઝિટિવ રિપોર્ટ આવ્યો
મીડિયા રિપોર્ટમાં એવું જણાવાયું હતું કે જે મહિલામાં એક્સઈ વેરિયન્ટના લક્ષણો જોવા મળ્યાં છે તેણે કોમિર્નાટી વેક્સીનના બંને ડોઝ લઈ લીધા હતા. દેશમાં આવ્યા બાદ તેનો કોરોના ટેસ્ટ રિપોર્ટ નેગેટિવ આવ્યો હતો, પરંતુ જ્યારે 2 માર્ચે રેગ્યુલર ટેસ્ટ દરમિયાન તેનો કોરોના ટેસ્ટ કરવામાં આવ્યો ત્યારે તે પોઝિટિવ મળી આવી હતી. તેને હોટલ તાજના એક રૂમમાં ક્વોરન્ટાઈન કરવામાં આવી હતી. બીજા દિવસે 3 માર્ચના રોજ જ્યારે ફરીથી તેમનો ટેસ્ટ કરવામાં આવ્યો ત્યારે તેમનો રિપોર્ટ નેગેટિવ આવ્યો હોવાનું જાણવા મળ્યું હતું.
