ચંદ્રયાન-2ન લેન્ડર વિક્રમ સાથે ઝડપથી સંપર્ક સાધવાના પ્રયાસ માટે દરેક ભારતીય પ્રાર્થના કરી રહ્યા છે. ત્યારે સોમવારે નાગપુર સિટી પોલીસે પોતાના સત્તાવાર ટ્વિટર એકાઉન્ટ પરથી વિક્રમ માટે ખુબ જ સરસ સંદેશ પોસ્ટ કર્યો હતો.
નોંધનીય છે કે, આ સંદેશમાં પોલીસે વિક્રમને કહેવામાં આવ્યું કે તે ઇસરોને સિગ્નલ મોકલે. હાલ આ સંદેશ સોશિયલ મીડિયામાં વાયરલ થઇ રહ્યો છે.
નાગપુર પોલીસે લેન્ડર વિક્રમને જવાબ આપવાની વિનંતી કરતા આશ્વાસન આપ્યું કે પોલીસ સિગ્નલ તોડવા માટે તને દંડ નહીં ફટકારે. નાગપુર સિટી પોલીસે પોતાના ટ્વિટર એકાઉન્ટ પર પોસ્ટ કરતા કહ્યું કે, 'પ્રિય વિક્રમ, જવાબ તો આપ, સિગ્નલ તોડવા બદલ અમે તને દંડ નહીં ફટકારીએ. '
નાગપુર પોલીસના વખાણ
ટ્વિટર યુઝર્સ લખ્યું કે, નાગપુર પોલીસે સાચું કહ્યું, 133 કરોડ ભારતીય લોકોની આશા વિક્રમ સાથે જોડાયેલી છે. નાગપુર પોલીસ તમારું ટ્વીટ ઉત્તમ છે. તો આ સાથે જ અન્ય એક ટ્વિટર યુઝર્સે ટીખળ કરતા કહ્યું કે, નાગપુર પોલીસ ચિંતા ન કરે વિક્રમે દંડ ભરવા માટે લોનની વ્યવસ્થા કરી રાખી છે.
ચંદ્રની સપાટી પર છે લેન્ડર વિક્રમ
ભારતીય અંતરિક્ષ સંગઠન(ISRO) એ મોકલેલ વિક્રમ લેન્ડર લેન્ડ થવાની ગણતરીની મિનિટ પહેલા વિક્રમ સાથે સંપર્ક તૂટી ગયો હતો. લેન્ડર ચંદ્રમાની સપાટીથી 2.1 K.M ઉપર હતું ત્યારે તેનો સંપર્ક તૂટી ગયો હતો. ત્યારબાદ આજ દિવસ સુધી તેનો સંપર્ક કરવાનો પ્રયાસ ISRO દ્વારા કરવામાં આવી રહ્યો છે.