- બિહારના મુખ્યમંત્રી પદથી નીતિશ કુમારે આપ્યું રાજીનામું
- નીતિશ રાજીનામું આપે તે પહેલા PM મોદીએ કર્યો હતી ફોન
- આ દરમિયાન PMએ તેમને અભિનંદન પાઠવ્યા હતા
Nitish Kumar Resigned : બિહારની રાજનીતિમાં ફરી એકવાર મોટો બદલાવ આવ્યો અને મુખ્યમંત્રી પદથી નીતિશ કુમારે આપ્યું રાજીનામું. જોકે હવે એવું સામે આવ્યું છે કે, આજે સવારે JD(U) પ્રમુખ નીતીશ કુમાર બિહારના મુખ્યમંત્રી પદેથી રાજીનામું આપે તે પહેલા વડાપ્રધાન નરેન્દ્ર મોદીએ તેમને ફોન કર્યો હતો. આ દરમિયાન PMએ તેમને અભિનંદન પાઠવ્યા હતા. હકીકતમાં રવિવારે એટલે કે આજે નીતિશ કુમારના રાજીનામા સાથે તેમણે JDU, RJD અને કોંગ્રેસનું ગઠબંધન સમાપ્ત કર્યું જે 2022 થી ચાલી રહ્યું હતું. PM નરેન્દ્ર મોદી સાથે ફોન પર વાત કર્યા બાદ નીતીશ કુમાર રાજભવન ગયા અને મહાગઠબંધનના મુખ્યપ્રધાન પદેથી રાજીનામું આપી દીધું અને રાજ્યપાલને તે સરકારનો અંત લાવવા વિનંતી કરી.
નીતિશ કુમારના રાજીનામા બાદ પટનામાં વડાપ્રધાન મોદીની સાથે નીતિશ કુમારના પોસ્ટર પણ લગાવવામાં આવી રહ્યા છે. મળતી માહિતી મુજબ CM આવાસ પર JDU ધારાસભ્ય દળની બેઠક યોજાઈ હતી જેમાં નીતિશ કુમારને સર્વસંમતિથી તમામ પ્રકારના નિર્ણય લેવા માટે અધિકૃત કરવામાં આવ્યા હતા. જે બાદ નીતિશ કુમારે મહાગઠબંધન સરકારના મુખ્યમંત્રી પદેથી રાજીનામું આપવાનો નિર્ણય કર્યો હતો. જાણવા મળ્યું છે કે, ધારાસભ્યોની બેઠક દરમિયાન નીતિશ કુમારને PMO તરફથી ફોન આવ્યો હતો. જરા પણ વિલંબ કર્યા વિના નીતિશે ફોન ઉપાડ્યો. વડાપ્રધાન નરેન્દ્ર મોદીએ નીતીશ કુમાર સાથે ફોન પર વાત કરી અને બિહારની નવી સરકાર માટે અગાઉથી શુભેચ્છા પાઠવી.
વધુ વાંચો : ફરી નીતિશ કુમાર સાથે ગઠબંધન થતાં જ ભાજપે કર્યું ચોંકાવનારું એલાન, બે નેતાઓને મળ્યું મોટું પદ
તો શું 26 જાન્યુઆરીએ જ રાજીનામાંનો મળ્યો હતો સંકેત ?
નીતિશ કુમારના રાજીનામાની સાથે રવિવારે તમામ ભાજપના ધારાસભ્યો અને અગ્રણી નેતાઓની બેઠક યોજાઈ હતી જેમાં સરકાર બનાવવા માટે JDUને સમર્થન આપવાનો નિર્ણય લેવામાં આવ્યો હતો. જોકે આના સંકેતો પહેલાથી જ દેખાઈ રહ્યા હતા. 26 જાન્યુઆરીના રોજ રાજભવનમાં હાઈ ટી પાર્ટી દરમિયાન વિપક્ષના નેતા વિજય કુમાર સિન્હા અને મુખ્યમંત્રી નીતિશ કુમાર જે રીતે એકબીજા સાથે ખુશખુશાલ વાત કરતા જોવા મળ્યા તે ઘણું સ્પષ્ટ કરે છે. શનિવારે મુખ્ય પ્રધાન નીતિશ કુમાર સત્તાવાર મુલાકાતે બક્સર ગયા હતા જ્યાં કેન્દ્રીય પ્રધાન અને સ્થાનિક સાંસદ અશ્વિની કુમાર ચૌબેએ સંગીતનાં સાધનો વડે તેમનું સ્વાગત કર્યું હતું. સાથે પૂજા કરીને બંનેએ ફરી એકવાર રાજનીતિની સફરમાં સાથે આવવાના સંકેત આપ્યા હતા.
