- નરેશ પટેલના રાજનીતિમાં પ્રવેશને લઈને મોટા સમાચાર
- હું ખભે બેસાડીને ચૂંટણી લડાવવા માટે તૈયાર-વસોયા
- મીડિયાના મિત્રો રાહ જુએ-શક્તિસિંહ ગોહિલ
લલિત કગથરાએ મીડિયા સામે નિવેદન આપતા જણાવ્યું કે, તમારા બધાની આતુરતાનો અંત બહું જલ્દી આવી જશે તેવું મને લાગે છે. નરેશ પટેલ જો કોંગ્રેસમાં આવે તો આ સરમુખત્યાર સરકારનો અંત આવે અને ગુજરાતના ખેડૂતો તથા ગુજરાતના નાગરિકોને ફાયદો થાય તેમ છે. કગથરાએ વધુમાં એમ પણ જણાવ્યું કે, ગુજરાતના 10 લાખ યુવાનો કે જેમના પેપરો ફૂટે છે તેઓ તમામ ઈચ્છે છે કે, નરેશ પટેલ ગુજરાતની રાજનીતિમાં પ્રવેશે.
...તો ખભે બેસાડીને ચૂંટણી લડાવવા તૈયાર
રાજકોટ ખાતે એક પત્રકાર પરિષદને સંબોધન કરતા કોંગ્રેસના ધારાસભ્યો લલિત વસોયાએ કહ્યું હતું કે, નરેશ પટેલ જો ધોરાજી અને ઉપલેટા બેઠક પર ચૂંટણી લડવા ઈચ્છુક હોય અને જો પાર્ટી હા પાડે તો અમારા અહોભાગ્યા છે અને જાહેરમાં જણાવું છું કે, નરેશભાઈને ખભે બેસાડી ધોરાજી-ઉપેલટાની અંદર ચૂંટણી લડાવવાની તૈયારી છે.
શક્તિસિંહ ગોહિલે કહ્યું- મીડિયાના મિત્રો રાહ જુએ
પાટીદાર અગ્રણી અને ખોડલધામના પ્રમુખ નરેશ પટેલના ગુજરાતની રાજનીતિમાં સક્રિય પ્રવેશને લઈને ગરમાવો છે ત્યારે સમગ્ર મામલે કોંગ્રેસી સાંસદ શક્તિસિંહે ગોહિલે મહત્વનું નિવેદન આપ્યું છે. શક્તિસિંહે જણાવ્યું કે, નરેશ પટેલ મારા મિત્ર છે અને સારા લોકો કોંગ્રેસમાં જોડાય તો સ્વાગત થશે. આ સાથે જ તેમણે મીડિયાના મિત્રોને પણ થોડી ધરપત રાખવાનું સૂચન કર્યું હતું અને જણાવ્યું હતું કે, કેટલીક બાબતોના ઢંઢેરા પીટવાના ન હોય.
નરેશ પટેલે તાજેતરમાં VTV સાથે કરી ટેલિફોનિક વાતચીત
2022નું વર્ષ એટલે કે વર્ષ 2024ની લોકસભાની ચૂંટણીનું સેમિફાઇનલ યર, યુપી સહિત પાંચ રાજ્યોની ચૂંટણી સંપન્ન થઈ છે ત્યારે દેશની રાજકીય પાર્ટીઓનું ધ્યાન હવે ગુજરાત પર કેન્દ્રીત થયું છે જો કે, ગુજરાત વિધાનસભાની ચૂંટણી પહેલા છેલ્લા એક મહિનાથી પણ વધુ સમયથી એક જ ચર્ચા રાજ્યમાં ચાલી રહી છે કે ખોડલધામ ચેરમેન નરેશ પટેલ કોના ? અનેક અટકળો ચાલી રહી છે. ત્યારે રાજકારણમાં પ્રવેશવા મુદ્દે નરેશ પટેલે vtv સાથે ટેલિફોનિક વાતચીતમાં મોટું નિવેદન આપ્યું હતું અને જાણકારી આપી હતી કે, તેઓ હજી સુધી કોઈને મળવા ગયો નથી.
હજુ સુધી કોઈને મળવા ગયો નથી હવે નિર્ણય લઈશ-નરેશ પટેલ
છેલ્લા ઘણા દિવસોથી નરેશ પટેલ લઈને અનેક અટકળો ચાલી રહી છે. ત્યારે પાટીદાર સમાજના આગેવાન નરેશ પટેલ રાજકારણમાં આવે છે તેવી ચર્ચાઓ વચ્ચે નરેશ પટેલે VTV સાથે ટેલિફોનિક વાતચીત કરી હતી. જેમાં નરેશ પટેલ હાલ રાજકોટમાં જ છે. નરેશ પટેલે જણાવ્યું કે સર્વે બાદ રાજકારણ અંગે નિર્ણય કરીશ. હજુ સુધી કોઈને મળવા ગયો નથી પણ હવે નિર્ણય લઈશ.
