ગુજરાતના નવા મુખ્યમંત્રી તરીકે અનેક નામ ચાલી રહ્યા છે, ત્યારે પ્રબળ દાવેદાર મનાતા નીતિન પટેલ કમલમ પર પહોંચતા પહેલા મોટું નિવેદન આપ્યું છે
કોના નામ પર વાગશે મહોર?
કોણ બનશે નવા મુખ્યમંત્રી?
મુખ્યમંત્રીના નામોને લઇ શું કહ્યું નીતિન પટેલે?
ગઈકાલ બપોરે અચાનક જ વિજય રૂપાણીએ કહેવાતું સ્વૈચ્છિક રાજીનામું ધરી દેતા ગુજરાતનું રાજકારણ ગરમાય ગયું છે. ગુજરાતનો તાજ કોના શિરે જશે તેને લઈને એક બાદ એક મોટા નામોની અટકળો ચાલી રહી છે. તેમાં સૌથી પ્રબળ દાવેદાર મનાતા નીતિન પટેલ કમલમ પર પહોંચતા પહેલા મીડિયા સાથે વાતચીત કરી હતી. જેમાં તેમણે પોતાનું નામ રેસમાં ચાલવા અંગે નીતિન પટેલે પ્રતિક્રિયા આપતા કહ્યું હતું કે આ કોઈ રેસ નથી,હું પણ એક ધારાસભ્ય છું.
CM અનુભવી હોય તે જરૂરી: નીતિન પટેલ
નીતિન પટેલ સહજ રીતે પોતાનો સીએમ પદ તરીકેનો દાવો ભલે ન કરી શક્યા હોય પણ પણ તેમને કરેલા નિવેદન પરથી એક વાત સ્પષ્ટ છે કે બધાને ગમતા લોકપ્રિય ચહેરા ભાજપ પહેલી પસંદ ઉતારી શકે છે. જેમાં નીતિન પટેલને ગુજરાતની કમાન સોંપી તેમના અનુભવનો લાભ લઈ શકે છે કારણ કે નીતિન પટેલ પણ એવું ઈચ્છા દર્શાવી રહ્યા છે કે CM અનુભવી હોય તે જરૂરી, નીતિન પટેલે કમલમ પહોંચતા પહેલા આપેલા નિવેદનમાં કહ્યું હતું કે બધા પોતપોતાની રીતે નામો ચલાવે છે, અમારુ રાષ્ટ્રીય નેતૃત્વ નક્કી કરશે તે મંજૂર હશે, તમે કોણ મુખ્યમંત્રી હશે તેનું અનુમાન લગાવી શકો છો, સાથે તેમણે એક વાત ટાંકીને કહી હતી કે અનુભવી મુખ્યમંત્રી હોવા પણ ખુબ જરૂરી છે. વિજય ભાઇએ કેમ રાજીનામું આપ્યું તે અંગે કોઇ ટીકા કરવાથી પણ નીતિન પટેલ દૂર રહ્યા હતા અને સાથે જ CM કોઈ પણ હોય વિકાસના કામો ચાલુ રહેવાની હામ પણ નીતિન પટેલે ભરી હતી.
બધા જ સીએમ સાથે કરવાની મને તક મળી છે : નીતિન પટેલ
નીતિન પટેલે પોતાના વિશે કહ્યું હતું કે CMમાં કોઈ રેસ નથી, હું એક ધારાસભ્ય છું, નાયબ મુખ્યમંત્રી છું, હું 1990થી પાંચ વર્ષ છોડી બાકીના સતત દરમિયાન ધારાસભ્ય રહ્યો છું, બધા CM સાથે કામ કરવાની મને તક મળી છે, મારુ નામ ચાલે તે તમારું અનુમાન છે.
નીતિન પટેલની કેમ થઈ શકે છે પસંદગી?
ગુજરાતની રાજનીતિમાં કદાવર નામ એટલે નીતિન પટેલ.રાજ્યના નાયબ મુખ્યમંત્રી નીતિન પટેલ એવા પ્રદેશમાંથી આવે છે જ્યારે, સમગ્ર ગુજરાતમાં માત્ર બે જ બેઠક લોકસભાની હતી ત્યારે, મહેસાણા માં એ.કે.પટેલ સંસદસભ્ય હતા.ઉત્તર ગુજરાત ભાજપનું એપી સેન્ટર રહ્યું છે. અને નીતિન પટેલ અહીંથી પ્રતિનિધિત્વ કરી રહ્યા છે.ગમે તેવી પરિસ્થિતિમાં એક નિષ્ઠ રહી પાર્ટીને વફાદાર રહેલા નીતિન પટેલના મો એ આવેલો મુખ્યમંત્રી પદનો કોળીયો છીનવાઈ ગયાની ચર્ચા પણ હતી. સ્પષ્ટ વક્તા અને રોકડું પરખાવનારા નીતિનભાઈ '90નાં દાયકાથી રાજનીતિમાં સક્રિય છે. ઉત્તર ગુજરાતમાં મજબૂત પકડ ધરાવતા નીતિન પટેલ વહીવટીય કોઠાસૂઝ પણ ધરાવે છે. પાટીદાર સમાજ પોતાના સમાજનો મુખ્યમંત્રી આગામી ચૂંટણી બાદ હોય તેવી લાગણી ધરાવે છે. આ શ્રુંખલામાં નીતિન ભાઈ ફીટ બેસે છે.