અમદાવાદામાં ચૂંટણીના ચાર મહિના પછી નવા કોર્પોરેટરોને હજું લેપટોપ નથી મળ્યા. જૂના કોર્પોરેટરોનું કહેવું છે કે તેમની પાસે જે લેપટોપ છે તે ડબલા થઈ ગયા છે.
નવા કોર્પોરેટરોને હજુ લેપટોપ નથી મળ્યા
જૂના કોર્પોરેટરોએ હજું લેપટોપ પરત નથી કર્યા
શું ખાલી થઈ ગઈ છે મ્યુનિસિપલ તિજોરી
ગત ર૧ ફેબ્રુઆરીએ અમદાવાદ મ્યુનિસિપલ કોર્પોરેશનની ચૂંટણી હતી અને તા.ર૩ ફેબ્રુઆરીના મતગણતરીના દિવસે શાસક ભાજપને અમદાવાદીઓએ ફરી સત્તાનું સુકાન સોંપ્યું હતું. વર્ષ ર૦૦પથી સતત ભાજપ પાસે સત્તાનાં સૂત્રો છે. ગત ચૂંટણીમાં ભાજપ સહિતના રાજકીય પક્ષોએ ધાર્મિક એજન્ડાને અપનાવતાં પહેલી વખત ચૂંટણી જંગમાં ઊતરીને પણ અસદુદ્દીન ઓવૈસીની પાર્ટી મિમના સાત કોર્પોરેટરો ચૂંટાઇ આવ્યા હતા. મિમે ૧૩.૩૧ મત ખેંચી લેતાં રાજકીય વર્તુળોમાં આશ્ચર્ય ફેલાયું હતું અને હવે શહેરના ૧૯ર કોર્પોરેટરો છેલ્લા ચાર મહિનાથી પોતપોતાના વોર્ડનું મ્યુનિસિપલ કોર્પોરેશનમાં પ્રતિનિધિત્વ કરી રહ્યા છે, જોકે સત્તાધારી પક્ષ ભાજપે નો-રિપીટ થિયરી અજમાવતાં મોટા ભાગના કોર્પોરેટરો પહેલી વખત ચૂંટાઇ આવ્યા છે. આ નવા કોર્પોરેટરોને તંત્રના વહીવટમાં હજુ પણ ખાસ ગતાગમ પડતી નથી. અનેક સિનિયર કોર્પોરેટરોને ઉંમર નડતાં ઘરે બેસવું પડ્યું હોઇ આ નવાસવા કોર્પોરેટરોને પેનલમાંના કોઇ સિનિયર કોર્પોરેટરનું માર્ગદર્શન પણ મળતું નથી. આવા સંજોગોમાં વોર્ડના પ્રશ્નોને સંબંધિત વિભાગ કે અધિકારીઓ સુધી પહોંચતા કરવા માટે કોર્પોરેટરોને અત્યાર સુધી અપાતાં લેપટોપ હજુ સુધી ફાળવાયાં નથી. આવું કદાચ પહેલી વાર બન્યું છે કે કોર્પોરેટર પદે ચૂંટાયાના ચાર મહિના બાદ પણ કોર્પોરેટરોને મ્યુનિ. વહીવટીતંત્ર લેપટોપ આપી શક્યું નથી એટલે આ કોર્પોરેટરો દાયકાઓ જૂની ફરિયાદની લાલ ચિઠ્ઠીની સિસ્ટમ આધારિત થયા છે.
મ્યુનિસિપલ તિજોરીના ખર્ચે લેપટોપ અપાયા હતા
શહેરના કોર્પોરેટરોને વર્ષ ર૦૧૦-૧પની ટર્મમાં પહેલી વખત લેપટોપ અપાયાં હતાં. તેના પહેલાં કોર્પોરેટરોને મ્યુનિસિપલ તિજોરીના ખર્ચે મોંઘાદાટ કમ્પ્યૂટર પણ અપાયાં હતાં. છેલ્લી ત્રણ ટર્મથી કોર્પોરેટરોને સ્માર્ટ બનાવવાના પ્રયાસ થઇ રહ્યા છે, જોકે તેઓ કેટલા સ્માર્ટ બન્યા તે એક સંશોધનનો વિષય છે, કેમ કે લેપટોપ આપ્યા બાદ પણ જૂના કોર્પોરેટરો તેને ચલાવી શક્યા નહોતા. તેમના બદલે તેમનાં પુત્ર-પુત્રી વગેરે પરિવારજનોએ મ્યુનિસિપલ કોર્પોરેશનના લેપટોપ-કમ્પ્યૂટરનો ઉપયોગ કર્યો હતો. પ્રજાના ખર્ચે લેપટોપ આપવા પાછળની નીતિ એ હતી કે વોર્ડના લોકોની સમસ્યા કે સૂચનને સંબંધિત વિભાગને સ્માર્ટલી લેપટોપથી પહોંચતી કરવાની હતી. તેમ છતાં જૂના કોર્પોરેટરોએ મ્યુનિસિપલ સામાન્ય સભામાં જે તે ફરિયાદની લાલ ચિઠ્ઠીના ઢગલા લઇને તંત્ર સમક્ષ રજૂઆતો કરી હતી.
જૂના લેપટોપ ડબલા થઈ ગયા : જૂના કોર્પોરેટર
લેપટોપ કે કમ્પ્યૂટર ફાળવતી વખતે જે તે ટર્મ પૂર્ણ થયા પછી તેને મ્યુનિસિપલ તંત્રમાં જમા કરાવવાની શરત રખાઇ છે, જોકે પૂર્વ કોર્પોરેટરોએ પ્રજાકીય કામગીરી માટે ફાળવાયેલાં રૂ.૩૦થી ૩પ હજારની કિંમતનાં લેપટોપ-કમ્પ્યૂટરને ઘરભેગાં કરી દીધાં હતાં. લેપટોપને પરત ન કરવાની બાબતે આ પૂર્વ કોર્પોરેટરો બેશરમીથી કહેતા હતા કે હવે તો આ લેપટોપ ડબલાં થઇ ગયાં છે. અમે તો આજે જ પરત કરી દઇએ, પરંતુ તંત્રે અમને કોઇ એવી સૂચના જ આપી નહોતી, જ્યારે અમુક તો મજાકમાં કહેતા હતા કે મારા ઘરનાં દીકરા-દીકરી લેપટોપ વાપરે છે, એમને જ લેપટોપ આવડે છે, આ અમારો વિષય નથી.
192 કોર્પોરેટરોને લેપટોપ ફાળવવામાં નથી આવ્યા
હવે આ ર૦ર૦-રપની નવી ટર્મ માટે ચૂંટાયેલા ૧૯ર કોર્પોરેટરોને પણ તંત્ર દ્વારા લેપટોપ ફાળવવાનાં થાય છે. આ લેપટોપનો ઉપયોગ આ કોર્પોરેટરો લોકોની કામગીરી માટે કરે છે કે પછી તેમનાં દીકરા-દીકરીને સુપરત કરે છે. તે તો ફરી પાછો તંત્ર માટે સંશોધનનો વિષય બનશે, પરંતુ લેપટોપના અભાવે નવી ટર્મના કોર્પોરેટરો ફરિયાદ માટે લાલ ચિઠ્ઠી આધારિત થયા છે. આ કોર્પોરેટરોને મનપસંદ કંપનીનો ફોન ખરીદવા ચૂકવાતી રૂ.૧ર હજારની રકમ પણ ફાળવાઇ નથી.
દરેક કોર્પોરેટરના લેપટોપ માટે 67.20 લાખનો ખર્ચો
૧૯ર કોર્પોરેટરો માટે કોર્પોરેટરદીઠ એક લેપટોપ ખરીદવા માટે મ્યુનિસિપલ તિજોરીમાંથી રૂ. ૬૭.ર૦ લાખનો ખર્ચ કરવો પડશે, જોકે મ્યુનિસિપલ તિજોરીને કોરોનાનું ગ્રહણ લાગતાં તે ખાલીખમ થઇ હોવાની ચર્ચા છે. કોવિડ દર્દીઓની પાછળ તંત્રને રૂ.૬પ૦ કરોડથી વધુનો ખર્ચ થયો હતો. આ ખર્ચની પૂરેપૂરી રકમ હજુ રાજ્ય સરકાર પાસેથી મળી નથી. બીજી તરફ ઓક્ટ્રોય નાબૂદી બાદ આવક માટે એકમાત્ર સ્રોત પ્રોપર્ટી ટેક્સ હોઇ તેમાં પણ ધારી આવક થતી નથી. મ્યુનિસિપલ તંત્રમાં રાજ્ય સરકાર અને કેન્દ્ર સરકારની યોજનાઓ થકી મળતી કરોડો રૂપિયાની સહાયને પણ અસર પડી છે. એએમટીએસ અને બીઆરટીએસ તો મ્યુનિસિપલ કોર્પોરેશન માટે સફેદ હાથી સમાન પુરવાર થયા છે. તેમ છતાં પણ મ્યુનિસિપલ તિજોરીમાંથી દર વર્ષે આ બંને જાહેર પરિવહન સેવાને દોડતી રાખવા માટે કરોડો રૂપિયાની લોન આપવી પડે છે. અગાઉ પણ ઇન્કમ શોર્ટેજના કારણે સત્તાવાળાઓને ફોર્સ મેજર જાહેર કરવાની ફરજ પડતાં ગત વર્ષ ર૦ર૦-ર૧ના બજેટના રૂ.૧ર૦૦ કરોડના પ્રોજેક્ટ પડતા મૂકવા પડ્યા હતા. ચાલુ નાણાકીય વર્ષમાં પણ નાણાંભીડના કારણે કરોડો રૂપિયાનાં બજેટનાં કામ પડતાં મૂકવાં પડશે તેવી પણ ચર્ચા ઊઠી છે.