નોટબંધીનો નિર્ણયની અસર તૂટી આતંકી-નક્સલીઓની કમર

નોટબંધીથી સમગ્ર દેશની જનતા તો મુશ્કેલીનો સામનો કરી રહી છે. પણ સાથે જ આતંકવાદીઓ અને માઓવાદીઓની ઊંઘ હરામ થઇ ગઇ છે. નોટબંધીના કારણે આતંકવાદીઓ અને માઓવાદીઓને આર્થિક માર પડી છે.  

500 અને 1000 રૂપિયાની જૂની નોટો પર પ્રતિબંધ લગાવીને મોદી સરકારે જમ્મુ અને કાશ્મીરના આતંકવાદીઓ અને દેશભરમાં ફેલાયેલા નકસલીઓની કમર તોડી નાખી છે. એક બાજુ જ્યાં કાશ્મીરમાં હવાલા દ્વારા આતંકીઓ અને અલગાવવાદીઓ સુધી પહોંચનારા ફંડિંગમાં ઘટાડો જોવા મળી રહ્યો છે. ત્યાં નકસલીઓએ મોટી સંખ્યામાં ભેગા કરી રાખેલા રૂપિયા હવે બેકાર બની ગયા છે.  

માઓવાદીઓને મોટી રકમ બહાર કાઢતા છૂટયો પરસેવો 

કાશ્મીરમાં આતંકીઓ અને અલગાવવાદીઓ સુધી હવાલા દ્વારા રૂપિયા પહોંચતા હતાં. આ રકમ મોટા ભાગે 500 અને 1000 રૂપિયાની નોટો સ્વરૂપે રહેતા. હવે જૂની નોટો પર પ્રતિબંધ આવી જતા આ ફંડિંગમાં કમી જોવા મળી છે. આ બાજુ દેશના અનેક રાજ્યોમાં ફેલાયેલા માઓવાદી સમૂહ ખાસ કરીને બિહાર ઝારખંડના માઓવાદીઓએ અપહરણ દ્વારા મોટી રકમ જમા કરી રાખી હતી જેને કાઢવામાં હવે તેઓને પરસેવો છૂટી રહ્યો છે.  

500 અને 1000 રૂપિયાની જૂની નોટો પર પ્રતિબંધ બાદ હવાલા ચેનલ દ્વારા આવનારા ફંડનો સ્ત્રોત બંધ થઈ ગયો છે. હિંસા અને પ્રદર્શનો કરાવવા માટે હવે ફંડ નથી આથી આ વારદાતોને અંજામ આપનારા લોકો ચૂપચાપ બેઠા છે. હિંસક પ્રદર્શન કરનારા અને પથ્થરબાજી કરાવવા માટે હવે રૂપિયા જ નથી.  કોઈ પણ આતંકી ઓપરેશન કે ભીડ દ્વારા પ્રદર્શન કરાવવા માટે રૂપિયાની જરૂર હોય છે અને તે હવાલા દ્વારા આવે છે. આ ખરેખર સૂચક અને ઊડીને આંખે વળગે તેવી બાબત છે કે ઘાટીમાં 8 નવેમ્બર પછી કોઈ જ આતંકી હુમલો થયો નથી.  

નોટબંધીની માઓવાદીઓ ઉપર પણ જબરદસ્ત અસર પડી છે. તેમના ફંડિંગનો રસ્તો જ બંધ થઈ ગયો છે. બિહાર અને ઝારખંડ સ્થિત સીપીઆઈ નેતાઓ વચ્ચે જે વાતચીત પકડાઈ છે તેનાથી જાણવા મળે છે કે તેમણે બહોળા પ્રમાણમાં નોટો ભેગી કરીને રાખી હતી અને હવે તે ખોવાનો ડર છે. આ કેશ અપહરણ કરી અને અન્ય રીતે ભેગી કરેલી હતી. આ દરમિયાન સરકારી એજન્સીઓએ નકસલ પ્રભાવિત વિસ્તારોમાં રૂપિયાના ફ્લો ઉપર ચુસ્ત નજર રાખવાનું શરૂ કરી દીધુ છે. એવી પણ માહિતી છે કે માઓવાદીઓ બેંક કે કેશ વેનને પોતાનું નિશાન બનાવી શકે છે જેથી કરીને નુકસાનની ભરપાઈ કરી શકે.