શું તમે ફરવાના શોખિન છો? તમારા માટે હવે એક નવું જ પર્યટન સ્થળ ખુલવા જઈ રહ્યું છે. જે અંગે તમે ક્યારેય વિચાર્યું પણ નહીં હોઈ. જોકે આ પ્રયટન સ્થળનું એક રાતનું ભાડું 25 લાખ રૂપિયા છે.
તમને અંદાજ તો આવી જ ગયો હશે કે, આપણે એક એવા પ્રવાસન સ્થળ વિશે વાત કરીએ છીએ જે પૃથ્વી પર છે જ નહીં. અમેરિકન સ્પેસ એન્જન્સી નાસા 2020 સુધીમાં ઈન્ટરનેશનલ સ્પેસ સ્ટેશનને પર્યટકો માટે ખોલવા જઈ રહ્યું છે. એટલે કે અંતરિક્ષમાં રિસર્ચ સિવાય પણ હવે લોકો ISS પર રોકાઈ શકશે. નાસાના એક રિપોર્ટ પ્રમાણે, ISSનું એક રાતનું ભાડું 35 હજાર ડોલર એટલે કે, અંદાજે 25 લાખ રૂપિયા હશે.
નાસાના ચીફ ફાઈનાન્સ ઓફિસર જેફ ડીવિટના જણાવ્યા પ્રમાણે, એજન્સી હવે ISSને આર્થિક લાભ માટે પણ ખોલી રહી છે. અમે તેનું માર્કેટિંગ પણ કરીશું. વર્ષ 2020 પછી દર વર્ષે ઓછામાં ઓછા બે મિશન થશે. તેમાં પર્યટકોને 30 દિવસ સુધી ISS પર રોકાવાની ઓફર આપવામાં આવશે.
દર વર્ષે 12 અંતરિક્ષ યાત્રી સ્પેસ પર જઈ શકશે. જોકે આ પહેલીવાર નથી થતું કે કોઈ પર્યટક ISSની મુલાકાત કરશે. આ પહેલાં 2001માં અમેરિકન બિઝનેસ ડેનિસ ટીટોએ રશિયાને 2 કરોડ ડોલર એટલે કે, 139 કરોડચૂકવીને સ્પેશ સ્ટેશનની મુલાકાત કરી હતી. જોકે હવે નાસા પણ પર્યટકો માટે ઈન્ટરનેશનલ સ્પેસ સ્ટેશન ખોલવાની તૈયારીમાં છે.