ધરપકડ / કોણ છે વરરાજાના વેરી! પાટણમાં લગ્નના એક દિવસ પહેલા યુવકનું મર્ડર, પ્રેમ પ્રકરણ હોવાની આશંકાથી હડકંપ

• રાધનપુરમાં યુવાનની હત્યા કરનાર આરોપીની ધરપકડ
• મૃતક યુવકનાં આજે થવાનાં હતા લગ્ન
• મૃતક યુવકનાં અન્ય યુવતી સાથેનાં સબંધોનાં કારણે થઈ હત્યા

 પાટણ જીલ્લાના રાધનપુર શહેરમાં જાહેરમાં એક યુવાનની હત્યા થઈ જતા ચકચાર મચી જવા પામી હતી. રાધનપુર મહેસાણા હાઇવે ચાર રસ્તા પાસેના એક કોમ્પ્લેક્સમાં સમી તાલુકાના અમરાપુર ગામનો વિપુલ ઠાકોર નામનો યુવાન કે જેના આજે લગ્ન હતા. આ યુવાન પોતાના લગ્નની તૈયારી માટે ખરીદી કરવા રાધનપુર શહેર ગયો હતો. જ્યાં તેની અજાણ્યા ઈસમોએ છરીના ઘા મારી વિપુલ ઠાકોરની કરપીણ હત્યા કરી નાખી આરોપી ફરાર થઈ જવા પામ્યા હતા.

 પોલીસે સીસીટીવીના આધારે તપાસ હાથ ધરી હતી
ઘટનાની જાણ રાધનપુર પોલીસને થતા પોલીસે મૃતક વિપુલ ઠાકોરની લાશને રાધનપુર સરકારી રેફરલ હોસ્પિટલ ખાતે પીએમ માટે ખસેડી હતી અને ફરાર આરોપીઓને ઝડપવા માટે સ્થાનિક સીસીટીવી કેમેરા ચેક કરવાની કાર્યવાહી હાથ ધરી હતી. ત્યારે રાધનપુર પોલીસે આ ઘટનામાં સંડોવાયેલ ફરાર આરોપીની  પાટણ એલ.સી.બી. એ  મોટીપીંપળી ગામનાં બસ સ્ટેન્ડ પાસેથી ધરપકડ કરી હતી.

મૃતકનાં એક વર્ષ અગાઉ અન્ય યુવતી સાથેનાં સબંધોનાં કારણે યુવતીનાં મંગેતરે કરી હત્યા
રાધનપુરમાં ગત રોજ યુવકની હત્યાનાં બનાવ બાદ આરોપી ફરાર થઈ ગયો હતો. જેને પાટણ એલ.સી. બી. પોલીસે ઝડપી પાડ્યો હતો. ત્યારે પોલીસ દ્વારા હત્યા બાબતે કોલી ઈશ્વરભાઈ પ્રભુભાઈ રહે. રાફુ (કૈલાશપુરા) તા. સમી. જી. પાટણવાળાને પકડી પાડી તેની પૂછપરછ કરતા યુવકે જણાવ્યું હતું કે મૃતક યુવક વિપુલ ઠાકોરનાં  એક વર્ષ પહેલા એક યુવતી સાથેનાં સબંધોનાં કારણે યુવતીનાં મંગેતર દ્વારા હત્યા કરાઈ હોવાનું પોલીસ તપાસમાં બહાર આવ્યું હતું. ત્યારે એલ.સી.બી. પોલીસે આરોપીની અટક કરી રાધનપુર પોલીસને વધુ પૂછપરછ માટે સોંપવામાં આવ્યો છે.