તમારા કામનું / નોકરિયાતો માટે મોટા સમાચાર : હાથમાં પગાર ઓછો આવશે, રજાઓ ત્રણ મળશે, આવી શકે છે નવો નિયમ

• કર્મચારીઓનાં સેલરી સ્ટ્રકચર બદલાઇ જશે
• બેઝિક પગાર વધવાથી કર્મચારીઓનો પીએફ વધુ કપાશે
• કામના કલાક વધીને ૧ર થઇ જશે

આજકાલ નવા વેજ કોડને લઇને મીડિયામાં ભારે ચર્ચા ચાલી રહી છે. આ વેજ કોડનો અમલ ૧ એપ્રિલથી થવાનો હતો, પરંતુ રાજ્ય સરકારો તૈયાર ન હોવાથી નવા નિયમો લાગુ કરવામાં આવ્યા ન હતા. હવે તા.૧ ઓક્ટોબર પહેલાં આ નવા નિયમો લાગુ થઇ શકશે કે કેમ એ પછી શંકાસ્પદ છે, કેમ કે રાજ્યોએ હજુ સુધી ડ્રાફ્ટ રૂલ્સ તૈયાર કર્યા નથી. નવા વેજ કોડમાં એવી કેટલીય જોગવાઇઓ છે, જેનાથી ઓફિસમાં કામ કરતા પગારદાર વર્ગ, મિલ-ફેક્ટરીમાં કામ કરતા કામદારોને તેનાથી અસર થશે. તેમના પગારથી લઇને તેમની રજાઓ અને કામના કલાકો પણ બદલાઇ જશે. 

સેલરી સ્ટ્રકચર બદલાશે
નવા વેજ કોડના નિયમો લાગુ થયા બાદ કર્મચારીઓનાં સેલરી સ્ટ્રકચર બદલાઇ જશે અને તેમનો ટેક હોમ સેલરી ઘટી જશે, કારણ કે કોઇ પણ કર્મચારીની બેઝિક સેલરી કંપનીના ખર્ચના પ૦ ટકાથી ઓછી હોઇ શકે નહીં. અત્યારે કેટલીયે કંપનીઓ બેઝિક સેલરી ઘટાડવા ઉપરાંત ભથ્થાં વધુ આપે છે.

પીએફ-ગ્રેચ્યુઇટી વધશે
નવા વેજ કોડ પ્રમાણે બેઝિક પગાર વધવાથી કર્મચારીઓનો પીએફ વધુ કપાશે અને તેથી તેમનું ભવિષ્ય વધુ સુરક્ષિત થશે. પીએફની સાથે-સાથે મંથલી ગ્રેચ્યુઇટીમાં પણ યોગદાન વધી જશે અને ટેક હોમ સેલરી ઘટી જશે, પરંતુ નિવૃત્તિ પર કર્મચારીને વધુ ફાયદો થશે.

વર્ષની અર્ન્ડ લીવ વધી જશે
આ ઉપરાંત કર્મચારીઓની અર્ન્ડ લીવ (ઉપાર્જિત રજા) વધીને હવે ૩૦૦ થઇ શકે છે. તાજેતરમાં શ્રમ મંત્રાલય, લેબર ‌યુનિયન વચ્ચે નવી જોગવાઇ પર ચર્ચા દરમિયાન કર્મચારીઓની અર્ન્ડ લીવ ર૪૦થી વધારીને ૩૦૦ કરવાની રજૂઆત થઇ હતી, જોકે હજુ સુધી આ અંગે કોઇ આખરી નિર્ણય લેવાયો નથી.

વીકલી ઓફ પણ વધી જશે
નવા વેજ કોડ અનુસાર કામના કલાક વધીને ૧ર થઇ જશે, જોકે લેબર કોડમાં જણાવાયું છે કે અઠવાડિયામાં ૪૮ કલાક કામકાજનો નિયમ લાગુ રહેશે, પરંતુ જો દિવસમાં કોઇ કામદાર આઠ કલાક કામ કરતો હશે તો અઠવાડિયામાં છ દિવસ કામ કરવું પડશે અને એક દિવસની રજા મળશે, પરંતુ જો કંપની ‌દિવસમાં ૧ર કલાક કામ કરાવશે તો બાકીના ‌ત્રણ દિવસ કર્મચારીને વીકલી ઓફ આપવો પડશે. આમ, કામના કલાક વધશે તો વીકલી ઓફ પણ વધારવા પડશે.