દેશભરમાં કોરોના વાયરસના સંક્રમણના કેસ વધતા જઇ રહ્યા છે. બીજી તરફ મધ્યપ્રદેશથી એક એવો મામલો સામે આવ્યો છે જેણે ભાઇચારાનું ઉત્તમ ઉદાહરણ બતાવ્યું છે. મધ્યપ્રદેશના ઇન્દોરમાં રહેતા એક ગરીબ વૃદ્ધાના મોત બાદ મુસ્લિમ ભાઇઓએ અંતિમ સંસ્કાર કર્યા છે.
દેશભરમાં કોરોના વાયરસના સંક્રમણના કેસ વધતા જઇ રહ્યા છે
ઇન્દોરમાં રહેતા એક ગરીબ વૃદ્ધાના મોત બાદ મુસ્લિમ ભાઇઓએ અંતિમ સંસ્કાર કર્યા
આ પહેલા ઇન્દોરના ટાટપટ્ટી બાખલમાં મેડિકલ ટીમ પર પથ્થરમારાની ઘટના બની હતી
મધ્યપ્રદેશના ઇન્દોરના સાઉથ તોડા જુના ગણેશ મંદિર પાસે રહેતા એક ગરીબ વૃદ્ધા જેમને મહોલ્લા રહેવાસીઓ પ્રેમથી 'દૂર્ગા મા' નામથી બોલાવતા હતા, તેમના મૃત્યુ બાદ મુસ્લિમ ભાઇઓએ અંતિમ સંસ્કાર કર્યા છે. રાત્રે મોહલ્લામાં રહેતા મુસ્લિમ પરિવારોએ જ્યારે તબિયત પૂછી. ત્યારબાદ સવારે જાણવા મળ્યું કે દૂર્ગા મા નથી રહ્યા. ત્યારબાદ તેઓના બે પુત્રો જે અન્ય જગ્યાએ રહેતા હતા તેઓને બોલાવામાં આવ્યા. જ્યારે તે આવ્યા તો એમની પાસે એટલા પણ રુપિયા નહોતા કે પોતાની માતાના અંતિમ સંસ્કાર કરી શકે. ત્યારે મહોલ્લાના જ મુસ્લિમ ભાઇઓએ પોતાના દુર્ગા માના અંતિમ સંસ્કાર કર્યા.
આ દરમિયાન જે સારી વાત સામે આવી જે દુનિયામાં ખુબ જ ઓછી જોવા મળે છે. જ્યારે દૂર્ગા મા માટે મુસ્લિમોએ જે કામ કર્યું તે નફરતની રાજનીતિ કરનારા તથા હિન્દુ-મુસ્લિમોને વહેંચીને રાજનીતિ કરનારાના ગાલ પર મોટો તમાચો છે. આ મુસ્લિમ ભાઇઓએ દુર્ગા માને એવી રીતે કાંધ આપી જાણે પોતાની સગી માતાને જ કાંધ આપી રહ્યા હોય. આ ઉપરાંત તેઓ મુખાગ્નિમાં પણ સાથે જ રહ્યા હતા.
પરિવારના લોકોએ એમ્બ્યુલન્સ માટે કોલ કર્યો હતો પરંતુ વાહન ઉપલબ્ધ ન થઇ શક્યું. બીજી તરફ કેટલાક લોકો અંત્યેષ્ટિમાં સામેલ થવામાં પણ ડરી રહ્યા હતા. લૉકડાઉનને કારણે સંબંધીઓ ન આવી શક્યા તો મહોલ્લાના જ મુસ્લિમ ભાઇઓએ અંત્યેષ્ટિની તૈયારી કરી હતી. તેમણે અર્થીને ન માત્ર કાંધ આપી પરંતુ શ્મસાન ઘાટ લઇ ગયા અને અંત્યેષ્ટિનો ખર્ચો પણ ઉઠાવ્યો.
આ પહેલા ઇન્દોરના ટાટપટ્ટી બાખલમાં કેટલાક લોકોએ મેડિકલ ટીમ પર પથ્થરમારો કર્યો હતો. આ ઘટના બાદ દેશભરમાં તેની ટીકા કરવામાં આવી હતી. જોકે હવે શહેરના જ સાઉથ તોડામાં રહેતા મુસ્લિમ સમાજના લોકોએ સાંપ્રદાયિક એકતાની શાનદાર તસવીર રજૂ કરી છે.
નોંધનીય છે કે સોમવારે મધ્યપ્રદેશના ઇન્દોરમાં વધુ ચાર લોકોના કોરોના વાયરસ સંક્રમણથી મોત થયાને પુષ્ટી મળી છે. આમ રાજ્યમાં કોરોના વાયરસની મહામારીથી દમ તોડી દેનાર દર્દીઓની સંખ્યા વધીને 18 પર પહોંચી ગઇ છે.