હદ થઇ ગઇ / સુરતની સિવિલમાં ચોંકાવનારી ઘટના: ટોયલેટમાંથી મળી આવ્યો નવજાત બાળકીનો મૃતદેહ, તંત્રમાં મચી દોડધામ

• સુરતની સિવિલના ટોયલેટમાંથી મળ્યો નવજાત બાળકીનો મૃતદેહ
• સફાઈ કર્મચારીએ તંત્રને જાણ કરતા તપાસ શરૂ
• પોલીસે પણ બાળકીની માતાને શોધવા તપાસ શરૂ કરાઇ

સુરતની સિવિલ હોસ્પિટલના ટોયલેટમાંથી એક નવજાત બાળકીનો મૃતદેહ મળી આવ્યો છે. અધૂરા માસે જન્મેલી બાળકીનો મૃતદેહ મળી આવતા હોસ્પિટલના તંત્રમાં ભારે ખળભળાટ મચી ગયો છે. આ ઘટનાની જાણ થતા જ હોસ્પિટલનો સ્ટાફ દોડતો થઇ ગયો હતો. સિવિલ હોસ્પિટલના સફાઈ કર્મચારીએ તંત્રને જાણ કરતા સમગ્ર તપાસ શરૂ કરાઇ. પોલીસે પણ બાળકીની માતાને શોધવા તપાસ હાથ ધરી છે.

ગઇ કાલે સફાઈ કર્મચારીએ બાળકીના મૃતદેહને જોયો હતો

ઉલ્લેખનીય છે કે, ગઇ કાલે વહેલી સવારે સફાઈ કર્મચારી સફાઈ કરવા પહોંચ્યો હતો એ દરમ્યાન ટોયલેટ ટબમાં કર્મચારીને નવજાત બાળકીનો મૃતદેહ દેખાયો હતો. બાદમાં આ અંગે કર્મચારીએ તાત્કાલિક અધિકારીઓને જાણ કરતા સિવિલ તંત્ર દોડતું થયું હતું. બાદમાં આ ઘટના અંગે તપાસના ઓર્ડર પણ અપાયા છે.

વિગતે મળતી માહિતી અનુસાર સુરત સિવિલ હોસ્પિટલના ટ્રોમા સેન્ટરના શૌચાલયમાં અધૂરા માસે પ્રસુતિથી જન્મેલી બાળકીનો મૃતદેહ ટોયલેટના ટબના પાણીમાંથી મળી આવ્યો હતો. દરરોજની જેમ સફાઈ કર્મચારી ટોયલેટની સફાઈ કરવા ગઇ કાલે પહોંચ્યો હતો. ત્યારે સફાઈ કર્મચારીને આ નવજાત બાળકીનો મૃતદેહ દેખાયો હતો. મૃતદેહ દેખાતા એકાએક કર્મચારી પણ ગભરાઈ ગયો હતો. આથી તેને તાત્કાલિક ઉચ્ચ અધિકારીઓને જાણ કરતા સિવિલ તંત્ર દોડતું થઇ ગયું હતું. બાદમાં અધૂરા માસે જન્મેલી બાળકીના મૃતદેહને બહાર નીકાળી કાયદેસરની કાર્યવાહી કરવામાં આવી.

હાલમાં પોલીસ દ્વારા નવજાતની માતા અંગેની શોધખોળ શરૂ

એવું કહેવાય છે કે, સિવિલના ઇતિહાસમાં પ્રથમવાર આવી ઘટના બની હતી. ત્યારે હવે આ મામલે માતાની પ્રસુતિ ક્યારે થઈ અને નવજાતની માતા પણ કોણ છે તેની તપાસ પોલીસ દ્વારા કરવામાં આવી રહી છે.